নতুন দিল্লীত কৰ্মৰত এগৰাকী অসমীয়া যুৱতীৰ আকস্মিক মৃত্যুক কেন্দ্ৰ কৰি বৰ্তমান তীব্ৰ চাঞ্চল্যৰ সৃষ্টি হৈছে। দক্ষিণ-পশ্চিম দিল্লীৰ মহিপালপুৰত বসবাস কৰা ত্ৰিদিশা বৰা নামৰ যুৱতীগৰাকীৰ যোৱা শুকুৰবাৰে নিশা মৃত্যু হয়। এই ঘটনাক লৈ বৰ্তমান শোকাকুল পৰিয়ালৰ লোকে দিল্লী আৰক্ষীৰ বিৰুদ্ধে চৰম অৱহেলা আৰু অসহযোগিতাৰ গুৰুতৰ অভিযোগ উত্থাপন কৰিছে। পৰিয়ালৰ মতে আৰক্ষীৰ বাবেই মৰণোত্তৰ পৰীক্ষা আৰু অন্যান্য আইনী প্ৰক্ৰিয়াত অপ্ৰত্যাশিত বিলম্ব ঘটিছে যাৰ ফলত তেওঁলোকে চৰম মানসিক যন্ত্ৰণা ভোগ কৰিবলগীয়া হৈছে।
ত্ৰিদিশাৰ মৃত্যুৰ খবৰ পাই অসমৰ পৰা তেওঁৰ ভাতৃ তৎক্ষণাত দিল্লীত উপস্থিত হৈছিল যদিও তাৰ পিছৰে পৰা তেওঁ আৰক্ষীৰ পৰা কোনো ধৰণৰ সহায় পোৱা নাই বুলি ক্ষোভ প্ৰকাশ কৰিছে। ভনীয়েকৰ স্বাস্থ্যৰ অৱনতি ঘটা বুলি জানিব পাৰি তেওঁ দিল্লীত উপস্থিত হোৱাৰ পিছতেই আৰক্ষীৰ সৈতে যোগাযোগ কৰিছিল। আৰক্ষীয়ে তেওঁক জনাইছিল যে শনিবাৰ আৰু দেওবাৰ হোৱাৰ বাবে মৰণোত্তৰ পৰীক্ষা কৰিব পৰা নাযাব আৰু সোমবাৰে দুপৰীয়া ১২ বজাৰ ভিতৰত এই কাম সম্পন্ন হ’ব। কিন্তু তিনিদিন অতিবাহিত হোৱাৰ পিছতো কোনো ব্যৱস্থা গ্ৰহণ নকৰাত ভাতৃগৰাকী দিশহাৰা হৈ পৰিছে।
বসন্ত কুঞ্জ আৰক্ষী থানাৰ অন্তৰ্গত এই ঘটনাটোত আৰক্ষীয়ে বিভিন্ন প্ৰক্ৰিয়াৰ অজুহাত দেখুৱাই ভাতৃৰ আহ্বান অমান্য কৰাৰ অভিযোগ উঠিছে। আনকি এবাৰৰ বাবেও ভনীয়েকৰ মৃতদেহটো চাবলৈ অনুমতি দিয়া হোৱা নাই বুলি তেওঁ কান্দোনত ভাঙি পৰিছে। তদন্তকাৰী বিষয়াৰ সৈতে যোগাযোগ কৰিবলৈ চেষ্টা কৰিও বিফল হোৱা বুলি দাবী কৰি তেওঁ জনাইছে যে আৰক্ষীয়ে কেৱল সময় পাৰ কৰি তেওঁক বিপথে পৰিচালিত কৰিছে। ত্ৰিদিশা বিগত পাঁচ বছৰ ধৰি দিল্লীৰ এটা ব্যক্তিগত প্ৰতিষ্ঠানত কাম কৰি আছিল আৰু বন্ধু-বান্ধৱীৰ পৰা জানিব পৰা মতে তেওঁ হঠাৎ অসুস্থ হৈ ঢলি পৰিছিল।
এই দুৰ্ভাগ্যজনক পৰিস্থিতিত পৰিয়ালটোৱে উত্তৰ-পূবৰ লোকৰ প্ৰতি দিল্লী আৰক্ষীৰ বৈষম্যমূলক আচৰণৰ অভিযোগো উত্থাপন কৰিছে। তেওঁলোকৰ মতে দিল্লী আৰক্ষীয়ে উত্তৰ-পূবৰ লোকক অলপো সহযোগিতা নকৰে আৰু সেয়েহে এইদৰে হাৰাশাস্তি কৰা হৈছে। উল্লেখ্য যে ত্ৰিদিশাৰ পিতৃৰ পূৰ্বেই বিয়োগ ঘটিছিল আৰু বৰ্তমান তেওঁৰ মাতৃও অসমত চিকিৎসালয়ত ভৰ্তি হৈ আছে। এনে এক শোকাৱহ সময়ত ভাতৃগৰাকীয়ে এতিয়া মুখ্যমন্ত্ৰী ড° হিমন্ত বিশ্ব শৰ্মাৰ হস্তক্ষেপ বিচাৰিছে যাতে সকলো প্ৰক্ৰিয়া সোনকালে শেষ কৰি ভনীয়েকৰ মৃতদেহটো অসমলৈ নি শেষকৃত্য সম্পন্ন কৰিব পাৰে।
অসমৰ মুখ্যমন্ত্ৰীগৰাকীলৈ সহায়ৰ আবেদন জনাই তেওঁ আশা কৰিছে যে চৰকাৰৰ ফালৰ পৰা কোনো ব্যৱস্থা ল’লে হয়তো দিল্লী আৰক্ষীৰ এই গাফিলতি বন্ধ হ’ব। বৰ্তমান দিল্লীত অসহায় হৈ পৰা ত্ৰিদিশাৰ পৰিয়ালে কেৱল ভনীয়েকৰ নশ্বৰ দেহটো বুকুত বান্ধি নিজ গৃহলৈ উভতি অহাৰ বাবে অপেক্ষা কৰিছে। এই ঘটনাই দিল্লীত থকা অসমীয়া সমাজৰ মাজতো তীব্ৰ প্ৰতিক্ৰিয়াৰ সৃষ্টি কৰিছে আৰু আৰক্ষীৰ এনে অমানৱীয় আচৰণক সকলোৱে গৰিহণা দিছে।
