প্ৰায় ৪৪০০ কোটি টকাৰ জালিয়াতিৰ সৈতে জড়িত হৈ পৰিছে ভাৰতীয় মূলৰ এজন ব্যক্তি। আমেৰিকাৰ সংবাদ মাধ্যম দ্য ৱাল ষ্ট্ৰীট জাৰ্নেলৰ এক প্ৰতিবেদন অনুসৰি আমেৰিকাৰ বিনিয়োগ সংস্থা ব্লেকৰক আৰু অন্যান্য কোম্পানীসমূহে ঋণৰ জালিয়াতিৰ ফলত হেৰুৱা ৫০ কোটি মাৰ্কিন ডলাৰ (ভাৰতীয় মুদ্ৰাত প্ৰায় ৪৪০০ কোটি টকা) আদায় কৰিবলৈ চেষ্টা চলাইছে।
সেই ঋণ জালিয়াতিৰ সমগ্ৰ ব্লুপ্ৰিণ্ট আমেৰিকান ব্ৰডবেণ্ড টেলিকম আৰু ব্ৰীজভইচৰ চিইঅ’ ভাৰতীয় মূলৰ বংকিম ব্ৰক্ষভট্টই কৰিছিল বুলি অভিযোগ উঠিছে। এই প্ৰৱঞ্চনাক কল্পনাতীত বুলি অভিহিত কৰা হৈছে। কিন্তু প্ৰতিবেদন অনুসৰি বংকিমৰ অধিবক্তাই সকলো অভিযোগ অস্বীকাৰ কৰিছে। অৱশ্যে কোনো সবিশেষ তথ্য দিয়া হোৱা নাই।
ইফালে, চলিত বৰ্ষৰ আগষ্ট মাহত ভাৰতীয় মূলৰ লোকজনৰ বিৰুদ্ধে আইনী ব্যৱস্থা গ্ৰহণ কৰা বুলি আমেৰিকাৰ সংবাদ মাধ্যমত প্ৰকাশ পাইছে। গোচৰটোত অভিযোগ কৰা হৈছে যে বংকিমে তেওঁৰ আৰ্থিক অৱস্থাৰ ভুৱা ধাৰণা সৃষ্টি কৰিবলৈ ভাৰত আৰু মৰিচাছলৈ ধন প্ৰেৰণ কৰিছিল। ঋণৰ বাবে বন্ধক হিচাপে থকা বস্তু ব্যৱহাৰ কৰি এই প্ৰৱঞ্চনা সংঘটিত কৰা হৈছিল। এই জালিয়াতি ২০২০ চনৰ ছেপ্টেম্বৰ মাহত সংঘটিত হোৱাৰ অভিযোগ কৰা হৈছে।
আনহাতে, ব্লেকৰকৰ বাবে এটা গুৰুত্বপূৰ্ণ সন্ধিক্ষণত এই বিষয়টো চৰ্চালৈ আহিছে। চলিত বৰ্ষৰ আৰম্ভণিতে বিশ্বৰ অন্যতম আগশাৰীৰ বিনিয়োগ সংস্থা এইচ পি এছ ইনভেষ্টমেণ্ট পাৰ্টনাৰ্ছক অধিগ্ৰহণ কৰা হৈছিল। ৱাল ষ্ট্ৰীট জাৰ্নেলৰ এক প্ৰতিবেদন অনুসৰি ২০২০ চনৰ ছেপ্টেম্বৰৰ পৰা এইচ পি এছে বংকিমৰ সৈতে জড়িত কোম্পানীসমূহক ঋণ দিবলৈ আৰম্ভ কৰে। পিছলৈ বিনিয়োগৰ পৰিমাণ বৃদ্ধি পায়। ২০২১ চনত বিনিয়োগৰ পৰিমান আছিল ৩৮৫ মিলিয়ন ডলাৰ। যিটো ২০২৪ চনৰ আগষ্ট মাহত ৪৩ কোটি ডলাৰলৈ বৃদ্ধি পাইছে।
দৰাচলতে কোন এই বংকিম ব্ৰক্ষভট্ট? এন্টাৰপ্ৰিনিয়ৰ মিডল ইষ্টৰ সৈতে হোৱা এক সাক্ষাৎকাৰত তেওঁ নিজকে এজন টেলিকম অভিযন্তাৰ পৰা ব্যৱসায়ীলৈ পৰিণত হোৱা বুলি বৰ্ণনা কৰিছিল। যিয়ে ১৯৮৯ চনত ভাৰতত পুছ-বুটাম টেলিফোন নিৰ্মাণৰ বাবে এটা কাৰখানা স্থাপন কৰিছিল। লাহে লাহে তেওঁ চেটেলাইট ডিচ, টেলিকম বিলিং, ডিজিটেল বিত্তীয় সমাধান আদি ক্ষেত্ৰত শাখা-প্ৰশাখা সম্প্ৰসাৰণ কৰে।
আমেৰিকাৰ সংবাদ মাধ্যমৰ বাতৰি অনুসৰি বৰ্তমান বংকিম ভাৰতত থকা বুলি ধাৰণা কৰা হৈছে। ২০২৪ চনৰ জুলাই মাহত নিউয়ৰ্কত থকা বংকিমৰ কাৰ্যালয় পৰিদৰ্শন কৰা হয়। সেই অফিচত কোনো নাই বুলি গম পোৱা যায়।
