দেওবাৰে গোলাঘাট চহৰত অসম প্ৰদেশ যুৱ কংগ্ৰেছৰ উদ্যোগত এক বিশাল ‘জাতি বচাওক, মাটি বচাওক’ পদযাত্ৰা উলিয়াই। এই কাৰ্যসূচীত এপাচিচি (APCC) সভাপতি গৌৰৱ গগৈ, বিধানসভাৰ বিৰোধী দলপতি দেৱব্ৰত শইকীয়া, বিধায়ক ভাস্কৰ বৰুৱা আৰু যুৱ কংগ্ৰেছৰ সভাপতি জুবেৰ আনামৰ লগতে হাজাৰ হাজাৰ লোকৰ অংশগ্ৰহণ কৰে।
পদযাত্ৰাৰ অন্তত অনুষ্ঠিত হোৱা এক বিশাল জনসভাত গৌৰৱ গগৈয়ে ৰাজ্য চৰকাৰক তীব্ৰ সমালোচনা কৰে। তেওঁ অভিযোগ কৰে যে বৰ্তমানৰ চৰকাৰে খিলঞ্জীয়াসকলৰ ভূমি “মামা-মামী, আম্বানী-আদানি আৰু পতঞ্জলি”ক গতাই দিছে। গগৈয়ে সকীয়াই দিয়ে যে যদিহে হিমন্ত বিশ্ব শৰ্মা পুনৰ মুখ্যমন্ত্ৰী হয়, তেন্তে খিলঞ্জীয়াৰ হাতত নিজৰ মাটি এধানিও বাকী নাথাকিব।
গৌৰৱ গগৈয়ে চৰকাৰী বিদ্যালয়সমূহ বন্ধ কৰা কাৰ্যক তীব্ৰ ভাষাৰে গৰিহণা দিয়ে। তেওঁ অভিযোগ কৰে যে চাহ জনজাতি আৰু মিচিং অধ্যুষিত অঞ্চলসমূহত বিদ্যালয়সমূহ বন্ধ কৰি তাৰ বিপৰীতে সুৰাৰ দোকান খোলা হৈছে। ড্ৰাগছ আৰু সুৰাৰ প্ৰসাৰে সমাজক ধ্বংসৰ মুখলৈ ঠেলি দিয়া বুলি তেওঁ মন্তব্য কৰে।
যুৱ প্ৰজন্মৰ সংস্থাপনৰ বিষয়ে উল্লেখ কৰি গগৈয়ে কয় যে ৰাজ্যত নিবনুৱাৰ বাবে চাকৰি নাই যদিও কয়লা, বালি আৰু শিলৰ ছিণ্ডিকেট অবাধে চলি আছে। তেওঁ অভিযোগ কৰে যে গুৱাহাটীৰ ৪-৫ জন বিশেষ ঠিকাদাৰক সকলো চৰকাৰী ঠিকা অৰ্পণ কৰাৰ ফলত স্থানীয় সৰু ঠিকাদাৰসকল বিপৰ্যস্ত হৈ পৰিছে।
মুখ্যমন্ত্ৰীক লক্ষ্য কৰি গগৈয়ে কয় যে হিমন্ত বিশ্ব শৰ্মাই নিজকে এজন ‘ডাঙৰ হিন্দু নেতা’ বুলি পৰিচয় দিব বিচাৰে, কিন্তু প্ৰকৃততে তেওঁৰ কাম-কাজত কোনো হিন্দু মূল্যবোধ নাই। তেওঁ প্ৰশ্ন কৰে যে যিজন নেতাই গো-ছিণ্ডিকেটৰ পৰা ধন লয় বা জনজাতীয় লোকৰ ভূমি কাঢ়ি লয়, তেওঁ কেনেধৰণৰ হিন্দু নেতা হ’ব পাৰে? তদুপৰি, পদযাত্ৰাৰ সময়ত প্ৰধানমন্ত্ৰীৰ নাম কিছু বিতৰ্কিত বিষয়ৰ সৈতে সাঙুৰি ‘মোদী-এপষ্টেইন ভাই ভাই’ লিখিত পোষ্টাৰ আৰু বেনাৰ প্ৰদৰ্শন কৰা হয়।
গৌৰৱ গগৈয়ে শান্তি, সম্প্ৰীতি আৰু নৈতিকতাৰ ওপৰত ভিত্তি কৰি এখন ‘নতুন বৃহত্ অসম’ গঢ়াৰ আহ্বান জনায়। ভাষণৰ আৰম্ভণিতে তেওঁ গোলাঘাটৰ প্ৰয়াত কংগ্ৰেছ নেতা গোলাপ শইকীয়াক শ্ৰদ্ধাঞ্জলি জ্ঞাপন কৰে। সভাত এপাচিচি-ৰ কাৰ্যকৰী সভানেত্ৰী ৰোজলিনা তিৰ্কীকে ধৰি কেন্দ্ৰীয় আৰু ৰাজ্যিক পৰ্যায়ৰ কেইবাজনো নেতৃবৃন্দ উপস্থিত থাকে।
