ইউনিক আইডেণ্টিফিকেশ্যন অথৰিটি অৱ ইণ্ডিয়া (UIDAI) কৰ্তৃপক্ষই ভাৰতীয় নিৰ্বাচন আয়োগক (ECI) জনোৱা মতে, ২০০৯ চনৰ জানুৱাৰী মাহৰ পৰা পশ্চিম বংগত প্ৰায় ৩৪ লাখ আধাৰ কাৰ্ডধাৰী ‘মৃত’ হোৱা বুলি জানিব পৰা গৈছে।
UIDAI-এ ECI-ক এই বিষয়েও জনায় যে ৰাজ্যখনৰ প্ৰায় ১৩ লাখ লোকৰ হাতত কেতিয়াও আধাৰ কাৰ্ড নাছিল, কিন্তু পাছত তেওঁলোকৰ মৃত্যু হৈছে।
নিৰ্বাচনী তালিকাৰ বিশেষ নিবিড় পুনৰীক্ষণ (SIR) প্ৰক্ৰিয়া চলি থকাৰ মাজতে UIDAI-ৰ বিষয়া আৰু ৰাজ্যখনৰ মুখ্য নিৰ্বাচনী বিষয়া মনোজ কুমাৰ আগৰৱালাৰ মাজত অনুষ্ঠিত হোৱা বৈঠকৰ সময়ত এই তথ্য জনোৱা হয়।
এই বৈঠকত ECI-ৰ নিৰ্দেশৰ পাছতে সকলো ৰাজ্যিক নিৰ্বাচনী আয়ুক্তক আধাৰ কৰ্তৃপক্ষৰ সৈতে সমন্বয় স্থাপন কৰি ভোটাৰৰ তথ্য পৰীক্ষা কৰি বেমেজালি চিনাক্ত কৰিবলৈ কোৱা হয়।
মনোজ কুমাৰ আগৰৱালাই কয় যে ৯ ডিচেম্বৰত গণনাৰ পৰ্যায় আৰু খচৰা তালিকা প্ৰকাশৰ পিছত যদি আবেদনকাৰীয়ে আধাৰ তথ্যকোষৰ পৰা আঁতৰোৱা নাম থকা ফৰ্ম দাখিল কৰা দেখা যায়, তেন্তে সংশ্লিষ্ট নিৰ্বাচনী পঞ্জীয়ন বিষয়াই (ERO) তেওঁলোকক পৰীক্ষণৰ বাবে মাতিব পাৰে।
প‘ল বিষয়াসকলে কয় যে যিহেতু আধাৰ বেছিভাগ একাউণ্টৰ সৈতে সংযুক্ত হৈ আছে, সেয়েহে তেওঁলোকে বেংকৰ পৰাও তথ্য সংগ্ৰহ কৰি আছে।
বিষয়াগৰাকীয়ে কয় যে বেংকসমূহে বছৰ বছৰ ধৰি কে ৱাই চি (KYC) আপডেট সম্পূৰ্ণ নোহোৱা একাউণ্টৰ তথ্য প্ৰদান কৰিছে, যাৰ ফলত ভোটাৰ তালিকাত এতিয়াও নাম থকা মৃত ব্যক্তিসকলক চিনাক্ত কৰাত সহায়ক হৈছে।
সম্প্ৰতি সমগ্ৰ পশ্চিম বংগত মৃত আৰু ভুৱা ভোটাৰক উলিয়াবলৈ SIR প্ৰক্ৰিয়া চলি আছে। বুথ লেভেল অফিচাৰসকলে (BLO) ২০২৫ চনৰ নিৰ্বাচনী তালিকাৰ ভিত্তিত গণনা ফৰ্ম বিতৰণ কৰি আৰু পাছলৈ সেই ফৰ্মসমূহত আবেদনকাৰীয়ে দিয়া তথ্যসমূহ ২০০২ চনৰ নিৰ্বাচনী তালিকাৰ সৈতে মেপিং কৰি ঘৰে ঘৰে পৰীক্ষণ চলাই আছে, যিহেতু এই অনুশীলন শেষবাৰৰ বাবে তেতিয়াই অনুষ্ঠিত হৈছিল।
মুখ্য কাৰ্যবাহী বিষয়াৰ কাৰ্যালয়ৰ পৰা পোৱা তথ্য অনুসৰি, ৰাজ্যত নিশা ৮ বজালৈকে ৬.৯৮ কোটিতকৈ অধিক (৯১.১৯%) গণনা ফৰ্ম বিতৰণ কৰা হৈছে।
