প্ৰধানমন্ত্ৰী নৰেন্দ্ৰ মোদীৰ অধ্যক্ষতাত অনুষ্ঠিত কেন্দ্ৰীয় কেবিনেটে দুটা মূল প্ৰস্তাৱত অনুমোদন জনাইছে। কেন্দ্ৰীয় মন্ত্ৰী অশ্বিনী বৈষ্ণৱে মঙলবাৰে এই সিদ্ধান্তসমূহৰ বিষয়ে জানিবলৈ দিয়ে।
১. অষ্টম কেন্দ্ৰীয় দৰমহা আয়োগৰ টাৰ্মছ অৱ ৰেফাৰেন্স (ToR)ত অনুমোদন
কেবিনেটে অষ্টম কেন্দ্ৰীয় দৰমহা আয়োগৰ (Eighth Central Pay Commission) ‘টাৰ্মছ অৱ ৰেফাৰেন্স’ত (T-o-R) অনুমোদন জনাইছে।
এই সিদ্ধান্তই প্ৰতিৰক্ষা কৰ্মী আৰু ৬৯ লাখ পেঞ্চনাৰকে ধৰি প্ৰায় ৫০ লাখ কেন্দ্ৰীয় চৰকাৰৰ কৰ্মচাৰীক উপকৃত কৰিব।
জানুৱাৰী মাহত গঠনৰ কথা ঘোষণা কৰা এই আয়োগৰ নেতৃত্বত আছে ন্যায়াধীশ (অৱসৰপ্ৰাপ্ত) ৰঞ্জনা প্ৰকাশ দেশাই। আয়োগটোত এজন অধ্যক্ষ, এজন অংশকালীন সদস্য আৰু এজন সদস্য-সচিব থাকিব।
আয়োগে গঠনৰ ১৫ মাহৰ পিছত নিজৰ প্ৰতিবেদন দাখিল কৰিব।
দহ বছৰৰ মূৰে মূৰে পে কমিচনৰ পৰামৰ্শ কাৰ্যকৰী কৰাৰ ধাৰা অনুসৰি, অষ্টম দৰমহা আয়োগৰ পৰামৰ্শসমূহ সাধাৰণতে ২০২৬ চনৰ ১ জানুৱাৰীৰ পৰা কাৰ্যকৰী হোৱাৰ সম্ভাৱনা আছে।
আয়োগে কৰ্মচাৰীৰ দৰমহা আৰু অন্যান্য সুবিধাৰ পৰিৱৰ্তন পৰীক্ষা আৰু পৰামৰ্শৰ বাবে দেশৰ অৰ্থনৈতিক অৱস্থা, বিত্তীয় বিচক্ষণতাৰ প্ৰয়োজনীয়তা, উন্নয়নমূলক ব্যয়, বিত্তীয় ক্ষেত্ৰত ৰাজ্য চৰকাৰসমূহৰ ওপৰত পৰিব পৰা সম্ভাৱ্য প্ৰভাৱ, আৰু কেন্দ্ৰীয় ৰাজহুৱা খণ্ডৰ উদ্যোগ তথা ব্যক্তিগত খণ্ডৰ সৈতে পাৰিতোষিক গাঁথনিৰ তুলনা আদি বিষয়সমূহ বিবেচনা কৰিব।
২. ৰবি শস্য বতৰৰ (২০২৫-২৬)ৰ বাবে সাৰৰ ৰাজসাহায্যত অনুমোদন
কেবিনেটে ২০২৫-২৬ চনৰ ৰবি শস্যৰ বাবে ফছফেটিক আৰু পটাচিক (P&K) সাৰৰ ওপৰত পুষ্টিভিত্তিক ৰাজসাহায্য (NBS)ৰ হাৰ নিৰ্ধাৰণৰ প্ৰস্তাৱতো অনুমোদন জনায়।
২০২৫-২৬ চনৰ ৰবি শস্যৰ বতৰৰ বাবে আনুমানিক বাজেটৰ প্ৰয়োজনীয়তা হ’ব প্ৰায় ৩৭,৯৫২ কোটি টকা। এই পৰিমাণ ২০২৫ চনৰ খাৰিফ ছিজনৰ বাজেটৰ প্ৰয়োজনীয়তাতকৈ প্ৰায় ৭৩৬ কোটি টকা বেছি।
ডি-এমোনিয়াম ফছফেট (DAP) আৰু NPKS গ্ৰেডকে ধৰি P&K সাৰসমূহ কৃষকসকলৰ বাবে সুলভ মূল্যত সুকলমে উপলব্ধতা নিশ্চিত কৰা।
এই ৰাজসাহায্যক যুক্তিসংগত কৰাৰ সিদ্ধান্ত সাৰ আৰু অন্যান্য সামগ্ৰীৰ আন্তঃৰাষ্ট্ৰীয় মূল্যৰ শেহতীয়া ধাৰাক লক্ষ্য কৰি লোৱা হৈছে।
এই দুয়োটা সিদ্ধান্তই কেন্দ্ৰীয় কৰ্মচাৰী আৰু কৃষকসকলক পোনপটীয়াকৈ উপকৃত কৰিব বুলি আশা কৰা হৈছে।
