ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনী পুনৰ চৰ্চালৈ আহিছে। এইবাৰ তেওঁৰ চৰ্চাৰ কাৰণ কোনো খেল নহয়, বৰঞ্চ ট্ৰেফিক আইন উলংঘাৰ বাবেহে তেওঁ বাতৰিৰ শিৰোনাম দখল কৰিছে। ৰাঁচীৰ ৰাজপথত নিৰ্ধাৰিত সীমাতকৈ অধিক বেগত গাড়ী চলোৱাৰ বাবে ৰাঁচী যান-বাহন আৰক্ষীয়ে ধোনীৰ বিৰুদ্ধে ই-চালান জাৰি কৰিছে। জানিব পৰা মতে, ১ মাৰ্চত কাংকে ৰিং ৰোডৰ বীৰছা কৃষি বিশ্ববিদ্যালয়ৰ ওচৰত ধোনীৰ বিলাসী বাহনখনে ঘণ্টাত ৯১ কিলোমিটাৰ বেগত যাত্ৰা কৰিছিল। উক্ত পথটোত গতিৰ সৰ্বোচ্চ সীমা আছিল মাত্ৰ ৬০ কিলোমিটাৰ।
অটোমেটিক ট্ৰেফিক মনিটৰিং চিষ্টেমৰ জৰিয়তে ধোনীৰ এই আইন উলংঘাৰ কথা ধৰা পৰে আৰু ইয়াৰ পাছতে তেওঁক ১০০০ টকাৰ জৰিমনা বিহা হয়। যান-বাহন আৰক্ষীয়ে স্পষ্ট কৰি দিছে যে আইন সকলোৰে বাবে সমান আৰু চহৰৰ বিভিন্ন স্থানত থকা চিচিটিভি কেমেৰাৰ জৰিয়তে ২৪ ঘণ্টাই এনেদৰে নিৰীক্ষণ চলাই থকা হয়। যদিও এই ঘটনাক লৈ সমগ্ৰ চহৰখনত ব্যাপক চৰ্চা চলিছে, তথাপিও ধোনীৰ ফালৰ পৰা বৰ্তমানলৈকে কোনো আনুষ্ঠানিক মন্তব্য পোৱা হোৱা নাই। ধোনীৰ বাহনৰ প্ৰতি থকা চখৰ কথা সকলোৱে জানে আৰু তেওঁৰ ওচৰত বহুতো দামী গাড়ী আৰু বাইকৰ সংগ্ৰহ আছে।
কেৱল যান-বাহনৰ জৰিমনা নহয়, আন এক চৰকাৰী জাননীৰ বাবেও ধোনী শেহতীয়াকৈ সমস্যাত পৰিছে। যোৱা সপ্তাহত ঝাৰখণ্ড ষ্টেট হাউছিং ব’ৰ্ডে তেওঁৰ নামত থকা এটা আৱাসিক প্লটক লৈ জাননী প্ৰেৰণ কৰিছিল। ৰাঁচীৰ হাৰমু অঞ্চলত থকা ধোনীৰ আৱাসিক প্লটটো ব্যৱসায়িক কামত ব্যৱহাৰ কৰাৰ অভিযোগ উত্থাপন হৈছে। ব’ৰ্ডৰ মতে, আৱাসিক কামৰ বাবে আবণ্টিত সেই স্থানত বৰ্তমান এটা পেথ’লজী পৰীক্ষাগাৰ চলি আছে, যিটো নিয়মৰ বিৰুদ্ধ।
এই বিষয়টো লৈ হাউছিং ব’ৰ্ডে ধোনীৰ পৰা স্পষ্টীকৰণ বিচাৰিছে। ব’ৰ্ডে জানিবলৈ দিছে যে যদিহে ধোনীয়ে দিয়া উত্তৰ সন্তোষজনক নহয়, তেন্তে তেওঁৰ ভূমি আবণ্টন বাতিল কৰাৰ সম্ভাৱনাও আছে। এনেদৰে একেৰাহে দুটাকৈ বিতৰ্কত নাম সোমাই পৰা বাবে এতিয়া অনুৰাগীসকলৰ মাজত মিশ্ৰিত প্ৰতিক্ৰিয়াৰ সৃষ্টি হৈছে। ধোনীয়ে এই গোটেই বিষয়বোৰ কেনেদৰে সমাধান কৰিব, সেয়া পৰৱৰ্তী সময়তহে লক্ষ্যণীয় হ’ব।
