দুৰাৰোগ্য কেঞ্চাৰ ৰোগত আক্ৰান্ত হৈ এখন ভৰি হেৰুৱাইও থমকি ৰোৱা নাই ঝাড়খণ্ডৰ এজন সাহসী জনজাতীয় যুৱক। নাম তেওঁৰ অমৰ হাছা পুৰ্তি। শেহতীয়াকৈ পাটিয়ালাত ২৯ জানুৱাৰীৰ পৰা ৩ ফেব্ৰুৱাৰীলৈ অনুষ্ঠিত হোৱা সপ্তম ৰাষ্ট্ৰীয় পেৰা আৰ্চাৰী চেম্পিয়নশ্বিপত ঝাড়খণ্ডক প্ৰতিনিধিত্ব কৰি অমৰে এক অনন্য নিদৰ্শন দাঙি ধৰিছে।
অষ্টম শ্ৰেণীত পঢ়ি থকা সময়ত আৰ. চি. বালক মিডল স্কুলৰ পেৰেড কমাণ্ডাৰ হিচাপে সক্ৰিয় হৈ থকাৰ সময়তে অমৰৰ দেহত ধৰা পৰিছিল কেঞ্চাৰ। চিকিৎসাৰ বাবে তেওঁ এখন ভৰি হেৰুৱাব লগা হয়। কেৱল শাৰীৰিক প্ৰত্যাহ্বানেই নহয়, চৰম দৰিদ্ৰতাৰ সৈতেও যুঁজি আছিল পৰিয়ালটোৱে। অমৰৰ ভগ্নী অনিতা হাছা পুৰ্তিৰ মতে, পৰিয়ালটোত কোনো উপাৰ্জনকাৰী ব্যক্তি নাছিল। পিতৃ দীৰ্ঘদিন ধৰি অসুস্থ আৰু ককায়েক অনিল হাছা পুৰ্তি মাওবাদী সংগঠন পি. এল. এফ. আই. (PLFI) ৰ সৈতে জড়িত হৈ পৰিছিল।
এসময়ত পঢ়া-শুনা কৰিবলৈ হাতত টকা নথকাৰ বাবে আৰু শাৰীৰিক অক্ষমতাৰ বাবে ভাঙি পৰা অমৰে আত্মহত্যাৰ দৰে চৰম সিদ্ধান্ত গ্ৰহণৰো চেষ্টা কৰিছিল। সেই সংকটকালত স্থানীয় সমাজকৰ্মী অজয় শৰ্মাই সহায়ৰ হাত আগবঢ়ায় আৰু ছচিয়েল মিডিয়াৰ জৰিয়তে অমৰৰ কাহিনীটো বিয়পাই দিয়ে। ইয়াৰ পিছতে স্থানীয় প্ৰশাসনেও সহায়ৰ বাবে আগবাঢ়ি আহে।
বিৰছা কলেজৰ অধ্যাপক ৰাজকুমাৰ গুপ্তাই অমৰৰ নামভৰ্তিৰ সম্পূৰ্ণ খৰচ বহন কৰে। ইয়াৰ মাজতে ধনুৰ্বিদ্যাৰ প্ৰশিক্ষক আশীষ কুমাৰৰ দৃষ্টিত পৰে অমৰৰ প্ৰতিভা। তেওঁ অমৰক খুন্টিৰ হোষ্টেলত থাকি ধনুৰ্বিদ্যাৰ অভ্যাস কৰাৰ ব্যৱস্থা কৰি দিয়ে।
হোষ্টেলত থকাৰ সময়তো আৰ্থিক সংকটৰ বাবে অমৰে এসাজ খোৱাৰ বাবেও কষ্ট কৰিবলগীয়া হৈছিল। সেই সময়ত স্থানীয় বিধায়ক সুদীপ গুড়িয়াই তেওঁক আৰ্থিক সহায় কৰে। ইয়াৰ পিছতে প্ৰশিক্ষক আশীষ কুমাৰে তেওঁক নেতাজী সুভাষ চন্দ্ৰ বসু ক্ৰীড়া কমপ্লেক্সলৈ লৈ যায় আৰু তেওঁৰ কঠিন পৰিশ্ৰমৰ ফলস্বৰূপে তেওঁ পাটিয়ালাত অনুষ্ঠিত হোৱা ৰাষ্ট্ৰীয় প্ৰতিযোগিতালৈ নিৰ্বাচিত হয়।
ৰাষ্ট্ৰীয় পেৰা আৰ্চাৰী চেম্পিয়নশ্বিপত অমৰে মিশ্ৰিত দ্বৈত শাখা (Mixed Doubles) ত পঞ্চম স্থান আৰু একক শাখা (Singles) ত ২৩ তম স্থান দখল কৰিবলৈ সক্ষম হয়।
অমৰৰ এই যাত্ৰাক প্ৰশংসা কৰি ৰাষ্ট্ৰীয় আৰ্চাৰী সন্থাৰ সভাপতি তথা কেন্দ্ৰীয় মন্ত্ৰী অৰ্জুন মুণ্ডাই কয় যে ধনুৰ্বিদ্যাৰ প্ৰসাৰৰ বাবে তেওঁলোকৰ সন্থাই সদায় কাম কৰি যাব। তেওঁ লগতে উল্লেখ কৰে যে জিলা আৰ্চাৰী সন্থাসমূহে স্থানীয় পৰ্যায়ত কাম কৰিলে ৰাষ্ট্ৰীয় সন্থাই ৰাষ্ট্ৰীয় আৰু আন্তঃৰাষ্ট্ৰীয় প্ৰতিযোগিতাৰ বাবে সকলো ধৰণৰ সহায় আগবঢ়াব।
