বিগত বছৰত বেলজিয়ামৰ এণ্টৱাৰ্প জিলা আদালতৰ প্ৰি-ট্ৰায়েল চেম্বাৰে মেহুল চোকছি প্ৰত্যাৰ্পণ অনুমোদন কৰিছিল। শেহতীয়াকৈ এণ্টৱাৰ্পৰ চাৰিজনীয়া আপিল আদালতে জিলা আদালতৰ সেই ৰায়ক বহাল ৰাখিছে। ইয়াৰ পিছতে ১৩,৫০০ কোটি টকাৰ ঋণ জালিয়াতিৰ অভিযোগত পলাতক মেহুল চোকছিৰ প্ৰত্যাৰ্পণৰ পথ এতিয়া ক্ৰমাৎ মসৃণ হৈ পৰিছে। এণ্টৱাৰ্পৰ চাৰিজনীয়া আপিল আদালতে জিলা আদালতৰ প্ৰত্যাৰ্পণৰ ৰায় বাহাল ৰাখি চোকছিক ভাৰতলৈ ঘূৰাই পঠোৱাৰ প্ৰক্ৰিয়াক গতি এক গতি লাভ কৰিছে।
এই ৰায়ৰ পিছত নতুন দিল্লীয়ে চোকছিক ভাৰতলৈ ঘূৰাই আনিবলৈ প্ৰচেষ্টা অব্যাহত ৰাখিছে। উল্লেখ্য যে ২০১৮ আৰু ২০২৩ চনত মুম্বাইৰ বিশেষ আদালতে চোকছিৰ বিৰুদ্ধে গ্ৰেপ্তাৰী পৰোৱান জাৰি কৰিছিল। এই নিৰ্দেশৰ ভিত্তিত ভাৰত চৰকাৰে বেলজিয়ামৰ ওচৰত চোকছিৰ প্ৰত্যাৰ্পণৰ আবেদন দাখিল কৰিছিল।
চোকছিয়ে জিলা আদালতৰ ৰায়ক প্ৰত্যাহ্বান জনাই আপিল আদালতৰ কাষ চাপিছিল। তেওঁৰ আবেদনত জিলা আদালতৰ ৰায়ক ষড়যন্ত্ৰমূলক আৰু ৰাজনৈতিক উদ্দেশ্যপ্ৰণোদিত বুলি অভিযোগ কৰা হৈছিল। ইয়াৰ উপৰিও তেওঁ দাবী কৰিছিল যে ভাৰতলৈ প্ৰত্যাৰ্পণ কৰিলে তেওঁৰ গোচৰৰ ন্যায্য বিচাৰ নহ’ব। কিন্তু আপিল আদালতে তেওঁৰ যুক্তি অগ্ৰাহ্য কৰি জিলা আদালতৰ ৰায় বাহাল ৰাখে।
আইনজ্ঞসকলৰ মতে, আপিল আদালতৰ ৰায়ৰ পিছতো চোকছিৰ হাতত এতিয়াও বেলজিয়ামৰ উচ্চতম ন্যায়ালয়ৰ কাষ চাপিবলৈ সুযোগ আছে। অহা ১৫ দিনৰ ভিতৰত তেওঁ এই ৰায়ৰ বিৰুদ্ধে উচ্চতম ন্যায়ালয়ত আবেদন কৰিব পাৰে। কিন্তু এয়াই হ’ব তেওঁৰ প্ৰত্যাৰ্পণ ৰোধৰ শেষ সম্ভাৱনা।
১৩,৫০০ কোটি টকাৰ পাঞ্জাব নেচনেল বেংক জালিয়াতিৰ গোচৰত অভিযুক্ত মেহুল চোকছি ২০১৮ চনৰ পৰা পলাতক হৈ আছে। তেওঁৰ বিৰুদ্ধে ভাৰতত একাধিক আইনী পদক্ষেপ গ্ৰহণ কৰা হৈছে। বেলজিয়ামৰ আদালতৰ শেহতীয়া ৰায়ে ভাৰতৰ তদন্তকাৰী সংস্থাসমূহৰ বাবে এই গোচৰত ন্যায় প্ৰতিষ্ঠাৰ দিশত এক গুৰুত্বপূৰ্ণ পদক্ষেপ হিচাপে পৰিগণিত হৈছে।
চোকছিৰ প্ৰত্যাৰ্পণৰ প্ৰক্ৰিয়া এতিয়া চূড়ান্ত পৰ্যায়ৰ দিশে আগবাঢ়িছে। উচ্চতম ন্যায়ালয়ৰ সিদ্ধান্তই এই গোচৰৰ চূড়ান্ত পৰিণতি নিৰ্ধাৰণ কৰিব। কিন্তু বৰ্তমানৰ পৰিস্থিতিত ভাৰত চৰকাৰৰ প্ৰচেষ্টা সফল হোৱাৰ সম্ভাৱনা অধিক শক্তিশালী হৈ পৰিছে।
