বিহাৰ বিধানসভা নিৰ্বাচনৰ আজি অন্তিম তথা দ্বিতীয় পৰ্যায়ৰ ভোটগ্ৰহণ অনুষ্ঠিত হ’ব। প্ৰথম পৰ্যায়ৰ ভোটগ্ৰহণ যোৱা ৬ নৱেম্বৰত অনুষ্ঠিত হৈছিল, য’ত অভিলেখসংখ্যক ৬৫.০৮ শতাংশ ভোটদানৰ হাৰ পোৱা গৈছিল।
আজিৰ দ্বিতীয় পৰ্যায়ত ১২২টা সমষ্টিৰ মুঠ ১৩০২ জন প্ৰাৰ্থীৰ ভাগ্য নিৰ্ণয় কৰিব প্ৰায় ৩.৭ কোটি ভোটাৰে। এই চূড়ান্ত পৰ্যায়ৰ ভোটগ্ৰহণৰ বাবে নিৰ্বাচন আয়োগে সকলো প্ৰস্তুতি সম্পূৰ্ণ কৰিছে।
শান্তিপূৰ্ণ ভোটদান নিশ্চিত কৰিবলৈ ৰাজ্যজুৰি ব্যাপক নিৰাপত্তাৰ ব্যৱস্থা কৰা হৈছে। তথ্য অনুসৰি, ৪ লাখৰো অধিক নিৰাপত্তাৰক্ষী নিয়োগ কৰা হৈছে।
মুঠ ৪৫,৩৯৯টা কেন্দ্ৰত ভোটগ্ৰহণ কৰা হ’ব, যাৰ ভিতৰত ৪০,০৭৩টা কেন্দ্ৰ গ্ৰাম্য অঞ্চলৰ।
সংবেদনশীল আৰু অতি সংবেদনশীল ভোটগ্ৰহণ কেন্দ্ৰসমূহত চি আৰ পি এফ জোৱান মোতায়েন কৰা হৈছে।
আন ৰাজ্যৰ সৈতে থকা বিহাৰৰ সীমান্তত নিৰাপত্তা বৃদ্ধি কৰা হৈছে। সোমবাৰে সন্ধিয়া দিল্লীত সংঘটিত হোৱা বিস্ফোৰণৰ পৰিপ্ৰেক্ষিতত বিহাৰ আৰক্ষী হাই এলাৰ্টত আছে।
এই দ্বিতীয় তথা অন্তিম পৰ্যায়ৰ ভোটদানত নীতিশ কুমাৰৰ মন্ত্ৰীসভাৰ আধা ডজনৰো অধিক মন্ত্ৰীৰ ৰাজনৈতিক ভৱিষ্যত নিৰ্ণয় হ’ব।
ভোটগ্ৰহণ হ’বলগীয়া জিলাসমূহ হৈছে— পশ্চিম চম্পাৰণ, পূব চম্পাৰণ, সীতামড়ী, মধুবনী, সুপৌল, অৰৰিয়া, আৰু কিছানগঞ্জ। এই আটাইকেইখন জিলা নেপালৰ সীমান্তৱৰ্তী।
এই অধিকাংশ জিলা সীমান্ত অঞ্চলত পৰা আৰু মুছলমান জনসংখ্যা অধিক হোৱাৰ বাবে এই পৰ্যায়টো শাসকীয় দল (এন ডি এ) আৰু বিৰোধী উভয়ৰে বাবে অতি গুৰুত্বপূৰ্ণ বুলি বিবেচিত হৈছে। নিৰ্বাচনী প্ৰচাৰৰ সময়ত এন ডি এই বাৰে বাৰে অনুপ্ৰৱেশকাৰীৰ প্ৰসঙ্গ উত্থাপন কৰাৰ পৰিপ্ৰেক্ষিতত এই চূড়ান্ত পৰ্যায়টো অধিক আকৰ্ষণীয় হৈ পৰিছে।
দ্বিতীয় পৰ্যায়ৰ ৩.৭ কোটি ভোটাৰৰ ভিতৰত:
- মহিলা ভোটাৰ: ১.৭৫ কোটি
- মধ্যবয়স্ক ভোটাৰ (৩০-৬০ বছৰ): ২.২৮ কোটি
- যুৱ ভোটাৰ (১৮-১৯ বছৰ): ৭.৬৯ লাখ
নৱাদা জিলাৰ হিছুৱা সমষ্টিত সৰ্বাধিক ভোটাৰ (৩.৬৭ লাখ)।লৌৰিয়া, চানপতিয়া, ৰক্সাউল, ত্ৰিভেনিগঞ্জ, সুগাউলি, আৰু বনমাখী সমষ্টিত ২২ জনকৈ সৰ্বাধিক প্ৰাৰ্থী আছে।
