ঐতিহাসিক ‘বৃন্দাৱনী বস্ত্ৰ’ অসমলৈ ঘূৰাই অনাৰ চৰকাৰী প্ৰচেষ্টাৰ অংশ স্বৰূপে মুখ্যমন্ত্ৰী হিমন্ত বিশ্ব শৰ্মাই ২২ ফেব্ৰুৱাৰীত গুৱাহাটীৰ খানাপাৰাস্থিত ৰেচম পামৰ (Sericulture Farm) চৌহদত এখন সুকীয়া সাংস্কৃতিক সংগ্ৰহালয়ৰ আধাৰশিলা স্থাপন কৰে। ৰাজ্যৰ জ্যেষ্ঠ চৰকাৰী বিষয়া, সাংস্কৃতিক জগতৰ বিশিষ্ট ব্যক্তি আৰু সাধাৰণ ৰাইজৰ উপস্থিতিত এই সাংস্কৃতিক সংগ্ৰহালয় প্ৰকল্পৰ ভূমি পূজন আৰু আনুষ্ঠানিক শুভাৰম্ভণী অনুষ্ঠান সম্পন্ন হয়।
জানিব পৰা মতে, চৰকাৰে এই প্ৰকল্পৰ বাবে ৰেচম পামৰ প্ৰায় ৪৫,০০০ বৰ্গফুট (প্ৰায় ২ একৰ) ভূমি আবণ্টন দিছে। এই সমগ্ৰ প্ৰকল্পটো ‘জে এছ ডব্লিউ গ্ৰুপ’ৰ (JSW Group) কৰ্প’ৰেট সামাজিক দায়বদ্ধতা (CSR) পুঁজিৰ অধীনত সম্পূৰ্ণৰূপে নিৰ্মাণ কৰা হ’ব।
উল্লেখযোগ্য যে, ষোড়শ শতিকাত মহাপুৰুষ শ্ৰীমন্ত শংকৰদেৱৰ তত্ত্বাৱধানত নিৰ্মিত বৃন্দাৱনী বস্ত্ৰ হৈছে অসমীয়া বয়ন শিল্প আৰু ভক্তি কলাৰ এক অতুলনীয় নিদৰ্শন। ভগৱান শ্ৰীকৃষ্ণৰ জীৱনৰ বিভিন্ন দৃশ্য অংকিত থকা এই পবিত্ৰ বস্ত্ৰখন বৰ্তমান ৰাজ্যৰ বাহিৰত সংৰক্ষিত হৈ আছে, যিখন অসমৰ বাবে ঐতিহাসিক, ধৰ্মীয় আৰু সামগ্ৰিক কলাত্মক দিশৰ পৰা অত্যন্ত তাৎপৰ্যপূৰ্ণ।
চৰকাৰৰ এই বিশাল আয়োজনৰ মাজতে সচেতন মহলৰ মাজত এক গুৰুত্বপূৰ্ণ প্ৰশ্নৰো উত্থাপন হৈছে। গুৱাহাটীত ইতিমধ্যে গুৰুজনাৰ নামতেই উছৰ্গিত ‘শ্ৰীমন্ত শংকৰদেৱ কলাক্ষেত্ৰ’ৰ দৰে এক বৃহৎ, সু-সাজ্জিত আৰু অত্যাধুনিক সাংস্কৃতিক প্ৰকল্প মজুত আছে। যিহেতু বৃন্দাৱনী বস্ত্ৰখন স্থায়ীভাৱে নহয়, বৰঞ্চ এখন অস্থায়ী প্ৰদৰ্শনীৰ (temporary show) বাবেহে অসমলৈ অনাৰ কথা চলি আছে, তেনেস্থলত কলাক্ষেত্ৰৰ দৰে বিশাল প্ৰতিষ্ঠান থকাৰ পাছতো কেৱল এখন অস্থায়ী প্ৰদৰ্শনীৰ বাবে চৰকাৰে কিয় এক নতুন আৰু ব্যয়বহুল সংগ্ৰহালয় নিৰ্মাণৰ প্ৰয়োজন অনুভৱ কৰিলে, তাক লৈ চৰ্চা আৰম্ভ হৈছে।
বহুতো সমালোচকৰ মতে, কলাক্ষেত্ৰৰ বৰ্তমানৰ আন্তঃগাঁথনি উন্নত কৰি বা তাতেই এটা জলবায়ু-নিয়ন্ত্ৰিত কক্ষ নিৰ্মাণ কৰিয়েই এই প্ৰদৰ্শনী সুন্দৰভাৱে অনুষ্ঠিত কৰিব পৰা গ’লহেঁতেন। ইয়াৰ সলনি খানাপাৰাত সুকীয়াকৈ মাটি আৱণ্টন দি নতুন ভৱন নিৰ্মাণ কৰাটো কিমান যুক্তিসংগত, সেয়া এতিয়া এক অবুজ সাঁথৰ হৈ পৰিছে।
