দেশত ছচিয়েল মিডিয়াৰ ক্ৰমবৰ্ধমান প্ৰভাৱ আৰু ইয়াৰ নেতিবাচক দিশসমূহক লৈ চিন্তিত হৈ পৰিছে কেন্দ্ৰ চৰকাৰ। শেহতীয়াকৈ ভাৰতৰ মুখ্য অৰ্থনৈতিক উপদেষ্টা ভি অনন্ত নাগেশ্বৰণে বাৰ্ষিক অৰ্থনৈতিক সমীক্ষাত এক গুৰুত্বপূৰ্ণ পৰামৰ্শ আগবঢ়াইছে।
তেওঁ কয় যে শিশু আৰু কিশোৰসকলৰ মাজত ছচিয়েল মিডিয়াৰ ব্যৱহাৰ নিয়ন্ত্ৰণ কৰিবলৈ এটা নিৰ্দিষ্ট বয়সৰ সীমা থকাটো প্ৰয়োজনীয়। বিশেষকৈ কম বয়সীয়া ব্যৱহাৰকাৰীসকলে ইন্টাৰনেটত থকা হানিকাৰক বিষয়বস্তুৰ দ্বাৰা সহজে প্ৰভাৱিত হ’ব পাৰে বুলি তেওঁ সতৰ্ক কৰি দিয়ে। এই ক্ষেত্ৰত কেৱল চৰকাৰেই নহয় বৰঞ্চ পৰিয়ালবোৰেও গুৰুত্বপূৰ্ণ ভূমিকা পালন কৰি সন্তানক নিয়ন্ত্ৰণ কৰিব লাগিব বুলি তেওঁ উল্লেখ কৰে।
মুখ্য অৰ্থনৈতিক উপদেষ্টাগৰাকীৰ মতে ছচিয়েল মিডিয়া প্লেটফৰ্মবোৰে ব্যৱহাৰকাৰীৰ বয়স সঠিকভাৱে পৰীক্ষা কৰাৰ বাবে কঠোৰ নিয়ম মানি চলিব লাগে। তেওঁ অভিযোগ কৰে যে বিভিন্ন কোম্পানীয়ে এনেধৰণৰ কৌশল ব্যৱহাৰ কৰে যাৰ ফলত এজন যুৱকে অধিক সময় এপসমূহতে অতিবাহিত কৰিবলৈ বাধ্য হয়। এই ধৰণৰ আসক্তিৰ ফলত ১৫ ৰ পৰা ২৪ বছৰীয়া তৰুণ প্ৰজন্মৰ মাজত টোপনি কম হোৱা আৰু মনোযোগ দিয়াৰ ক্ষমতা হ্ৰাস পোৱা আদি সমস্যাবোৰ দেখা গৈছে। ইয়াৰ ফলত তেওঁলোকৰ পঢ়া-শুনা আৰু কৰ্মক্ষেত্ৰত নেতিবাচক প্ৰভাৱ পৰিছে বুলিও সমীক্ষাত কোৱা হৈছে।
বিশ্বৰ ভিতৰতে ভাৰত এতিয়া স্মাৰ্টফোন আৰু ইণ্টাৰনেট ব্যৱহাৰৰ এক অন্যতম বৃহৎ বজাৰ হৈ পৰিছে। এক তথ্য অনুসৰি ভাৰতত বৰ্তমান ফেচবুক আৰু ইনষ্টাগ্ৰামৰ দৰে এপৰ ব্যৱহাৰকাৰীৰ সংখ্যা কোটিৰ ঘৰত।
ইয়াৰ আগতে ডেনমাৰ্ক, অষ্ট্ৰেলিয়া আৰু ফ্ৰান্সৰ দৰে দেশসমূহে নাবালকৰ বাবে ছচিয়েল মিডিয়া ব্যৱহাৰত নিষেধাজ্ঞা আৰোপ কৰিছে। ভাৰত চৰকাৰেও এতিয়া সেই পথ অনুসৰণ কৰাৰ সম্ভাৱনা আছে। যদিও এই পৰামৰ্শসমূহ এতিয়ালৈকে বাধ্যতামূলক হোৱা নাই কিন্তু চৰকাৰৰ নীতি নিৰ্ধাৰণৰ ক্ষেত্ৰত ইয়াৰ প্ৰভাৱ দেখা যাব পাৰে।
ইতিমধ্যে গোৱা আৰু অন্ধ্ৰপ্ৰদেশৰ দৰে ৰাজ্যসমূহে এই বিষয়টোত গুৰুত্ব দিছে। অন্ধ্ৰপ্ৰদেশৰ তথ্য প্ৰযুক্তি মন্ত্ৰী নৰা লোকেশে জনাইছে যে ছচিয়েল মিডিয়াৰ অত্যাধিক ব্যৱহাৰে শিশুসকলৰ শৈক্ষিক দিশত ক্ষতি কৰিছে আৰু ৰাজ্য চৰকাৰে ইয়াৰ বাবে এক আইনী গাঁথনি তৈয়াৰ কৰাৰ কথা ভাবিছে।
আনহাতে মেটাৰ দৰে কোম্পানীসমূহে এই বিষয়ত কৈছে যে চৰকাৰে নিষেধাজ্ঞা আৰোপ কৰাৰ পৰিৱৰ্তে অভিভাৱকৰ তত্বাৱধানৰ ওপৰত অধিক জোৰ দিয়া উচিত যাতে কিশোৰসকলে কোনো অনিয়ন্ত্ৰিত আৰু অসুৰক্ষিত ছাইটৰ দিশে ঢাল নাখায়।
অৱশ্যে একাংশ বিশেষজ্ঞই এই সন্দৰ্ভত বিপৰীত মত পোষণ কৰিছে। তেওঁলোকৰ মতে কেৱল বয়সৰ সীমা নিৰ্ধাৰণ কৰি এই সমস্যা সমাধান কৰা সম্ভৱ নহয় কাৰণ শিশুসকলে ভুৱা পৰিচয় দি সহজেই এই নিয়মবোৰ আওকাণ কৰিব পাৰে। ইয়াৰ পৰিৱৰ্তে কেনেকৈ সুৰক্ষিতভাৱে ইন্টাৰনেট ব্যৱহাৰ কৰিব পাৰি সেই বিষয়ে সচেতনতা সৃষ্টি কৰাটোহে অধিক গুৰুত্বপূৰ্ণ বুলি তেওঁলোকে মত প্ৰকাশ কৰিছে।
চৰকাৰ আৰু ছচিয়েল মিডিয়া কোম্পানীবোৰৰ মাজত কন্টেন্ট নিয়ন্ত্ৰণক লৈ চলি থকা দীৰ্ঘদিনীয়া সংঘাতৰ মাজতে এই নতুন প্ৰস্তাৱে দেশজুৰি এক চৰ্চাৰ সৃষ্টি কৰিছে।
