তামিলনাডুত এক চাঞ্চল্যকৰ ঘটনা সংঘটিত হৈছে। চাৰিজন কিশোৰে এজন প্ৰব্ৰজিত শ্ৰমিকক দাৰে আক্ৰমণ কৰি গুৰুতৰভাৱে আহত কৰে। চেন্নাইৰ সমীপত এখন উপনগৰীয় ৰে’লত (Suburban Train) সংঘটিত হোৱা এই আক্ৰমণৰ ভিডিঅ’ সামাজিক মাধ্যমত ভাইৰেল হোৱাৰ পিছতে তীব্ৰ প্ৰতিক্ৰিয়াৰ সৃষ্টি হৈছে। আৰক্ষীয়ে ইতিমধ্যে এই ঘটনাৰ সৈতে জড়িত চাৰিজন কিশোৰক গ্ৰেপ্তাৰ কৰিছে, যাৰ আটাইকেইজনৰ বয়স ১৭ বছৰ বুলি নিশ্চিত কৰা হৈছে।
আৰক্ষীৰ তথ্য অনুসৰি, তিৰুথানী অভিমুখী এখন ৰে’লৰ ভিতৰত প্ৰথমে কিশোৰৰ দলটোৱে মহাৰাষ্ট্ৰৰ পৰা অহা প্ৰব্ৰজিত শ্ৰমিকজনক হাৰাশাস্তি কৰে। ইয়াৰ পিছত তেওঁক ৰে’লৰ পৰা জোৰকৈ নমাই নি এটা নিৰ্জন স্থানত দাৰে উপৰ্যুপৰি আক্ৰমণ কৰে। গুৰুত্বপূৰ্ণ কথাটো হ’ল, এজন অভিযুক্ত কিশোৰে এই আক্ৰমণৰ দৃশ্য কেমেৰাত আৱদ্ধ কৰি তামিল গীতৰ সৈতে ইনষ্টাগ্ৰামত ‘ৰিল’ হিচাপে পোষ্ট কৰিছিল। ভিডিঅ’টোত এজন কিশোৰে আক্ৰমণৰ পিছত বিজয়ৰ চিন (Victory sign) দেখুওৱাও পৰিলক্ষিত হৈছে।
গুৰুতৰ ৰক্তক্ষৰণৰ ফলত আহত শ্ৰমিকজন বৰ্তমান থিৰুভাল্লুৰ চৰকাৰী চিকিৎসালয়ত চিকিৎসাধীন হৈ আছে। আৰক্ষীয়ে অভিযান চলাই আটক কৰা চাৰিজন কিশোৰৰ ভিতৰত তিনিজনক চেংগালপট্টুৰস্থিত কিশোৰ সংশোধন কেন্দ্ৰলৈ (Juvenile Home) প্ৰেৰণ কৰিছে। আনহাতে, এজনক পঢ়া-শুনাৰ স্বাৰ্থত চৰ্তসাপেক্ষ জামিন প্ৰদান কৰা হৈছে।
এই ঘটনাক লৈ ৰাজ্যখনত তীব্ৰ ৰাজনৈতিক তৰ্কৰ সৃষ্টি হৈছে। কংগ্ৰেছ সাংসদ কাৰ্তি চিদাম্বৰমে প্ৰব্ৰজনকাৰীৰ সুৰক্ষাৰ বাবে ৰে’লসমূহত অধিক আৰক্ষী মোতায়েন কৰিবলৈ আহ্বান জনাইছে। আনহাতে, বিৰোধী এআইএডিএমকে (AIADMK) নেতা কোভাই সাথিয়ানে ৰাজ্যখনত বৃদ্ধি পোৱা ড্ৰাগছৰ প্ৰচলন আৰু চৰকাৰৰ ব্যৰ্থতাক দোষাৰোপ কৰিছে। শাসকীয় ডিএমকে (DMK) নেতা টি কে এছ এলাংগোভানে ঘটনাটোক দুৰ্ভাগ্যজনক বুলি অভিহিত কৰি আৰক্ষীৰ তৎপৰতাক প্ৰশংসা কৰে।
