দিল্লী আৰক্ষীয়ে দেওবাৰে পীৰাগাৰহী উৰণীয়া সেতুত ৰখাই থোৱা এখন গাড়ীৰ পৰা তিনিজন লোকৰ মৃতদেহ উদ্ধাৰ কৰে। খবৰটো পোহৰলৈ অহাৰ লগে লগে অঞ্চলটোত চাঞ্চল্যৰ সৃষ্টি হয়।
প্ৰাথমিক সূত্ৰৰ পৰা অনুমান কৰা হৈছে যে বিষক্ৰিয়াৰ বাবে তেওঁলোকৰ মৃত্যু হ’ব পাৰে। ঘটনাস্থলীত ডকাইতি, চুৰি বা সংঘাতৰ কোনো স্পষ্ট চিন পোৱা নগ’ল। একে সময়তে আত্মহত্যাৰ তত্ত্বও আৰক্ষীৰ সন্দেহৰ তালিকাত আছে।
জানিব পৰা মতে, নিহতসকলৰ ভিতৰত এগৰাকী মহিলা আৰু এজন পুৰুষৰ বয়স প্ৰায় ৪০ বছৰ। তৃতীয়জন ব্যক্তিৰ বয়স প্ৰায় ৬০ বছৰ বুলি অনুমান কৰা হৈছে।
প্ৰত্যক্ষদৰ্শীয়ে সন্দেহ কৰি আৰক্ষীক খবৰ দিয়ে। পিচিআৰ কল পোৱাৰ পিছতে ততাতৈয়াকৈ ঘটনাস্থলীত উপস্থিত হয় আৰক্ষী। ৰখাই থোৱা গাড়ীখনৰ পৰা মৃতদেহ উদ্ধাৰ কৰাৰ পিছত তদন্তকাৰী দলে গাড়ীখন ভালদৰে পৰীক্ষা কৰে। তিনিওটা মৃতদেহ মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰা হৈছে।
এতিয়ালৈকে নিহতসকলৰ এজনৰ পৰিচয় নিশ্চিত কৰা হৈছে। বাকী দুজনক চিনাক্ত কৰাৰ প্ৰচেষ্টা অব্যাহত আছে।
তদন্তৰ সময়ত ঘটনাস্থলীত উপস্থিত আছিল আৰক্ষীৰ শীৰ্ষ বিষয়া। আৰক্ষীয়ে সঠিকভাৱে কি হৈছিল, আত্মহত্যা আছিল নে ইয়াৰ আঁৰত আন কিবা ৰহস্য আছে সেই সম্পৰ্কে তথ্যৰ বাবে অপেক্ষা কৰি আছে। মৰণোত্তৰ পৰীক্ষাৰ পিছতহে সকলো স্পষ্ট হ’ব বুলি এগৰাকী বিষয়াই জানিবলৈ দিয়ে।
