উত্তৰ প্ৰদেশৰ গাজিয়াবাদত এটা অত্যন্ত বেদনাদায়ক ঘটনা সংঘটিত হৈছে যিয়ে সমগ্ৰ দেশ কঁপাই তুলিছে। এটা আৱাসগৃহৰ নৱম মহলাৰ পৰা জপিয়াই তিনিগৰাকী কিশোৰী ভগ্নীয়ে একেলগে আত্মহত্যা কৰা ঘটনাই সকলোকে স্তম্ভিত কৰি দিছে। বুধবাৰে নিশা প্ৰায় ২ বজাত সংঘটিত হোৱা এই হৃদয়বিদাৰক কাণ্ডত ১২, ১৪ আৰু ১৬ বছৰীয়া তিনিগৰাকী ভগ্নীয়ে প্ৰাণ হেৰুৱায়। আৰক্ষীয়ে ঘটনাস্থলীৰ পৰা এখন আত্মহত্যাৰ টোকা আৰু ডায়েৰী উদ্ধাৰ কৰিছে য’ত তেওঁলোকে নিজৰ মনৰ দুখ আৰু অকলশৰীয়া অনুভৱৰ কথা লিখি থৈ গৈছে।
প্ৰাৰম্ভিক অৱস্থাত এই আত্মহত্যাৰ আঁৰত কোনো কোৰিয়ান গেমিং এপ জড়িত থকা বুলি সন্দেহ কৰা হৈছিল যদিও আৰক্ষীৰ তদন্তত এক নতুন দিশ উন্মোচিত হৈছে। আৰক্ষীৰ মতে এই ছোৱালীকেইগৰাকী কোৰিয়ান সংস্কৃতি আৰু মনোৰঞ্জনৰ দ্বাৰা গভীৰভাৱে প্ৰভাৱিত আছিল। তেওঁলোকৰ ডায়েৰীত কে-পপ সংগীত, কোৰিয়ান চিনেমা আৰু ধাৰাবাহিকৰ প্ৰতি থকা তীব্ৰ আকৰ্ষণৰ কথা উল্লেখ আছে। এই কিশোৰীকেইগৰাকী মোবাইল ফোন আৰু কোৰিয়ান কন্টেন্টৰ প্ৰতি ইমানেই আসক্ত হৈ পৰিছিল যে তেওঁলোকে যোৱা দুই-তিনি বছৰ ধৰি স্কুললৈ যোৱাও বন্ধ কৰি দিছিল।
ঘটনাৰ মূল কাৰণ হিচাপে জানিব পৰা গৈছে যে ছোৱালীকেইগৰাকীয়ে দিনটোৰ অধিকাংশ সময় মোবাইলতে ব্যস্ত থকাটো পিতৃ-মাতৃয়ে ভাল পোৱা নাছিল। তেওঁলোকৰ এই অতিমাত্ৰা আসক্তি দেখি পৰিয়ালে মোবাইল ফোনটো কাঢ়ি লৈছিল আৰু ফোন ব্যৱহাৰ কৰাত বাধা দিছিল। মোবাইল অবিহনে তেওঁলোকে নিজকে অতিশয় অকলশৰীয়া অনুভৱ কৰিছিল আৰু ইয়াৰ পৰিণতিতে তেওঁলোকে চৰম সিদ্ধান্ত গ্ৰহণ কৰে বুলি আৰক্ষী বিষয়া নিমিষ পাটিলে জানিবলৈ দিছে। তেওঁলোকৰ কোঠাৰ বেৰতো মই বৰ অকলশৰীয়া বুলি লিখা বাক্য উদ্ধাৰ হৈছে।
মৃত কিশোৰীকেইগৰাকীৰ পিতৃ চেতন কুমাৰৰ দুই পত্নীৰ পৰা মুঠ পাঁচটা সন্তান আছিল। আটাইকেইজন একেলগেই বাস কৰিছিল। উদ্ধাৰ হোৱা ডায়েৰীখনত তেওঁলোকে নিজৰ জীৱনৰ কাহিনী সঁচা বুলি লিখাৰ লগতে দেউতাকৰ ওচৰত ক্ষমা বিচাৰিছে। ডায়েৰীৰ পাতত এটা কান্দি থকা ইমোজি আঁকি তেওঁলোকে দেউতাকক উদ্দেশ্যি লিখিছিল যে তেওঁলোকৰ জীৱনটো অতি অকলশৰীয়া আছিল। আৰক্ষীয়ে ইতিমধ্যে মৃতদেহকেইটা মৰণোত্তৰ পৰীক্ষাৰ বাবে প্ৰেৰণ কৰিছে আৰু ঘটনাটোৰ অধিক তদন্ত চলাই আছে। চুবুৰীয়াই জনোৱা মতে গভীৰ নিশা এটা বিকট শব্দ শুনি তেওঁলোকে বাহিৰলৈ ওলাই আহিছিল আৰু এই ভয়ংকৰ দৃশ্য প্ৰত্যক্ষ কৰিছিল।
