ভাৰতীয় নিৰ্বাচন আয়োগে বুধবাৰে ১০ খন ৰাজ্যৰ খালী হ’বলগীয়া ৩৭ খন ৰাজ্যসভাৰ আসনৰ বাবে নিৰ্বাচনৰ সময়সূচী ঘোষণা কৰিছে। অহা এপ্ৰিল মাহত এই সদস্যসকলৰ কাৰ্যকাল সমাপ্ত হোৱাৰ পৰিপ্ৰেক্ষিতত এই নিৰ্বাচন অনুষ্ঠিত হ’ব বুলি এটা প্ৰেছ বিজ্ঞপ্তিৰ জৰিয়তে আয়োগে সদৰী কৰিছে।
নিৰ্বাচন আয়োগৰ তথ্য অনুসৰি অসম, মহাৰাষ্ট্ৰ, ওড়িশা, তামিলনাডু, পশ্চিম বংগ, বিহাৰ, ছত্তীশগড়, হাৰিয়ানা, হিমাচল প্ৰদেশ আৰু তেলেংগানাৰ পৰা নিৰ্বাচিত হোৱা ৩৭ জন সদস্যৰ কাৰ্যকাল অহা এপ্ৰিল মাহত অন্ত পৰিব। সেই অনুসৰি খালী হ’বলগীয়া এই আসনসমূহৰ বাবে নতুন সদস্য নিৰ্বাচিত কৰা হ’ব।
আয়োগে প্ৰকাশ কৰা বিবৃতি অনুসৰি ২৬ ফেব্ৰুৱাৰীত নিৰ্বাচনী অধিসূচনা জাৰি কৰা হ’ব। মনোনয়ন দাখিলৰ অন্তিম দিন ৫ মাৰ্চ ধাৰ্য কৰা হৈছে আৰু ৬ মাৰ্চত মনোনয়ন পত্ৰসমূহ পৰীক্ষা কৰা হ’ব। ইচ্ছুক প্ৰাৰ্থীসকলে ৯ মাৰ্চ পৰ্যন্ত মনোনয়ন প্ৰত্যাহাৰ কৰিব পাৰিব। অহা ১৬ মাৰ্চত ভোটগ্ৰহণ অনুষ্ঠিত হ’ব আৰু সেইদিনাই বিয়লি ৫ বজাত ভোটগণনা প্ৰক্ৰিয়া আৰম্ভ হ’ব। সমগ্ৰ নিৰ্বাচনী প্ৰক্ৰিয়া ২০ মাৰ্চৰ ভিতৰত সম্পূৰ্ণ কৰিবলৈ আয়োগে নিৰ্দেশ দিছে।
ভোটদানৰ ক্ষেত্ৰত নিৰ্বাচন আয়োগে এক বিশেষ নিৰ্দেশনা জাৰি কৰিছে। বেলট পেপাৰত পচন্দৰ চিহ্ন দিবলৈ ভোটাৰসকলে কেৱল ৰিটাৰ্নিং অফিচাৰে যোগান ধৰা নিৰ্ধাৰিত বেঙুনীয়া ৰঙৰ স্কেটচ পেনহে ব্যৱহাৰ কৰিব পাৰিব। আন কোনো কলম ব্যৱহাৰ কৰিলে সেই ভোট অবৈধ বুলি গণ্য কৰা হ’ব। নিৰ্বাচন প্ৰক্ৰিয়া স্বচ্ছ আৰু নিকা কৰিবলৈ নিৰীক্ষক নিযুক্তিৰো ব্যৱস্থা কৰা হৈছে বুলি জানিবলৈ দিয়ে।
আনহাতে, অসম, কেৰালা, পণ্ডিচেৰী, তামিলনাডু আৰু পশ্চিম বংগৰ দৰে নিৰ্বাচনমুখী ৰাজ্যসমূহৰ ভোটাৰসকলক ইভিএম (EVM) আৰু ভিভিপেট (VVPAT) সম্পৰ্কে অৱগত কৰিবলৈ আয়োগে এক ব্যাপক সজাগতা অভিযান আৰম্ভ কৰিছে। ১০ ফেব্ৰুৱাৰী পৰ্যন্ত ২৯,০০০ তকৈ অধিক স্থানত ম’বাইল ভেনৰ জৰিয়তে এই অভিযান চলোৱা হৈছে। ইতিমধ্যে ১.২০ লাখৰো অধিক ভোটাৰে এই প্ৰদৰ্শন কেন্দ্ৰসমূহত অংশগ্ৰহণ কৰিছে আৰু ১.১৬ লাখৰো অধিক লোকে ‘মক ভোট‘ৰ (Mock Vote) জৰিয়তে ভোটদান প্ৰক্ৰিয়াৰ অভিজ্ঞতা লাভ কৰিছে বুলি আয়োগে সদৰী কৰিছে।
