বিজেপিয়ে টিকট দিব বুলি আশা কৰিছিল। কিন্তু নিদিলে। ইয়াৰ পিছতে উদ্ধাৰ হয় আৰ এছ এছ কৰ্মীজনৰ ওলমি থকা মৃতদেহ। চিকিৎসালয়লৈ নিয়াৰ পিছতো তেওঁক বচাব পৰা নগ’ল। কেৰালাৰ তিৰুৱনন্তপুৰমৰ নিবাসী আনন্দ কে থাম্পিৰ তাতেই মৃত্যু হয়।
বন্ধুসকলে দাবী কৰে যে তেওঁ আত্মহত্যা কৰিছে। তেওঁ নিজেই হেনো হোৱাটছএপত এই বিষয়ে অৱগত কৰিছিল। স্বাভাৱিকতে এই ঘটনাই চাঞ্চল্যৰ সৃষ্টি কৰিছে। যদিও গেৰুৱা শিবিৰে অভিযোগ অস্বীকাৰ কৰি কৈছে যে আনন্দই তেওঁলোকৰ পৰা টিকট বিচৰাই নাছিল।
আৰক্ষীৰ সূত্ৰই দাবী কৰিছে যে আনন্দই আশা কৰিছিল তিৰুৱনন্তপুৰম পৌৰসভা নিৰ্বাচনত ত্ৰিকানপুৰমৰ পৰা বিজেপিৰ টিকট পাব। কিন্তু প্ৰাৰ্থী তালিকা প্ৰকাশ পোৱাৰ পিছত তেওঁ জানিব পাৰে যে তেওঁৰ আশা পূৰণ নহ’ল। ইয়াৰ পিছত আনন্দে বিজেপি আৰু আৰএছএছৰ নেতাৰ বিৰুদ্ধে নিজৰ ক্ষোভ প্ৰকাশ কৰি বন্ধুসকললৈ হোৱাটছএপ মেছেজ প্ৰেৰণ কৰে। তেওঁ ঘোষণা কৰে যে তেওঁ আৰু এই জীৱনত জীয়াই থাকিব নিবিচাৰে।
মেছেজটো দেখাৰ পাছত বন্ধুবোৰ লৰালৰিকৈ আনন্দৰ ঘৰলৈ যায় যদিও শেষ ৰক্ষাৰ উপায় নাছিল। উপস্থিত হোৱাৰ লগে লগে তেওঁলোকে ঘৰৰ সন্মুখৰ এঠাইত আনন্দৰ দেহ ওলমি থকা দেখা পায়। ততাতৈয়াকৈ চিকিৎসালয়লৈ লৈ যোৱা আৰ এছ এছৰ কৰ্মীজনে পিছত তাতেই শেষ নিশ্বাস ত্যাগ কৰে।
আনন্দৰ বাৰ্তাসমূহ পৰীক্ষা কৰাৰ পিছত আৰক্ষীয়ে দাবী কৰে যে তেওঁ দলৰ টিকট নোপোৱাৰ পিছত নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰাৰ ইচ্ছা প্ৰকাশ কৰিছিল। কিন্তু তাৰ পিছত বন্ধুসকলে তেওঁৰ পৰা আঁতৰি থকা দেখি আনন্দই চাগে শেষত আত্মহত্যাৰ পথত আগবাঢ়িল।
ইপিনে, আনন্দৰ বাৰ্তাৰ পৰা আন এক দিশৰ উন্মেষ ঘটিছে। বিজেপিৰ বিৰুদ্ধে ক্ষোভ প্ৰকাশ কৰি তেওঁ কয় যে তেওঁক টিকট নিদিয়াৰ আঁৰত স্থানীয় একাংশ নেতা আছে। বালি মাফিয়াৰ সৈতে তেওঁলোকৰ যোগাযোগ আছিল। সেইবাবেই তেওঁক ব্যক্তিগত স্বাৰ্থৰ বাবে নিৰ্বাচনত প্ৰতিদ্বন্দ্বিতা কৰিবলৈ নিদিয়াৰ ‘ষড়যন্ত্ৰ’ কৰিছিল।
অভিযোগ অস্বীকাৰ কৰিলেও বিজেপিৰ ৰাজ্যিক সভাপতি ৰাজীৱ চন্দ্ৰশেখৰে এই ঘটনা শুনি স্তম্ভিত হোৱা বুলি কয়। তেওঁৰ ভাষাত, “মই জিলা সভাপতিৰ সৈতে যোগাযোগ কৰিছিলোঁ। তেওঁ কৈছে যে ৱাৰ্ডৰ পৰা পোৱা প্ৰাৰ্থীৰ তালিকাতে তেওঁৰ নাম নাছিল। অৱশ্যে আমি বিষয়টো তদন্ত কৰি চাম।”
আনহাতে, শিৱসেনাৰ নেতাসকলে আনন্দক বিজেপিয়ে টিকট নিদিয়াৰ পিছত নিৰ্বাচনত প্ৰতিদ্বন্দ্বিতা কৰিবলৈ তেওঁলোকৰ সহায় বিচৰা বুলি জানিবলৈ দিয়ে। শুকুৰবাৰে এখন হোটেলত তেওঁলোকে এখন বৈঠকতো মিলিত হৈছিল। বৈঠকৰ অন্তত আনন্দই শিৱসেনাত যোগদান কৰাৰ সিদ্ধান্ত লয়।
শনিবাৰে পুৱা তেওঁ সেইটোতে ব্যস্ত হৈ আছিল। কিন্তু তাৰ পিছত আৰ এছ এছৰ কৰ্মীজনে অভিমানতে আত্মহত্যা কৰে। সমগ্ৰ বিষয়টোৰ আৰক্ষীয়ে তদন্ত অব্যাহত ৰাখিছে।
