ধুবুৰী জিলাৰ চাপৰত তাপ বিদ্যুৎ প্ৰকল্প স্থাপনৰ বাবে আদানী গ্ৰুপক ৪৫৫৮ বিঘা ভূমি হস্তান্তৰ কৰা কাৰ্যৰ তীব্ৰ বিৰোধিতা কৰিছে ‘ভূমি অধিকাৰ যৌথ সংগ্ৰাম সমিতি’য়ে। ৰাজ্য চৰকাৰৰ এই পদক্ষেপক অসমক আদানী-আম্বানীৰ ‘কলনী’লৈ (উপনিৱেশ) ৰূপান্তৰ কৰাৰ এক পৰিকল্পনা বুলি অভিহিত কৰিছে সংগঠনটোৱে।
এক প্ৰেছ বিবৃতিযোগে সমিতিৰ অন্যতম আহ্বায়ক প্ৰণৱ দলে আৰু সুব্ৰত তালুকদাৰে কয় যে, মুখ্যমন্ত্ৰী হিমন্ত বিশ্ব শৰ্মাৰ কৰ্প’ৰেট প্ৰীতিৰ বাবেই এতিয়া ৰাজ্যৰ চৰকাৰী ভূমি বৃহৎ পুঁজিপতিৰ হাতলৈ গৈছে। নেতাদ্বয়ে উল্লেখ কৰা অনুসৰি, আদানীক গতোৱা মুঠ ৪৫৫৮ বিঘা মাটিৰ ভিতৰত ৩৪৮৫ বিঘাই হৈছে চৰকাৰী মাটি। ৩৫ বছৰৰ বাবে লীজত দিয়া এই বৃহৎ পৰিমাণৰ চৰকাৰী ভূমিৰ বাবদ আদানীয়ে মাত্ৰ ৫ কোটি টকাহে প্ৰদান কৰিছে। ইয়াৰ অৰ্থ হৈছে, প্ৰতি বিঘা মাটিৰ বিনিময়ত পুঁজিপতিগৰাকীয়ে ব্যয় কৰিছে মাত্ৰ ১৪,৩৪৭ টকা। পানীৰ দৰত অসমৰ ভূমি পুঁজিপতিক গতোৱা কাৰ্য্যক দুৰ্ভাগ্যজনক বুলি আখ্যা দি সমিতিয়ে কয় যে, ভৱিষ্যতে এই প্ৰকল্পৰ পৰা উৎপাদিত বিদ্যুতো অসম চৰকাৰে উচ্চ হাৰত ক্ৰয় কৰিবলগীয়া হ’ব, যিটো আদানীৰ বাবে ৰঙা দলিচা পাৰি দিয়াৰ দৰেই এক কাৰ্য।
বিবৃতিটোত চৰকাৰৰ শেহতীয়া উচ্ছেদ অভিযানকো কঠোৰ ভাষাৰে সমালোচনা কৰা হয়। নেতাদ্বয়ে অভিযোগ কৰে যে, সাধাৰণ খাটিখোৱা মানুহক উচ্ছেদ কৰাৰ সময়ত মুখ্যমন্ত্ৰীয়ে ইয়াক খিলঞ্জীয়াৰ ভৱিষ্যত সুৰক্ষাৰ স্বাৰ্থত কৰা বুলি সদম্ভে ঘোষণা কৰিছিল যদিও এতিয়া প্ৰমাণিত হৈছে যে ইয়াৰ আঁৰত কেৱল ‘আদানী প্ৰীতি’হে জড়িত আছিল। জনজাতীয় লোকৰ প্ৰবল আন্দোলনৰ ওচৰত হাৰ মানি তেওঁলোকৰ ভূমি অধিগ্ৰহণ কৰিব নোৱাৰি এতিয়া চৰকাৰে অতীজৰে পৰা খেতি-বাতি কৰি অহা সংখ্যালঘু লোকৰ ভূমিখণ্ডক সহজ টাৰ্গেট কৰি লৈছে বুলিও সমিতিয়ে গুৰুতৰ অভিযোগ উত্থাপন কৰে।
এনেদৰে অবৈধ ভূমি হস্তান্তৰ প্ৰক্ৰিয়া অব্যাহত থাকিলে অনাগত ৫ বছৰত অসমৰ সমগ্ৰ চৰকাৰী ভূমি আদানী, আম্বানী বা ৰামদেৱৰ দৰে বৃহৎ পুঁজিপতিৰ দখললৈ যাব বুলি সমিতিয়ে গভীৰ আশংকা প্ৰকাশ কৰিছে। চৰকাৰৰ এই কৰ্প’ৰেট প্ৰীতি সমগ্ৰ অসমৰ সামাজিক আৰু পাৰিপাৰ্শ্বিক গাঁথনিৰ প্ৰতি এক তীব্ৰ ভাবুকি বুলি সতৰ্ক কৰি দি ‘ভূমি অধিকাৰ যৌথ সংগ্ৰাম সমিতি’য়ে জাতি-মাটি-ভেটি ৰক্ষাৰ স্বাৰ্থত সৰ্বসাধাৰণ ৰাইজক এই অবৈধ ভূমি হস্তান্তৰ প্ৰক্ৰিয়াৰ বিৰোধিতা কৰিবলৈ আহ্বান জনাইছে।
