অহা ১ মাৰ্চৰ পৰা ভাৰতৰ হোৱাটছএপ ব্যৱহাৰকাৰীসকলৰ বাবে সলনি হ’ব বহু পুৰণি নিয়ম। ভাৰত চৰকাৰে এতিয়া হোৱাটছএপ ব্যৱহাৰৰ ক্ষেত্ৰত চিম বাইণ্ডিং বা চিম সংযোগ বাধ্যতামূলক কৰাৰ সিদ্ধান্ত লৈছে। যোগাযোগ বিভাগৰ নতুন টেলিকম চাইবাৰ ছিকিউৰিটি নিয়ম অনুসৰি এই নতুন ব্যৱস্থা কাৰ্যকৰী কৰা হ’ব। ইয়াৰ অৰ্থ হ’ল আপোনাৰ হোৱাটছএপ একাউণ্টটো যিটো মোবাইল নম্বৰত চলি আছে, সেই চিমখন আপোনাৰ মূল ফোনটোত সোমাই থকাটো এতিয়াৰ পৰা বাধ্যতামূলক। চৰকাৰে স্পষ্ট কৰি দিছে যে অহা ২৮ ফেব্ৰুৱাৰীৰ ভিতৰতে এই কাম সম্পূৰ্ণ হ’ব লাগিব আৰু ইয়াৰ সময়সীমা কোনো কাৰণতে বৃদ্ধি কৰা নহ’ব। দেশৰ নিৰাপত্তা সুনিশ্চিত কৰিবলৈ আৰু ক্ৰমান্বয়ে বৃদ্ধি পোৱা চাইবাৰ প্ৰৱঞ্চনা ৰোধ কৰিবলৈকে এই গুৰুত্বপূৰ্ণ পদক্ষেপ গ্ৰহণ কৰা হৈছে বুলি কেন্দ্ৰীয় মন্ত্ৰালয়ে জনাইছে।
বৰ্তমান সময়ত হোৱাটছএপে সমগ্ৰ বিশ্বতে এবাৰ ভেৰিফাই কৰা পদ্ধতি অনুসৰণ কৰি আহিছে। ইয়াত আপুনি মাত্ৰ এবাৰ ওটিপি দি একাউণ্টটো সক্ৰিয় কৰি ল’লে পিছলৈ চিমখন ফোনত নাথাকিলেও বা চিমখন খুলি থ’লেও হোৱাটছএপ ব্যৱহাৰ কৰি থাকিব পাৰি। আনকি ইণ্টাৰনেট সংযোগ থাকিলে অন্য ডিভাইচতো হোৱাটছএপ চলোৱাটো সম্ভৱ হয়। কিন্তু ভাৰতৰ নতুন নিয়ম অনুসৰি এতিয়াৰে পৰা হোৱাটছএপ একাউণ্টৰ সৈতে আপোনাৰ ফোনত চিমখন নিৰন্তৰভাৱে সংযোগ হৈ থাকিব লাগিব। জানিব পৰা মতে প্ৰতি ৬ ঘণ্টাৰ মূৰে মূৰে হোৱাটছএপে পৰীক্ষা কৰিব যে পঞ্জীয়নভুক্ত চিমখন আচলতে আপোনাৰ ফোনটোত আছে নে নাই। যদি আপুনি চিমখন ফোনৰ পৰা উলিয়াই দিয়ে বা সলনি কৰে, তেন্তে চিমখন পুনৰ ভৰাই নিদিয়ালৈকে আপোনাৰ হোৱাটছএপ বন্ধ হৈ পৰিব।
চৰকাৰৰ এই কঠোৰ সিদ্ধান্তৰ আঁৰত আছে দেশত বৃদ্ধি পোৱা ভয়ংকৰ চাইবাৰ অপৰাধ। বহু সময়ত প্ৰৱঞ্চকসকলে ভাৰতীয় চিম ব্যৱহাৰ কৰি এবাৰ হোৱাটছএপ সক্ৰিয় কৰি লয় আৰু তাৰ পিছত বিদেশৰ পৰা বা অন্য ঠাইৰ পৰা চিম নোহোৱাকৈয়ে একাউণ্ট চলাই প্ৰৱঞ্চনা কৰে। ইয়াৰ ফলত অপৰাধীক বিচাৰি উলিওৱাত আৰক্ষী বা তদন্তকাৰী সংস্থাৰ বাবে যথেষ্ট সমস্যাৰ সৃষ্টি হয়। চিম বাইণ্ডিং বাধ্যতামূলক কৰিলে প্ৰতিটো সক্ৰিয় একাউণ্ট এজন কেৱাইচি ভৰি থকা গ্ৰাহকৰ সৈতে পোনপটীয়াকৈ জড়িত হৈ থাকিব। চৰকাৰী তথ্য অনুসৰি ২০২৪ চনত চাইবাৰ প্ৰৱঞ্চনাৰ বাবে দেশত ২২,৮০০ কোটি টকাতকৈও অধিক ধন লোকচান হৈছে, যাৰ বাবেই এই নতুন নিৰাপত্তা ব্যৱস্থা গ্ৰহণ কৰা হৈছে।
এই নতুন নিয়মৰ ফলত কম্পিউটাৰ বা টেবলেটত হোৱাটছএপ ব্যৱহাৰ কৰা লোকসকল আটাইতকৈ বেছি প্ৰভাৱিত হ’ব। ১ মাৰ্চৰ পৰা কম্পিউটাৰ বা লেপটপত হোৱাটছএপ ব্যৱহাৰ কৰিলে প্ৰতি ৬ ঘণ্টাৰ মূৰে মূৰে আপোনাৰ একাউণ্টটো লগ আউট হৈ যাব পাৰে। পুনৰ সংযোগ কৰিবলৈ আপোনাৰ চিম থকা মূল ফোনটোৰ প্ৰয়োজন হ’ব। ইয়াৰ উপৰিও যিসকলে চিম নোহোৱাকৈ কেৱল ৱাই-ফাইৰ জৰিয়তে টেবলেট বা অন্য ফোনত হোৱাটছএপ চলায়, তেওঁলোকেও এতিয়া সঘনাই মূল ফোনটোৰ সহায় ল’বলগীয়া হ’ব। ইতিমধ্যে বহু ব্যৱহাৰকাৰীক হোৱাটছএপে এই সম্পৰ্কে সৰ্তকবাৰ্তা পঠিয়াবলৈ আৰম্ভ কৰিছে।
বিপদৰ পৰা বাচিবলৈ আৰু হোৱাটছএপ সেৱা অবিৰতভাৱে চলাই নিবলৈ গ্ৰাহকসকলে কিছুমান কথা মনত ৰখাটো জৰুৰী। আপুনি ব্যৱহাৰ কৰি থকা হোৱাটছএপ নম্বৰটো আৰু আপোনাৰ ফোনত থকা চিমখন একেটা হয়নে নহয় সেয়া নিশ্চিত কৰক। লগতে নিজৰ হোৱাটছএপটো শেহতীয়া সংস্কৰণলৈ আপডেট কৰি ৰাখক। যদি আপুনি অফিচৰ কামত কম্পিউটাৰত হোৱাটছএপ ব্যৱহাৰ কৰে, তেন্তে কামৰ সময়ত চিম থকা ফোনটো সদায় নিজৰ ওচৰত ৰাখিব যাতে বাৰে বাৰে লগ আউট হ’লেও আপুনি সহজে পুনৰ লগ ইন কৰিব পাৰে। ১ মাৰ্চৰ আগতেই এই প্ৰস্তুতি চলাই থ’লে আপুনি কোনো অসুবিধা নোহোৱাকৈ হোৱাটছএপ ব্যৱহাৰ কৰি থাকিব পাৰিব।
