দিল্লীত আন এক ভয়ানক হত্যাকাণ্ডৰ ঘটনা। নিজৰ লিভ-ইন পাৰ্টনাৰক নিৰ্মমভাৱে হত্যা কৰাৰ পিছত প্ৰেমিকজনে মৃতদেহটো গাড়ীত পেলাই থৈ শান্তিৰে শুবলৈ ঘৰলৈ যায়। দক্ষিণ-পশ্চিম দিল্লীৰ চাওলা অঞ্চলত মাজনিশা সংঘটিত হয় এই কৰুণ ঘটনা। জানিব পৰা মতে, মদ খোৱাক লৈ দুয়োৰে মাজত হোৱা উত্তপ্ত কাজিয়াৰ ফলতে ৪৪ বছৰীয়া মহিলাগৰাকীয়ে প্ৰাণ হেৰুৱায়।
আৰক্ষীৰ সূত্ৰ অনুসৰি মৃত মহিলাগৰাকীৰ সংগী হৈছে ৩৫ বছৰীয়া বীৰেন্দ্ৰ সিং। যোৱা দুবছৰ ধৰি দুয়োজনে লিভ-ইন ৰিলেছনত বাস কৰিছিল। বীৰেন্দ্ৰ নাজাফগড়ৰ বাসিন্দা। তেওঁৰ পত্নী আৰু সন্তানৰো খবৰ পোৱা গৈছে।
কেইমাহমান আগতে আগষ্ট মাহত বীৰেন্দ্ৰই চাওলাত তিনিমহলীয়া নতুন ঘৰ এটা কিনে। পালাম অঞ্চলৰ মহিলাগৰাকীৰ পুৰণি ঘৰটো বিক্ৰী কৰি পোৱা ধনেৰে সেই ঘৰটো ক্ৰয় কৰিছিল। সেই বিক্ৰীৰ পিছত বীৰেন্দ্ৰৰ লগত আৰু ২১ লাখ টকা আছিল, যিটো প্ৰায়ে দুয়োৰে মাজত অশান্তিৰ কাৰণ হৈ পৰিছিল।
ঘটনাৰ নিশা মদ্যপানক লৈ পুনৰ কাজিয়া আৰম্ভ হয়। আৰক্ষীৰ জেৰাৰ সময়ত বীৰেন্দ্ৰই স্বীকাৰ কৰে যে যেতিয়া মহিলাগৰাকীয়ে তেওঁক মদ্যপান কৰাত বাধা দিছিল তেতিয়া তেওঁ খঙত কিলাকুটিৰে ডিঙিত চেপি ধৰিছিল। তেওঁক মাৰি পেলায়। মহিলাগৰাকীৰ মুখত আঘাত আৰু আঁচোৰৰ চিন পোৱা গৈছে।
ইয়াৰ পিছত বীৰেন্দ্ৰই তেওঁৰ দুজন বন্ধু – এজন পুৰুষ আৰু এগৰাকী মহিলাক ফোন কৰি মৃতদেহটো আঁতৰাই পেলোৱাত সহায় কৰিবলৈ মাতে। দুজনে মিলি মৃতদেহটো তললৈ নমাই গাড়ীৰ পিছৰ চিটত থৈ দিয়ে।
বন্ধু দুজন যোৱাৰ কিছুসময়ৰ পাছত বীৰেন্দ্ৰই মৃতদেহটো লৈ সেই অঞ্চল এৰি যাবলৈ চেষ্টা কৰিছিল। কিন্তু অত্যধিক মদ্যপানৰ বাবে গাড়ী চলাব নোৱাৰিলে আৰু মাত্ৰ ১০০ মিটাৰ যোৱাৰ পিছতেই হাৰ মানে। তাৰ পাছত মৃতদেহটো গাড়ীত থৈ ঘৰলৈ উভতি আহে। আকৌ প্ৰচণ্ড মদ খোৱাৰ পিছত অৱশেষত তেওঁ টোপনিত লালকাল হৈ পৰে।
পিছদিনা পুৱাই ঘটনাটো ওচৰ-চুবুৰীয়াৰ দৃষ্টিগোচৰ হয়। সকলোৱে ভাবিছিল যে তেওঁলোক এহাল দম্পতী। ঘৰৰ সন্মুখত ৰখাই থোৱা এখন চুইফটৰ ভিতৰত মহিলাগৰাকীৰ মৃতদেহ পৰি থকা দেখি চুবুৰীয়াই লগে লগে আৰক্ষীক খবৰ দিয়ে। আৰক্ষী উপস্থিত হৈ গাড়ীৰ পিছফালৰ চিটৰ পৰা মৃতদেহটো উদ্ধাৰ কৰি লগে লগে ঘৰৰ ভিতৰত শুই থকা বীৰেন্দ্ৰক গ্ৰেপ্তাৰ কৰে।
বীৰেন্দ্ৰৰ দুই বন্ধুৰো সন্ধান চলাইছে আৰক্ষীয়ে। তেওঁলোকৰ ভূমিকা সন্দৰ্ভত তদন্ত আৰম্ভ কৰা হৈছে।
