পশ্চিম এছিয়াত ক্ৰমাৎ অৱনতি ঘটা যুদ্ধ পৰিস্থিতিৰ প্ৰতি লক্ষ্য ৰাখি এক সম্ভাৱ্য দীৰ্ঘম্যাদী আৰু জটিল সংকটৰ মোকাবিলা কৰিবলৈ ভাৰত চৰকাৰ সাজু হৈছে। আগন্তুক দিনত আমেৰিকা যুক্তৰাষ্ট্ৰ আৰু ইজৰাইলৰ সৈতে ইৰাণৰ সংঘাত অধিক ভয়াৱহ হৈ পৰাৰ আশংকালৈ লক্ষ্য ৰাখি, নতুন দিল্লীয়ে ইতিমধ্যে তাৎক্ষণিক পদক্ষেপ তথা সুদূৰপ্ৰসাৰী কৌশলগত পৰিকল্পনা প্ৰস্তুত কৰাত গুৰুত্ব আৰোপ কৰিছে। এই স্পৰ্শকাতৰ পৰিস্থিতিত উপসাগৰীয় ৰাষ্ট্ৰসমূহত কৰ্মৰত প্ৰায় ৯০ লাখৰ পৰা এক কোটি প্ৰবাসী ভাৰতীয়ৰ নিৰাপত্তা, খনিজ তেলৰ বাণিজ্য আৰু দেশৰ সামগ্ৰিক সুৰক্ষাক লৈ কেন্দ্ৰীয় চৰকাৰে গভীৰ উদ্বেগ প্ৰকাশ কৰিছে।
আমেৰিকাৰ ৰাষ্ট্ৰপতি ডনাল্ড ট্ৰাম্পে প্ৰয়োজন সাপেক্ষে ইৰাণৰ ওপৰত আক্ৰমণ অব্যাহত ৰাখিব বুলি ঘোষণা কৰাৰ পিছতেই নতুন দিল্লীয়ে সতৰ্কতামূলক ব্যৱস্থা গ্ৰহণ কৰিছে। ৰণনীতি প্ৰস্তুত কৰাৰ দায়িত্বত থকা এজন জ্যেষ্ঠ চৰকাৰী বিষয়াই সংবাদ মাধ্যমৰ আগত প্ৰকাশ কৰা মতে, এই যুদ্ধ দীৰ্ঘদিনীয়া হোৱাৰ লগতে ইয়াৰ প্ৰসাৰ ঘটাৰ পূৰ্ণ সম্ভাৱনা আছে। যুদ্ধৰ পৰিসৰ বৃদ্ধি পালে উপসাগৰীয় অঞ্চলৰ সৈতে ভাৰতৰ অৰ্থনৈতিক আৰু মানৱীয় সম্পৰ্কৰ প্ৰতি লক্ষ্য ৰাখি ভাৰতীয়সকলক নিৰাপদে ওভতাই আনিবলৈ চৰকাৰে এক ‘বৃহৎ উদ্ধাৰ অভিযান’ চলাবলগীয়া হ’ব পাৰে। বৰ্তমান ইৰাণৰ ড্ৰোণ আৰু মিছাইল আক্ৰমণৰ বাবে সেই অঞ্চলত বসবাস কৰা বহু ভাৰতীয় শ্ৰমিক শংকিত হৈ পৰিছে, যাৰ বাবে চৰকাৰে সংশ্লিষ্ট দেশসমূহৰ কৰ্তৃপক্ষৰ সৈতেও নিৰন্তৰ যোগাযোগ ৰক্ষা কৰিছে।
আনহাতে, চৰকাৰৰ এনে কূটনৈতিক স্থিতিক লৈ বিৰোধী দলসমূহে তীব্ৰ সমালোচনা কৰিছে। বিশেষকৈ ইৰাণৰ সৰ্বোচ্চ নেতা আয়াতোল্লাহ আলী খামেনেইৰ মৃত্যুৰ খবৰৰ পিছতো ভাৰত চৰকাৰে আনুষ্ঠানিকভাৱে শোকপ্ৰকাশ নকৰাক লৈ কংগ্ৰেছ নেত্ৰী ছোনিয়া গান্ধীয়ে চৰকাৰৰ ‘নীৰৱতা’ক লৈ প্ৰশ্ন উত্থাপন কৰিছে। ইয়াৰ উত্তৰত চৰকাৰী সূত্ৰই স্পষ্ট কৰি দিছে যে বৰ্তমান চৰকাৰৰ মূল লক্ষ্য হৈছে উপসাগৰীয় দেশসমূহত সংকটত পৰা এক কোটি ভাৰতীয়ৰ সুৰক্ষা নিশ্চিত কৰা আৰু তেওঁলোকক ৰক্ষা কৰিবলৈ চৰকাৰে সকলো সম্ভৱপৰ প্ৰচেষ্টা হাতত ল’ব। বিশ্বজুৰি ছিয়া সম্প্ৰদায়ক অসন্তুষ্ট কৰাৰ আশংকা সন্দৰ্ভত বিষয়াজনে কয় যে ভাৰতে নিজৰ বিকল্পসমূহ সীমিত কৰি দেশৰ স্বাৰ্থ বিঘ্নিত কৰিব নিবিচাৰে। চৰকাৰে এক বহল দৃষ্টিকোণৰ পৰা সমগ্ৰ বিষয়টো পৰ্যবেক্ষণ কৰিছে আৰু দীৰ্ঘম্যাদী ৰাষ্ট্ৰীয় স্বাৰ্থৰ প্ৰতি লক্ষ্য ৰাখিহে সিদ্ধান্ত গ্ৰহণ কৰিছে।
উপসাগৰীয় অঞ্চলৰ দেশসমূহৰ সৈতে ভাৰতৰ সুসম্পৰ্ক আৰু পাৰস্পৰিক শ্ৰদ্ধাৰ কথা উল্লেখ কৰি চৰকাৰী সূত্ৰটোৱে জানিবলৈ দিয়ে যে সেই অঞ্চলৰ শাসকসকলে ভাৰতীয়সকলক যথেষ্ট সন্মান সহকাৰে ব্যৱহাৰ কৰি আহিছে। বিগত বছৰবোৰত তেওঁলোকে ভাৰতত কোটি কোটি ডলাৰ বিনিয়োগ কৰাৰ লগতে ভাৰতীয় প্ৰবাসীসকলেও ১০০ বিলিয়ন ডলাৰতকৈ অধিক ধন স্বদেশলৈ প্ৰেৰণ কৰিছে। বৰ্তমান সেই দেশসমূহ ইৰাণৰ ড্ৰোণ আৰু মিছাইল আক্ৰমণৰ সন্মুখীন হোৱাৰ সময়ত ভাৰতে নিজৰ নাগৰিকৰ স্বাৰ্থতেই স্থিতি গ্ৰহণ কৰিবলগীয়া হৈছে। অতীতৰ উদাহৰণ দাঙি ধৰি বিষয়াজনে কয় যে পূৰ্বতে কংগ্ৰেছ চৰকাৰৰ দিনতো ভৱিষ্যতৰ প্ৰতি লক্ষ্য ৰাখি কৰ্ণেল গাড্ডাফিৰ মৃত্যুত শোকপ্ৰকাশ কৰা হোৱা নাছিল। ঘৰুৱা ৰাজনীতি চলি থাকিব, কিন্তু চৰকাৰে সামগ্ৰিক পৰিস্থিতি পৰ্যবেক্ষণ কৰি যুদ্ধৰ ফলত হ’ব পৰা ক্ষতিৰ পৰিমাণ ন্যূনতম কৰিবলৈ নিৰন্তৰ প্ৰয়াস চলাই যাব বুলি মত প্ৰকাশ কৰে।
