পথৰ দাঁতিত কম্বলত মেৰিয়াই থোৱা অৱস্থাত উদ্ধাৰ হয় এগৰাকী মহিলাৰ ক্ষত-বিক্ষত মৃতদেহ। আৰক্ষীয়ে তদন্তত নামি বহু জটিলতাৰ সন্মুখীন হ’বলগীয়া হৈছিল। কিন্তু কোনে জানিছিল যে ২৪ ঘণ্টাৰ ভিতৰতে হত্যাৰ ৰহস্য উদ্ঘটন হ’ব! সেয়া সম্ভৱ হয় কৃত্ৰিম বুদ্ধিমত্তা বা এআইৰ সৌজন্যত।
এই ঘটনা উত্তৰ প্ৰদেশৰ। যোৱা ৬ ফেব্ৰুৱাৰীত স্থানীয় এগৰাকী যুৱকে যমুনা এক্সপ্ৰেছৱেৰ খাণ্ডাউলী অঞ্চলত মহিলাগৰাকীৰ মৃতদেহ পৰি থকা দেখিছিল। এই তথ্য লাভ কৰি ঘটনাস্থলীত উপস্থিত হয় আৰক্ষী।
আৰক্ষীৰ সূত্ৰ অনুসৰি মহিলাগৰাকীৰ মুখ আৰু ডিঙিত গভীৰ আঘাতৰ চিন আছিল। কিন্তু তদন্তৰ সময়ত তেওঁৰ পৰিচয় একেবাৰেই জানিব পৰা হোৱা নাছিল। অৱশ্যে মহিলাগৰাকীৰ হাতত দুটা টেটু আছিল। যাৰ ওপৰত লিখা আছিল, ‘আৰ এছ’ আৰু ‘ছানি’। আৰক্ষীয়ে চিনাক্তকৰণৰ বাবে মৃতকৰ ফটোখন বিভিন্ন থানালৈ প্ৰেৰণ কৰে। কিন্তু কোনো উত্তৰ পোৱা নগ’ল।
এনে পৰিস্থিতিত তদন্তকাৰীয়ে কৃত্ৰিম বুদ্ধিমত্তাৰ সহায় লৈ তদন্তত সফল হ’ল। আৰক্ষীৰ সূত্ৰৰ পৰা জানিব পৰা মতে, মহিলাগৰাকীৰ মুখত গুৰুতৰভাৱে আঘাত পোৱাৰ বাবে চিনাক্ত কৰাটো কঠিন হৈ পৰে। ইয়াৰ পিছত মৃতদেহৰ ছবিখন এআই টুল এটাত দিয়া হয়। মৃত লোকজনৰ মুখৰ বৈশিষ্ট্য পুনৰ নিৰ্মাণ কৰা হয়। কেৱল সেয়াই নহয়, প্ৰযুক্তিৰ জৰিয়তে মৃতকৰ চকুও মেল খাইছিল। যাতে চিনাক্ত কৰাটো সহজ হৈ পৰে।
তাৰ পিছত মৃতকৰ নতুন ছবিখন বিভিন্ন স্থানত প্ৰচাৰিত হয়। তেতিয়া তদন্তকাৰীয়ে ছানি নামৰ এজন যুৱকৰ সন্ধান পায়। আৰক্ষীৰ সূত্ৰৰ পৰা জানিব পৰা মতে, জেৰাৰ সময়ত অভিযুক্তই দোষ স্বীকাৰ কৰে।
কিন্তু ছানিয়ে মহিলাগৰাকীক কিয় হত্যা কৰিলে? আৰক্ষীৰ দাবী যে জেৰাৰ সময়ত অভিযুক্তই জনায় যে ছানিয়ে মহিলাগৰাকীৰ সৈতে লিভ-ইনত আছিল। কিন্তু তেওঁ আৰু থাকিবলৈ ইচ্ছুক নাছিল। সেয়ে, অভিযুক্তই মহিলাগৰাকীক পথৰ পৰা আঁতৰাই পঠিয়াবলৈ তেওঁক হত্যা কৰে।
