উত্তৰ প্ৰদেশৰ বাৰাবাংকি জিলাত থকা এটা ফটকা কাৰখানাত এক বৃহৎ বিস্ফোৰণ সংঘটিত হৈছে। এই দুৰ্ঘটনাত বৰ্তমানলৈকে দুজন শ্ৰমিকৰ মৃত্যু হোৱাৰ খবৰ পোৱা গৈছে। ইয়াৰ উপৰিও পাঁচজন লোক আহত হৈছে। স্থানীয় ৰাইজে কাৰখানাটোৰ বৈধতা সন্দৰ্ভত প্ৰশ্ন উত্থাপন কৰিছিল যদিও আৰক্ষীয়ে সেই অভিযোগ খণ্ডন কৰিছে।
আৰক্ষীৰ সূত্ৰ অনুসৰি, বৃহস্পতিবাৰে বিয়লি ফটকা কাৰখানাটোত হঠাৎ এই বিস্ফোৰণ ঘটে। এক প্ৰচণ্ড শব্দত সমগ্ৰ অঞ্চলটো কঁপি উঠে। ইয়াৰ পিছতে কাৰখানাটোত জুই লাগে। স্থানীয় বাসিন্দাসকলে ভয়তে বাহিৰলৈ ওলাই আহে আৰু উদ্ধাৰ অভিযান আৰম্ভ কৰে। এই খবৰ পাই আৰক্ষী আৰু এম্বুলেঞ্চ ততাতৈয়াকৈ ঘটনাস্থলীত উপস্থিত হয়।
জানিব পৰা মতে, দুৰ্ঘটনাৰ সময়ত কাৰখানাটোৰ ভিতৰত কেইবাজনো শ্ৰমিকে কাম কৰি আছিল। ফলত দুজন লোকৰ থিতাতে মৃত্যু হয় আৰু আন পাঁচজন আহত হয়। কিন্তু এই বিস্ফোৰণৰ প্ৰকৃত কাৰণ এতিয়াও স্পষ্ট হোৱা নাই। ইতিমধ্যে আৰক্ষীয়ে ঘটনাৰ তদন্ত আৰম্ভ কৰিছে।
আৰক্ষী বিষয়া অনুৰাগ সিঙে মন্তব্য কৰে, “বৰ্তমানলৈকে দুজন লোকৰ মৃত্যুৰ খবৰ পোৱা গৈছে। প্ৰাথমিকভাৱে জনা গৈছে যে কাৰখানাৰ কাম-কাজত হোৱা কিছু ভুলৰ বাবেই এই দুৰ্ঘটনা সংঘটিত হৈছে। আমি সমগ্ৰ বিষয়টোৰ তদন্ত চলাই আছো।”
আৰক্ষীয়ে জনোৱা মতে, কাৰখানাটোৰ মালিকৰ নাম খালিদ আৰু তেওঁৰ এই ফটকা কাৰখানাৰ বৈধ অনুজ্ঞাপত্ৰ আছিল।
