বৰ্তমান সময়ত জলবায়ুৰ পৰিবৰ্তনৰ লগতে চৌদিশে এক শুকান তথা ধূলিময় পৰিৱেশে বিৰাজ কৰিছে। বিশেষকৈ গুৱাহাটী মহানগৰীৰ চুকে-কোণে চলি থকা বিভিন্ন নিৰ্মাণ কাৰ্যৰ বাবে বতাহত ধূলিৰ পৰিমাণ অস্বাভাৱিকভাৱে বৃদ্ধি পাইছে। এই ধূলিময় পৰিৱেশৰ বাবে এতিয়া জনসাধাৰণৰ মাজত বিভিন্ন শ্বাস-প্ৰশ্বাসজনিত ৰোগে গা কৰি উঠিছে। গৰম আৰু ধূলিৰ কৱলৰ পৰা পৰিত্ৰাণ পাবলৈ এতিয়া যেন সকলোৱে কেৱল এজাক মুষলধাৰ বৰষুণৰ বাবে অপেক্ষা কৰিছে।
ধূলিয়ে আমাৰ স্বাস্থ্যৰ ওপৰত অতি ভয়াবহ প্ৰভাৱ পেলাব পাৰে। ই কেৱল শ্বাস-প্ৰশ্বাসৰে নহয়, আমাৰ চুলি আৰু ছালৰো যথেষ্ট ক্ষতি কৰে। ধূলিৰ বাবে চুলিত উফিৰ সমস্যা হোৱাৰ লগতে অত্যাধিক চুলি সৰা দেখা যায়। একেদৰে ধূলিয়ে আমাৰ চকুত বিভিন্ন সমস্যাৰ সৃষ্টি কৰিব পাৰে। চকুত ধূলি সোমালে কনজাংকটিভাইটিছ বা আই ফ্লু হোৱাৰ সম্ভাৱনা থাকে। বহু সময়ত চকুত ধূলি সোমালে আমি চকুটো জোৰকৈ মোহাৰি দিওঁ, যাৰ ফলত কৰ্নিয়াৰ আলচাৰ হোৱাৰ দৰে গুৰুতৰ আশংকাও থাকে। ইয়াৰ উপৰিও ধূলিৰ ফলত ডিঙিত এলাৰ্জিক লেৰিংজাইটিছ আৰু ছালৰ বিভিন্ন ৰোগ হ’ব পাৰে।
উশাহত ধূলি আমাৰ শৰীৰৰ ভিতৰত প্ৰৱেশ কৰিলে ই পোনপটীয়াকৈ হাওঁফাওঁৰ ওপৰত বিৰূপ প্ৰভাৱ পেলায়। ইয়াৰ ফলত কাঁহ, এজমা বা হাপানি আদিৰ দৰে সমস্যাই দেখা দিয়ে। যিসকল লোকৰ আগৰে পৰা এজমা বা হাওঁফাওঁৰ সমস্যা আছে, তেওঁলোকে এই সময়ছোৱাত বিশেষভাৱে সাৱধান হোৱাটো জৰুৰী। বিশেষ কাম নাথাকিলে ঘৰৰ পৰা বাহিৰলৈ নোলোৱাই ভাল। যদি কিবা জৰুৰী কামত বাহিৰলৈ যাবলগীয়া হয়, তেন্তে মাস্ক পৰিধান কৰাটো অতি প্ৰয়োজনীয়। বিশেষকৈ বয়োজ্যেষ্ঠ লোকসকলে এই ক্ষেত্ৰত অধিক সজাগ হোৱা উচিত।
শুকান বতৰৰ বাবে আমাৰ ছালখনো এই সময়ত নিস্তেজ আৰু খহটা হৈ পৰে। সেয়ে ছালৰ সুৰক্ষাৰ বাবে নিয়মিতভাৱে মইশ্চৰাইজাৰ ব্যৱহাৰ কৰিব লাগে। বাহিৰৰ পৰা ঘৰলৈ অহাৰ লগে লগে হাত-ভৰি আৰু মুখ ভালদৰে পৰিষ্কাৰ পানীৰে ধুব লাগে। শৰীৰটো সুস্থ কৰি ৰাখিবলৈ এই সময়ত প্ৰচুৰ পৰিমাণে পানী খোৱাৰ লগতে বতৰৰ সতেজ শাক-পাচলি আৰু ফল-মূল খোৱাৰ অভ্যাস কৰিব লাগে। এই সৰু সৰু সাৱধানতাসমূহ অৱলম্বন কৰিলে আমি ধূলিময় পৰিৱেশৰ মাজতো নিজৰ স্বাস্থ্যটো ভালে ৰাখিবলৈ সক্ষম হম।
