মৰাণৰ তিলৈনগৰত আজি ডিব্ৰুগড় জিলা কংগ্ৰেছ আৰু অসম চাহ মজদুৰ আদিবাসী কংগ্ৰেছৰ উদ্যোগত এক বিশাল মহাসন্মিলন অনুষ্ঠিত হয়। উজনি অসমৰ কেইবাখনো জিলাৰ হাজাৰ হাজাৰ চাহ জনগোষ্ঠীয় লোকৰ উপস্থিতিত এই সভাত বিজেপি চৰকাৰৰ বিৰুদ্ধে তীব্ৰ বিষোদগাৰ প্ৰকাশ কৰে প্ৰদেশ কংগ্ৰেছৰ সভাপতি গৌৰৱ গগৈয়ে। তেওঁ অভিযোগ কৰে যে বিগত দহ বছৰে বিজেপি চৰকাৰে চাহ বাগিচাসমূহক ধবংসৰ মুখলৈ ঠেলি দিছে। বাগিচাসমূহৰ অৱস্থা উন্নত হোৱাৰ পৰিৱৰ্তে অধিক শোচনীয় হৈ পৰা বুলি উল্লেখ কৰি তেওঁ কয় যে চৰকাৰে বাগানসমূহ বিক্ৰী কৰি নিজৰ ঘনিষ্ঠ ব্যৱসায়ীসকলক ক’লা ধন বগা কৰাৰ সুযোগ দিছে। ইয়াৰ উপৰি মুখ্যমন্ত্ৰী ড০ হিমন্ত বিশ্ব শৰ্মাৰ সমালোচনা কৰি গগৈয়ে কয় যে শিক্ষা আৰু স্বাস্থ্যৰ কোনো উন্নয়ন নকৰি চৰকাৰে কেৱল বাগিচাই বাগিচাই মদৰ দোকান খুলি দিছে যাতে সেই ধনেৰে চৰকাৰৰ ঋণ পৰিশোধ কৰিব পাৰে।
সভাখনত অংশগ্ৰহণ কৰি ঝাৰখণ্ডৰ প্ৰাক্তন মন্ত্ৰী তথা নিৰ্বাচনী পৰ্যবেক্ষক বন্ধু তিৰ্কীয়ে বিজেপি চৰকাৰক আদিবাসী সমাজৰ শত্ৰু বুলি অভিহিত কৰে। তেওঁ অভিযোগ কৰে যে বিজেপিয়ে আদিবাসীসকলৰ জলপানি বন্ধ কৰি দিছে আৰু এই সমাজক সদায় মজদুৰ হিচাপে ৰাখিব বিচাৰে যাতে তেওঁলোকৰ ল’ৰা-ছোৱালীয়ে চিকিৎসক বা অভিযন্তা হ’ব নোৱাৰে। আদিবাসীসকলৰ সংস্কৃতি আৰু পৰিচয় মচি পেলাবলৈ চেষ্টা কৰা এই চৰকাৰক নিৰ্বাচনত বিদায় দিবলৈ তেওঁ ৰাইজক আহ্বান জনায়। তেওঁৰ মতে কেৱল কংগ্ৰেছ চৰকাৰ আহিলেইহে চাহ জনগোষ্ঠী আৰু আদিবাসী সমাজৰ প্ৰকৃত বিকাশ সম্ভৱ হ’ব।
অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰেও মুখ্যমন্ত্ৰী আৰু বিজেপি চৰকাৰৰ বিৰুদ্ধে সৰৱ হৈ পৰে। তেওঁ অভিযোগ কৰে যে চৰকাৰী আঁচনি কাটি দিম বুলি ভয়-ভাবুকি দেখুৱাইহে মুখ্যমন্ত্ৰীয়ে বিভিন্ন সভালৈ মানুহ গোটায়, কিন্তু কংগ্ৰেছৰ সভাত মানুহ স্বতঃস্ফূৰ্তভাৱে আহে। মুখ্যমন্ত্ৰীৰ পৰিয়ালৰ সম্পত্তি বৃদ্ধিৰ বিষয়টোৰ লগতে বিজেপি চৰকাৰৰ শাসনত সাধাৰণ ৰাইজৰ দুৰ্দশাৰ কথা তেওঁ ভাষণত উল্লেখ কৰে। সভাত কংগ্ৰেছৰ বিভিন্ন সমষ্টিৰ প্ৰাৰ্থীসকলক ৰাইজৰ সৈতে চিনাকি কৰি দি নতুন অসম গঢ়াৰ স্বাৰ্থত দলৰ প্ৰাৰ্থীক বিপুল ভোটত জয়ী কৰিবলৈ আহ্বান জনোৱা হয়।
