অহা অসম বিধানসভা নিৰ্বাচনক কেন্দ্ৰ কৰি কোকৰাঝাৰ বিধানসভা সমষ্টিত বিপিএফ দলৰ টিকট লাভৰ বাবে বৰ্তমান কুৰুক্ষেত্ৰ সদৃশ পৰিৱেশৰ সৃষ্টি হৈছে। বিশেষকৈ বিটিচিৰ মুৰব্বী হাগ্ৰামা মহিলাৰীৰ পত্নী সেউলী মহিলাৰী আৰু দলৰ জ্যেষ্ঠ নেত্ৰী প্ৰমীলা ৰাণী ব্ৰহ্মই এই আসনখনৰ বাবে প্ৰবল দাবীদাৰ হিচাপে আত্মপ্ৰকাশ কৰিছে। দুয়োগৰাকী নেত্ৰীয়ে ইতিমধ্যে সমষ্টিটোত নিজৰ স্থিতি শক্তিশালী কৰিবলৈ তৎপৰতা আৰম্ভ কৰিছে।
সেউলী মহিলাৰীয়ে এইবাৰ কোকৰাঝাৰ সমষ্টিৰ পৰা নিৰ্বাচনত অৱতীৰ্ণ হোৱাৰ বাবে ব্যাপক প্ৰস্তুতি চলাইছে। তেওঁ ইতিমধ্যে বিভিন্ন সামাজিক সংগঠন আৰু স্থানীয় ৰাইজৰ সৈতে যোগাযোগ আৰম্ভ কৰিছে। ইয়াৰ অংশস্বৰূপে তেওঁ কোকৰাঝাৰ টাউন মাৰ্চেণ্ট এছ’চিয়েচনৰ কাৰ্যালয়লৈ গৈ ব্যৱসায়ীসকলৰ আশীৰ্বাদ আৰু সমৰ্থন বিচাৰিছে।
ব্যৱসায়ী সন্থাই তেওঁক পূৰ্ণ সমৰ্থন জনোৱাৰ আশ্বাস দিছে আৰু তেওঁৰ নামটো দলৰ উচ্চস্তৰীয় কমিটিলৈ প্ৰেৰণ কৰাৰ বাবেও সিদ্ধান্ত গ্ৰহণ কৰিছে। যোৱা কেইদিনমানত সেউলী মহিলাৰীয়ে সমষ্টিটোৰ চুকে-কোণে ঘুৰি ফুৰি সাধাৰণ ৰাইজৰ সৈতে পোনপটীয়া মত বিনিময় কৰা দেখা গৈছে।
আনফালে অসম চৰকাৰৰ তিনিবাৰৰ প্ৰাক্তন কেবিনেট মন্ত্ৰী প্ৰমীলা ৰাণী ব্ৰহ্ময়ো একেখন আসনৰ বাবে নিৰ্বাচন খেলিবলৈ আগ্ৰহ প্ৰকাশ কৰিছে। অভিজ্ঞ ৰাজনীতিবিদগৰাকীয়ে নিজৰ দখলত থকা এই দুৰ্গটো পুনৰ উদ্ধাৰৰ বাবে পকেট মিটিং আৰু বিভিন্ন জনসংযোগ কাৰ্যসূচী গ্ৰহণ কৰিছে।
যিহেতু দুয়োগৰাকী প্ৰভাৱশালী নেত্ৰীয়ে টিকটৰ বাবে উঠি-পৰি লাগিছে, গতিকে বিপিএফৰ ভিতৰচৰাত কোনে শেষ হাঁহি মাৰিব তাক লৈ এতিয়া সমগ্ৰ কোকৰাঝাৰত তীব্ৰ চৰ্চা চলিছে। ৰাজনৈতিক পৰ্যবেক্ষকসকলৰ মতে এই টিকট কেন্দ্ৰিক প্ৰতিযোগিতাই নিৰ্বাচনৰ পূৰ্বে এক আমোদজনক পৰিৱেশৰ সৃষ্টি কৰিছে।
