৭৯ সংখ্যক বাফটাৰ (BAFTA) মঞ্চত ৰচিত হ’ল ইতিহাস। হলিউডক অতিক্ৰমি ভাৰতীয় ছবিয়ে আজুৰি আনিলে বঁটা। ফাৰহান আখতাৰ আৰু ৰিতেশ সিধৱানীৰ প্ৰযোজনা কৰা মণিপুৰী ছবি ‘বুং’ই আন্তঃৰাষ্ট্ৰীয় মঞ্চত এই বঁটা লাভ কৰে। ‘শ্ৰেষ্ঠ শিশু আৰু পাৰিবাৰিক চলচ্চিত্ৰ’ শাখাত শ্ৰেষ্ঠ স্থান লাভ কৰে ‘বুং’য়ে।
দেওবাৰে নিশা লণ্ডনৰ ৰয়েল ফেষ্টিভেল হলত অনুষ্ঠিত হয় বাফটা বঁটা প্ৰদান অনুষ্ঠান। তাতেই ঘোষণা কৰা হৈছিল বঁটা। লক্ষ্মী প্ৰিয়া দেৱীৰ পৰিচালিত আঞ্চলিক ভাৰতীয় ছবিখনে লাভ কৰে বঁটা। সেই সময়ত সপত্নীক ফাৰহান আখতাৰ, লক্ষ্মী প্ৰিয়া দেৱী আৰু ৰিতেশ সিধৱানী সভাগৃহত উপস্থিত আছিল। সকলোৱে একেলগে ট্ৰফী গ্ৰহণ কৰে।
উল্লেখযোগ্য যে হলিউডৰ মেগা বাজেটৰ ছবি ‘আৰ্কো’, ‘লিলো এণ্ড ষ্টিচ’, ‘জুট্ৰো’পলিছ ২’ আদি ছবিয়ে ‘শ্ৰেষ্ঠ শিশু আৰু পৰিয়াল ছবি’ শাখাত মনোনীত হৈছিল। বিজয়ী ছবি ‘বুং’য়ে সকলোকে পিছ পেলাই বঁটা আজুৰিলে।
কাকতলীয়ভাৱে ‘বাফটা’ মঞ্চত জয়লাভৰ দিনটো আছিল ফাৰহান আখতাৰৰ চতুৰ্থ বিবাহ বাৰ্ষিকী। ফাৰহানে পিন্ধিছিল ক’লা টাক্সেডো। সোণৰ গাউন পিন্ধিছিল শিৱানীয়ে। জীৱনৰ এটা বিশেষ দিনত এনে বঁটা লাভে তেওঁৰ বিবাহ বাৰ্ষিকীটো আৰু অধিক ৰঙীন কৰি তুলিছিল।
অশান্ত মণিপুৰৰ পটভূমিত নিৰ্মিত হৈছে ‘বুং’। আৰম্ভণিৰে পৰা এখন পাৰিবাৰিক ছবি। দেউতাকৰ হঠাৎ নিৰুদ্দেশ হোৱাৰ পিছত এজন ল’ৰা অকলে মাকৰ সৈতে ডাঙৰ হৈছে। দেউতাকৰ নিৰুদ্দেশৰ ৰহস্য যিকোনো ব্যক্তিৰ বাবে এক ডাঙৰ প্ৰত্যাহ্বান। তেওঁ আচলতে ৰহস্যটো সমাধান কৰিব পাৰিবনে – তাৰ লগে লগে ছবিখনৰ কাহিনীভাগ আগবাঢ়িছে।
ছবিখন মুক্তি পোৱাৰ পিছৰে পৰা ‘বুং’য়ে প্ৰশংসা লাভ কৰি আহিছে। এয়া এক ঐতিহাসিক মুহূৰ্ত। উত্তৰ-পূব ভাৰতৰ ৰাজ্য মণিপুৰৰ এখন ছবিয়ে হলিউডক ফেৰ মাৰি বিশ্বজয় কৰিছে। নিঃসন্দেহে ভাৰতীয়ৰ বাবে এক গৌৰৱৰ দিন। সেয়ে স্বাভাৱিকতে প্ৰায় সকলোৱেই উৎফুল্লিত।
