যেতিয়ালৈকে কোহলি ক্ৰীজত থাকে তেতিয়ালৈকে আশা জীয়াই থাকে। তেওঁ এতিয়াও ৰাণৰ লক্ষ্য অনুসৰণত ‘চেজমাষ্টাৰ’। অৱশ্যে প্ৰতিখন মেচতে সেয়া সম্ভৱ নহয়। দেওবাৰে ইন্দোৰত তৃতীয়খন এদিনীয়াত নিউজিলেণ্ডৰ বিৰুদ্ধে নোৱাৰিলে। দুজনমান খেলুৱৈয়ে তেওঁক ৰানৰ পাহাৰ অতিক্ৰম কৰাত সংগ দিলে যদিও সেয়া যথেষ্ট নাছিল।
কোহলি ১২৪ ৰানত আউট হৈছিল। আৰু তাৰ পিছত ভাৰতে ৪১ ৰাণত পৰাস্ত হয় মেচখনত। ৩৩৮ ৰানৰ লক্ষ্য খেদি ভাৰতৰ ইনিংছ ২৯৬ ৰানত সমাপ্ত হয়। শৃংখলাত ২-১ ব্যৱধানত পৰাস্ত হয় শুভমন গিল বাহিনী। এইবাৰ প্ৰথম ভাৰতৰ মাটিত শৃংখলা জয় কৰিলে নিউজিলেণ্ডে। কোহলীৰ ফৰ্মৰ বাহিৰে বহু প্ৰশ্নৰ অৱতাৰণাৰে আৰম্ভ হ’ল ভাৰতীয় ক্ৰিকেটৰ বছৰটো।
প্ৰথম প্ৰশ্ন অৱশ্যেই বলিং। যশপ্ৰীত বুমৰাহ অবিহনে এই দলটোৰ বলিঙৰ ওপৰত কিবা আত্মবিশ্বাস আছেনে? অৰ্শদীপ সিং আৰু হৰ্ষিত ৰানাহঁতে ৩টা উইকেট দখল কৰে যদিও তেওঁলোকে ৰান দিলে প্ৰচুৰ। মহম্মদ ছিৰাজে আনসকলতকৈ কম ৰান দিছিল। আন এখন খেলত উইকেটহীন হৈ থাকিল ৰবীন্দ্ৰ জাডেজা। এই শৃংখলাৰ পিছত অৱশ্যে জাদেজাৰ এদিনীয়া ভৱিষ্যতক লৈ চৰ্চা হোৱাটো নিশ্চিত। অক্ষৰ পেটেলৰ দৰে ক্ৰিকেটাৰসকলে বহি সুযোগৰ বাবে অপেক্ষা কৰি আছে। কুলদীপ যাদৱে অলপ চাপ পৰিলেই নিজৰ লাইন পাহৰি যায়। মুঠতে বলিঙৰ অনুশাসনৰ অভাৱ।
ডেৰিল মিচেল আৰু গ্লেন ফিলিপছে ইয়াৰ সুবিধা লোৱাত অলপো ভুল কৰা নাছিল। এই মুহূৰ্তত কেৰিয়াৰৰ শ্ৰেষ্ঠ ফৰ্মত আছে মিচেল। এইখন খেলত তেওঁ ১৩১টা বলত ১৩৭ ৰান সংগ্ৰহ কৰে। আনহাতে, গ্লেন ফিলিপছে ৮৮টা বলত ১০৬ ৰান সংগ্ৰহ কৰে। ৫ ৰানত ২ উইকেটৰ পৰা কিউইৰ ইনিংছ শেষ হয় ৩৩৭ ৰাণত।
এই ৰান খেদি জয়ী হোৱা কঠিন। অৱশ্যে ভাৰতৰ তাৰকাৰে ভৰা বেটিঙৰ বাবে সেয়া অসম্ভৱো নহয়। কিন্তু হঠাৎ ৰোহিত শৰ্মাই হেৰুৱাই পেলাইছে বিস্ফোৰক ছন্দ। তেওঁ সাৱধানে খেলি আছে। দলত নিজৰ স্থানক লৈ এতিয়াও সন্দেহ আছে নেকি? যিয়েই নহওক, ই দল আৰু হিটমেন দুয়োটাকে ক্ষতি কৰিছে। দেওবাৰে তেওঁ মাত্ৰ ১১ ৰান সংগ্ৰহ কৰি উভতি আহে। গোটেই শৃংখলাটোত তেওঁ ৰান কৰিব পৰা নাছিল।
অধিনায়ক শুভমন গিল (২৩)ৰ ক্ষেত্ৰতো একেই কথা। প্ৰশ্ন উত্থাপন হ’ব, এদিনীয়া মেচত ভাৰতক নেতৃত্ব দিবলৈ তেওঁ সাজু নে? কাৰণ, আগতে ৰোহিত-কোহলী-ধোনীয়ে সন্মুখৰ পৰা নেতৃত্ব দিছিল। ফিল্ডিং কৰাৰ সময়ত তেওঁলোক উৎসাহ দিছিল। লগতে ৰানো কৰিছিল। গিলে দুয়োটাৰে কোনোটোৱেই কৰা নাই।
এতিয়া প্ৰশ্ন হয়, কোহলিক সংগ দিব কোনে? শ্ৰেয়াছ আয়াৰেও ছন্দ হেৰুৱাইছে। ডাঙৰ আঘাতৰ পৰা উভতি অহাৰ পিছত প্ৰথমখন এদিনীয়াত তেওঁ ৰান সংগ্ৰহ কৰিছিল। বাকী দুখন এদিনীয়াত তেওঁ বেট নীৰৱ হৈ পৰিল। দেওবাৰে মাত্ৰ ১ ৰানত আউট হৈছিল কে এল ৰাহুল। ডাঙৰ ৰান অনুসৰণত পাৰ্টনাৰশ্বিপৰ প্ৰয়োজন। এফালে কোহলি, আৰু আনফালে কেৱল অহাযোৱা। পাৰ্টনাৰশ্বিপেই গঢ়ি নুঠিল।
বেটিঙৰ লগতে বলিঙৰ ক্ষেত্ৰতো জাদেজাই সংগ্ৰাম অব্যাহত ৰাখিছে। বৰঞ্চ গম্ভীৰৰ দুই ‘প্ৰিয়’ খেলুৱৈ তৰুণ যুৱক নীতিশ কুমাৰ ৰেড্ডী আৰু হৰ্ষিত ৰাণাই অৰ্ধশতক অৰ্জন কৰি যুঁজখন অব্যাহত ৰাখে। বিশেষকৈ হৰ্ষিতৰ কথা উল্লেখ কৰিব লাগিব। তেওঁ নিজকে অল ৰাউণ্ডাৰ কৰি তুলিছে। তেওঁ ডাঙৰ শ্বট মাৰিব পাৰে। তেওঁ দিয়া ৰানৰ ক্ষতিপূৰণ কৰিবলৈ চেষ্টা কৰিছে।
আৰু কোহলি। আজিও তেওঁ ভাৰতীয় ক্ৰিকেটৰ অকলশৰীয়া যোদ্ধা। কোনে বা কিছুমানে মাজে মাজে বিৰাট কোহলিক বাদ দিবলৈ চেষ্টা কৰিছিল। বাদ? বিৰাটৰ এটাই মতাদৰ্শ – ৰান কৰা, সমালোচকসকলৰ স্বয়ংক্ৰিয়ভাৱে মুখ বন্ধ হৈ যাব।
দেওবাৰে কোহলিৰ ১০৮ বলত ১২৪ ৰানৰ ইনিংছৰ পৰা তৰণ ক্ৰিকেটাৰে চাপ চম্ভালিবলৈ শিকিব পাৰিব। বিনিময়ত প্ৰতিপক্ষৰ ওপৰত কেনেকৈ চাপ দিব পাৰি তাকো শিকিব। ৩৭ বছৰীয়া কোহলিৰ ষ্ট্ৰাইক ৰোটেত কৰাত আছে বিচক্ষণতা। এতিয়াও তেওঁ বাউণ্ডেৰীৰ বাহিৰত বল পঠিওৱাত সমানেই পাকৈত। কেৰিয়াৰৰ ৮৫ সংখ্যক আন্তঃৰাষ্ট্ৰীয় শতক কৰাতো তেওঁ ১০টা ছয় আৰু ৩টা ছয় মাৰে।
কিন্তু ক্ৰিকেট এজনৰ খেল নহয়। হয়তো প্ৰশিক্ষক গৌতম গম্ভীৰে সেই কথা বুজি পাব। যদি তেওঁ নাপায় তেন্তে ২০২৭ চনৰ বিশ্বকাপৰ সপোন দেখাটো হয়তো দেশৰ ক্ৰিকেট অনুৰাগীৰ বাবে এক বিলাসীতা হৈ পৰিব পাৰে।
সংক্ষিপ্ত স্কোৰঃ
নিউজিলেণ্ডঃ ৩৩৭/৮ (মিচেল ১৩৭, ফিলিপছ ১০৬, অৰ্শদীপ ৬৩/৩)
ভাৰতঃ ২৯৬/১০ (কোহলি ১২৪, নীতিশ ৫৩, কৃষ ক্লাৰ্ক ৫৪/৩)
৪১ ৰানত পৰাস্ত ভাৰত।
নিউজিলেণ্ডে ২-১ ব্যৱধানত জয়লাভ কৰে এই শৃংখলা।
