উত্তপ্ত হৈ আছে কাৰ্বি আংলংৰ পৰিস্থিতি। শেহতীয়া হিংসাত্মক ঘটনাত দুজন লোকৰ মৃত্যু হোৱাৰ লগতে ৩৮ জন আৰক্ষী জোৱানসহ কমেও ৪৫ জন লোক আহত হোৱা বুলি প্ৰশাসনিক সূত্ৰই প্ৰকাশ কৰিছে। পৰিস্থিতি নিয়ন্ত্ৰণৰ বাবে সমগ্ৰ জিলাখনত ‘হাই এলাৰ্ট’ জাৰি কৰাৰ লগতে চিআৰপিএফৰ (CRPF) অতিৰিক্ত পাঁচটা কোম্পানী মোতায়েন কৰা হৈছে।
প্ৰশাসনৰ নিৰ্দেশ মৰ্মে ২৩ ডিচেম্বৰৰ সন্ধিয়াৰ পৰা কাৰ্বি আংলং আৰু পশ্চিম কাৰ্বি আংলং জিলাত মোবাইল ইণ্টাৰনেট সেৱা পৰৱৰ্তী নিৰ্দেশ নিদিয়া পৰ্যন্ত বন্ধ কৰি দিয়া হৈছে। ইয়াৰ উপৰি সমগ্ৰ জিলাখনত ভাৰতীয় নাগৰিক সুৰক্ষা সংহিতা (BNSS)ৰ ১৬৩ ধাৰা আৰোপ কৰি পাঁচজন বা ততোধিক লোকৰ সমাৱেশ নিষিদ্ধ কৰা হৈছে। লগতে সন্ধিয়া ৫ বজাৰ পৰা পুৱা ৬ বজালৈ সান্ধ্য আইন সদৃশ নিষেধাজ্ঞাও জাৰি কৰা হৈছে।
আৰক্ষীৰ সূত্ৰই জনোৱা মতে, উত্তেজিত জনতাই অগ্নিসংযোগ কৰা এটা অট্টালিকাৰ ভিতৰৰ পৰা সুৰেশ দে (২৫) নামৰ এজন বিশেষভাৱে সক্ষম যুৱকৰ মৃতদেহ উদ্ধাৰ কৰিছে। আনহাতে, সংঘৰ্ষৰ সময়ত অথিক তিমুং নামৰ আন এজন লোকৰো মৃত্যু হয়।
উল্লেখ্য যে, কাৰ্বি আংলঙৰ সংৰক্ষিত চৰণীয়া পথাৰসমূহৰ পৰা অবৈধ বেদখলকাৰীক উচ্ছেদ কৰাৰ দাবীত দীৰ্ঘদিন ধৰি খেৰণিৰ পৰিৱেশ উত্তপ্ত হৈ আছিল। এই উচ্ছেদৰ দাবীতেই খেৰণিৰ ফেলাংপিত স্থানীয় ৰাইজে গ্ৰহণ কৰা অনিৰ্দিষ্টকালীন আমৰণ অনশন কাৰ্যসূচীয়ে ইতিমধ্যে ১৫ দিন অতিক্ৰম কৰা সময়ছোবাৱাতে নিশা অনশনস্থলীৰ পৰা আৰক্ষীয়ে একাংশ প্ৰতিবাদকাৰীক বলপূৰ্বক উঠাই লৈ যায়। ইয়াৰ পিছতে পৰিস্থিতিৰ অধিক অৱনতি ঘটে। আটক কৰা প্ৰতিবাদকাৰীসকলক শীঘ্ৰে মুকলি কৰি দিয়াৰ দাবীত আজি হাজাৰ হাজাৰ স্থানীয় লোকে খেৰণিৰ পথ অৱৰোধ কৰি তীব্ৰ প্ৰতিবাদ সাব্যস্ত কৰিছিল, ইয়াৰ পিছতে পৰিস্থিতি অৱনিতি ঘটে। চৰকাৰে উচ্ছেদৰ সন্দৰ্ভত কোনো ফলপ্ৰসূ আলোচনা নকৰা পৰ্যন্ত তেওঁলোকৰ এই আন্দোলন অব্যাহত থাকিব বুলি প্ৰতিবাদকাৰীসকলে হুংকাৰ দিছে।
