বিহাৰ বিধানসভা নিৰ্বাচনৰ ভোটগণনা যিমান আগুৱাইছে, সিমানেই শাসকীয় এন ডি এ (NDA)-ৰ অগ্ৰগতি বাঢ়িবলৈ ধৰিছে। শেহতীয়া তথ্য অনুসৰি, ২০০ খনতকৈয়ো অধিক আসনত এন ডি এই অগ্ৰগতি লাভ কৰি এক বৃহৎ জয়ৰ দিশে আগবাঢ়িছে।
ইফালে, বিৰোধী মহাজোটবন্ধনে মাত্ৰ ৩৯ খন আসনতহে অগ্ৰগতি লাভ কৰি শোচনীয় পৰিস্থিতিৰ সন্মুখীন হৈছে। মহাজোটৰ অংশীদাৰ কংগ্ৰেছে নিৰ্বাচনত বিপৰ্যয়ৰ সন্মুখীন হৈছে। দলটোৱে মাত্ৰ চাৰিখন আসনতহে আগবাঢ়ি আছে, আনকি পাঁচখন আসনতো অগ্ৰগতি লাভ কৰাৰ সম্ভাৱনা নাই। আনহাতে, ওৱাইছিৰ এ আই এম আই এম (AIMIM)-এ পাঁচখন আসনত আগবাঢ়ি আছে।
দলভিত্তিক অগ্ৰগতিৰ তালিকাত বিজেপি (BJP) ৮৮ খন আসনত, জে ডি ইউ (JDU) ৭৯ খন আসনত, আৰু মহাজোটৰ প্ৰধান দল আৰ জে ডি (RJD) ৩১ খন আসনত আগবাঢ়ি আছে। ইয়াৰ উপৰিও, এল জে পি (LJP) ২১ খন, হাম (HAM) ১ খন, আৰু বি এছ পি (BSP) ১ খন আসনত আগবাঢ়ি থকাৰ খবৰ পোৱা গৈছে।
মহাজোটবন্ধনৰ এই দুৰ্বল প্ৰদৰ্শনৰ বাবে ইতিমধ্যে ৰাজনৈতিক মহলে প্ৰতিক্ৰিয়া প্ৰকাশ কৰিছে। সমাজৱাদী পাৰ্টীৰ নেতা অখিলেশ যাদৱে মহাজোটৰ এই পৰিস্থিতিৰ বাবে ‘নিৰ্বাচনী ষড়যন্ত্ৰ’ক দোষাৰোপ কৰিছে। শেহতীয়া তথ্য অনুসৰি এন ডি এই মুঠ ১৯৯ খন আসনত আৰু মহাজোটে ৩৯ খনত অগ্ৰগতি লাভ কৰিছে।
