শিশুৰ স্মাৰ্টফোন আৰু ছ’চিয়েল মিডিয়াৰ আসক্তি ৰোধৰ বাবে কৰ্ণাটক চৰকাৰে কঠোৰ পদক্ষেপ গ্ৰহণ কৰিছে। শুকুৰবাৰে ৰাজ্যৰ বাজেট দাখিল কৰাৰ সময়ত মুখ্যমন্ত্ৰী সিদ্দাৰামাইয়াই ঘোষণা কৰে যে ৰাজ্যত ১৬ বছৰৰ তলৰ শিশুৰ বাবে ছ’চিয়েল মিডিয়া ব্যৱহাৰ সম্পূৰ্ণৰূপে নিষিদ্ধ কৰা হৈছে।
এনে চূড়ান্ত সিদ্ধান্ত লোৱা দেশৰ ভিতৰতে প্ৰথম হৈছে কৰ্ণাটক। ইয়াৰ পূৰ্বে অন্ধ্ৰপ্ৰদেশ আৰু গোৱাই এনে চিন্তা-চৰ্চা কৰিবলৈ আৰম্ভ কৰিছিল যদিও কৰ্ণাটকেই প্ৰথমে কাৰ্যকৰী কৰাৰ পথত আগবাঢ়িছে।
এই বিষয়ত বহুদিন ধৰি কৰ্ণাটক চৰকাৰৰ ভিতৰত আলোচনা চলি আছিল। ৰাজ্যৰ আই টি মন্ত্ৰী প্ৰিয়ংক খাৰ্গেৰ পৰা আৰম্ভ কৰি স্বাস্থ্য মন্ত্ৰীলৈকে সকলোৱে শিশুৰ অত্যধিক স্ক্ৰীণ টাইম, মানসিক স্বাস্থ্যৰ অৱনতি আৰু চাইবাৰ নিৰাপত্তাৰ বাবে উদ্বেগ প্ৰকাশ কৰিছিল।
অষ্ট্ৰেলিয়া, ব্ৰিটেইন বা ফ্ৰান্সৰ দৰে বিশ্বৰ দেশসমূহেও শিশুসকলে শ্ৰেণীকোঠাত ছ’চিয়েল মিডিয়া আৰু ম’বাইলৰ ব্যৱহাৰ নিয়ন্ত্ৰণৰ বাবে কঠোৰ ব্যৱস্থা গ্ৰহণ কৰিছে। কিন্তু বিশেষজ্ঞসকলৰ মতে সম্পূৰ্ণ নিষেধাজ্ঞা কাৰ্যকৰী কৰাটো অতি কঠিন আৰু ইয়াৰ একমাত্ৰ সমাধান নহয়। ভাৰতীয় অৰ্থনৈতিক সমীক্ষা (২০২৫-২৬) য়েও স্মাৰ্টফোনৰ নিচাক টোপনিৰ সমস্যা আৰু মানসিক চাপৰ কাৰণ হিচাপে তুলি ধৰিছে।
বিশেষজ্ঞসকলে সকীয়াই দিছে যে যেনেকৈ চাইবাৰ অপৰাধ, ব্যক্তিগত তথ্য চুৰি বা অনলাইন প্ৰলোভনৰ আশংকা থাকে, ইণ্টাৰনেটো শিশুৰ বাবে শিক্ষা আৰু সৃষ্টিশীলতাৰ অন্যতম মাধ্যম। যদিহে ইয়াক সম্পূৰ্ণৰূপে নিষিদ্ধ কৰা হয় তেন্তে কিশোৰ-কিশোৰীসকলে ভিপিএন বা ভুৱা একাউণ্টৰ জৰিয়তে নিৰীক্ষণৰ বাহিৰত থকা অধিক বিপজ্জনক প্লেটফৰ্মৰ ফালে মুখ কৰিব পাৰে।
সেয়েহে বিশেষজ্ঞসকলে কঠোৰ নিষেধাজ্ঞাৰ পৰিৱৰ্তে কঠোৰ অভিভাৱকৰ নিয়ন্ত্ৰণ, গোপনীয়তা সুৰক্ষা আৰু ডিজিটেল সাক্ষৰতা বৃদ্ধিৰ ওপৰত গুৰুত্ব দিব লাগে বুলি পৰামৰ্শ আগবঢ়াইছে। কৰ্ণাটক চৰকাৰে এই নিৰ্দেশনা কেনেদৰে কাৰ্যকৰী কৰে তালৈ এতিয়া সমগ্ৰ দেশে চকু ৰাখিছে।
