ফুৰিবলৈ গৈ মৰ্মান্তিক পৰিণতি ঘটিল কেৰালাৰ পৰা অহা দুজন পৰ্যটকৰ। বৰফাবৃত হ্ৰদত ফুৰিবলৈ গৈ ভৰি পিছলি পানীত পৰি তাৰে এজনৰ মৃত্যু ঘটে। তেওঁক বচাবলৈ গৈ সেই পানীতে উটি যায় আন এজনে।
শুকুৰবাৰে বিয়লি অৰুণাচল প্ৰদেশৰ টাৱাং জিলাৰ ছেলা হ্ৰদত সংঘটিত হয় এই ঘটনা। জানিব পৰা মতে, কেৰালাৰ পৰা অৰুণাচল প্ৰদেশলৈ গৈছিল এটা ৭ জনীয়া পৰ্যটকৰ দল। দলটোৰ সদস্য ডিনু (২৬)ৰ বৰফে ঢকা ছেলা হ্ৰদত ফুৰিবলৈ গৈ মৃত্যু হয়। তেওঁৰ মৃতদেহ উদ্ধাৰ কৰা হৈছে যদিও উটুৱাই নিয়া মহাদেৱ (২৪)ক এতিয়াও বিচাৰি পোৱা নাই।
সূত্ৰ অনুসৰি, শুকুৰবাৰে কেৰালাৰ পৰা অহা পৰ্যটকৰ দলটোৱে ছেলা হ্ৰদত ফুৰি আছিল। সেই সময়ত তেওঁলোকৰ দলৰ এজন সদস্য পানীত পৰিল। ডিনু আৰু মহাদেৱে তেওঁক উদ্ধাৰ কৰিবলৈ পানীত জপিয়াই পৰে। ডিনু আৰু মহাদেৱে পতিত ব্যক্তিজনক উদ্ধাৰ কৰিলেও তেওঁলোক পানীৰ পৰা উঠি আহিব নোৱাৰিলে। বহু চেষ্টাৰ অন্তত হ্ৰদৰ পানীৰ পৰা উদ্ধাৰ হয় ডিনুৰ মৃতদেহ। কিন্তু মহাদেৱক এতিয়াও উদ্ধাৰ কৰিব পৰা নাই।
আৰক্ষী অধীক্ষক ডি ডব্লিউ থংগনে জনোৱা মতে, শুকুৰবাৰে বিয়লি প্ৰায় ৩ বজাত এই ঘটনাৰ খবৰ পোৱা গৈছিল। লগে লগে জিলা আৰক্ষী, কেন্দ্ৰীয় বাহিনী আৰু দুৰ্যোগ ব্যৱস্থাপনা বাহিনীয়ে যৌথ অভিযান আৰম্ভ কৰে। প্ৰতিকূল বতৰ আৰু কম দৃশ্যমানতাৰ মাজতো উদ্ধাৰ কৰা হয় এজন পৰ্যটকৰ মৃতদেহ। কিন্তু আন্ধাৰৰ বাবে আনজন পৰ্যটকৰ মৃতদেহ উদ্ধাৰ কৰিব পৰা নগ’ল। শনিবাৰে পুৱাৰে পৰা পুনৰ আৰম্ভ হৈছে অনুসন্ধান অভিযান।
ডিনুৰ মৃতদেহ জং কমিউনিটি হেল্থ চেণ্টাৰত ৰখা হৈছে। আৰক্ষীয়ে জনোৱা মতে, শনিবাৰে মৰণোত্তৰ পৰীক্ষা কৰা হ’ব। থংগনে কয় যে ছেলা হ্ৰদ অঞ্চলৰ কেইবাটাও ঠাইত পৰ্যটকক সকীয়াই ফলক দিয়া হৈছে। শীতকালত হ্ৰদটোৰ চাৰিওফালে ঘূৰি ফুৰাটো বিপজ্জনক, যিকোনে সময়তে বিপদ ঘটিব পাৰে।
