এইবাৰ নতুন বিপদ লিম্পেট মাইন! হৰমুজত টেংকাৰত বৃহৎ আক্ৰমণ, ভিতৰত ২৭ জন ভাৰতীয় নাৱিক

হৰমুজত এক ভয়ংকৰ আক্ৰমণ সংঘটিত হৈছে। এইবাৰ সম্পূৰ্ণ নতুন ধৰণেৰে। ড্ৰোন আক্ৰমণ আৰু মিছাইল আক্ৰমণৰ পিছত এইবাৰ ব্যৱহাৰ কৰা হৈছে লিম্পেট মাইন। আমেৰিকা-ইৰাণৰ সংঘাত আৰম্ভ হোৱাৰ পৰাই হৰমুজ জলদ্বীপ অশান্ত হৈ পৰিছে। এই জলপথত ইখনৰ পিছত সিখন জাহাজক আক্ৰমণ কৰা হৈছে। আকৌ এবাৰ এই হৰমুজত এনে এক ঘটনা সংঘটিত হৈছে।

শুকুৰবাৰে (৩০ অক্টোবৰ) পানামাৰ পতাকা উৰুৱাই অহা এখন টেংকাৰ হৰমুজৰ মাজেৰে পাৰ হৈ গৈছিল। সেই সময়ত লিম্পেট মাইন এটাই এম টি লুইছ ১ত আঘাত কৰে। টেংকাৰখনত ২৭ জন ভাৰতীয় নাৱিক আছিল।

বাতৰি মতে, আমেৰিকা-ইৰাণৰ সংঘাত আৰম্ভ হোৱাৰ পিছত এইটোৱেই প্ৰথমবাৰৰ বাবে জাহাজত লিম্পেট মাইন ব্যৱহাৰ কৰা হৈছে। আগতে এনে চেষ্টা কৰা হৈছিল যদিও বিস্ফোৰকটোৰ বিস্ফোৰণ হোৱা নাছিল।

ভাৰতৰ কেন্দ্ৰীয় জাহাজ মন্ত্ৰী সৰ্বানন্দ সোণোৱালে এই খবৰ নিশ্চিত কৰি কয় যে বিস্ফোৰণৰ বাবে টেংকাৰখনৰ ইঞ্জিন ৰুমত জুই লাগিছিল যদিও ভাৰতীয় নাৱিকসকল ৰক্ষা পৰে।

লিম্পেট মাইন হৈছে এক প্ৰকাৰৰ বিস্ফোৰক, যিটো সাধাৰণতে জাহাজত চুম্বক বা আন কোনো পদ্ধতিৰে সংলগ্ন কৰা হয়। এই ধৰণৰ মাইন ব্যৱহাৰ কৰি জাহাজৰ ইঞ্জিনৰ কাষত বিস্ফোৰণ ঘটাই তাক ক্ষতিগ্ৰস্ত কৰা হয়।

এনে আক্ৰমণে সাগৰত চলি থকা বাণিজ্যিক জাহাজৰ বাবে এক বৃহৎ নিৰাপত্তাজনিত বিপদৰ ইংগিত দিয়ে। বাণিজ্যিক দৃষ্টিকোণৰ পৰা হৰমুজ জলদ্বীপ যথেষ্ট গুৰুত্বপূৰ্ণ। হৰমুজ জলদ্বীপ বিশ্বৰ অন্যতম গুৰুত্বপূৰ্ণ শক্তি পৰিবহণ পথ। এই জলপথৰ জৰিয়তে বৃহৎ পৰিমাণৰ খাৰুৱা তেল আৰু প্ৰাকৃতিক গেছ বিশ্বৰ বিভিন্ন দেশলৈ যায়। ফলত ইয়াত সামৰিক সংঘাত বা বাণিজ্যিক জাহাজত আক্ৰমণৰ প্ৰভাৱ সমগ্ৰ বিশ্বৰ বাবে আতংকৰ খবৰ। ইয়াৰ প্ৰভাৱে আন্তঃৰাষ্ট্ৰীয় শক্তি বজাৰ আৰু সামগ্ৰী পৰিবহণত প্ৰভাৱ পেলাব পাৰে।

এটা সময়ত দুয়োখন দেশৰ সংঘাতৰ বাবে হৰমুজৰ মাজেৰে যাতায়ত বহুদিন বন্ধ হৈ আছিল। এতিয়া বিভিন্ন দেশৰ টেংকাৰ এই গুৰুত্বপূৰ্ণ জলপথৰ মাজেৰে চলাচল কৰিছে আৰু নাৱিকসকলে নিজৰ জীৱন বিপন্ন কৰি এই পথটো পাৰ হৈ গৈছে।

এম টি লুইছ ১ বিমানত হোৱা আক্ৰমণে হৰমুজ জলদ্বীপত বাণিজ্যিক জাহাজৰ সুৰক্ষাক লৈ নতুন প্ৰশ্নৰ উত্থাপন কৰিছে। অৱশ্যে এই আক্ৰমণৰ আঁৰত কোন আছে সেয়া এতিয়াও স্পষ্ট হোৱা নাই। কিন্তু জনা গৈছে যে ব্যৱসায়িক জাহাজখনত এখন সৰু নাৱে মাইন লগাই দ্ৰুতগতিত আঁতৰি যায়। আৰু তাৰপিছতে লিম্পেট মাইনটো বিস্ফোৰণ ঘটে আৰু জাহাজৰ ইঞ্জিনত জুই লাগে।

⚠️ IMPORTANT UPDATE ⚠️

On Oct 29, Liberia-flagged VLCC MT ARZANAH, carrying 2 Indian nationals, and on Oct 30, Panama-flagged crude oil tanker MT LOUISE 1, carrying 27 Indian seafarers, were targeted in projectile attacks in the Strait of Hormuz.

All 29 Indian seafarers across both vessels are completely safe with no injuries.

We are continuously monitoring the situations & coordinating with the ship management companies to ensure the ongoing security and wellbeing of our crew.

— Sarbananda Sonowal (@sarbanandsonwal) October 30, 2026

সৌভাগ্যক্ৰমে জাহাজখনত থকা কোনোৱেই প্ৰাণ হেৰুৱাব লগা নহ’ল। ইয়াৰ পূৰ্বেও হৰমুজত কেইবাখনো জাহাজ আক্ৰমণ কৰা হৈছে। অৱশ্যে লিম্পেট মাইন ব্যৱহাৰ কৰি আক্ৰমণৰ বিষয়টোৱে উদ্বেগ বৃদ্ধি কৰিছে।