তামিলনাডুৰ ৰাজনৈতিক বতাহত এতিয়া এক বিশেষ চৰ্চাই তীব্ৰ ৰূপ ধাৰণ কৰিছে। আগন্তুক বিধানসভা নিৰ্বাচনক কেন্দ্ৰ কৰি বিজেপি আৰু অভিনেতা বিজয়ৰ দল তামিলাগা ভেট্ৰি কাঝাগম চমুকৈ টিভিকেৰ মাজত এক গোপন বুজাবুজিৰ ইংগিত পোৱা গৈছে। দলীয় সূত্ৰৰ পৰা লাভ কৰা খবৰ অনুসৰি, যদিহে এই নিৰ্বাচনত এন ডি এ জোঁট বিজয়ী হয়, তেন্তে বিজয়ক উপ-মুখ্যমন্ত্ৰীৰ পদ দিয়াৰ প্ৰস্তাৱ আগবঢ়াইছে বিজেপিয়ে। কেৱল পদৱীয়েই নহয়, আসন ভাগ-বতৰাৰ ক্ষেত্ৰতো বিজেপিয়ে বিজয়ৰ দলক প্ৰায় ৮০খন আসন এৰি দিয়াৰ কথা চিন্তা কৰিছে। এই সমগ্ৰ বিষয়টোক লৈ বৰ্তমান দুয়োটা দলৰ মাজত আলোচনা চূড়ান্ত পৰ্যায়ত উপনীত হৈছে বুলি জানিব পৰা গৈছে।
এই নতুন ৰাজনৈতিক সমীকৰণে তামিলনাডুৰ নিৰ্বাচনী ফলাফলত এক ডাঙৰ প্ৰভাৱ পেলাব পাৰে বুলি ধাৰণা কৰা হৈছে। ৰাজ্যখনৰ নিৰ্বাচনত সাধাৰণতে ভোটৰ সামান্য সালসলনিয়েই জয়-পৰাজয় নিৰ্ণয় কৰে। সেইবাবেই বিজেপিয়ে বিজয়ৰ দৰে এজন জনপ্ৰিয় অভিনেতাক নিজৰ ফালে আনিবলৈ উঠি-পৰি লাগিছে। অৱশ্যে সূত্ৰই জনোৱা মতে, বিজয়ে কেৱল উপ-মুখ্যমন্ত্ৰীৰ পদতে সন্তুষ্ট নহৈ মুখ্যমন্ত্ৰীৰ পদৰ ওপৰতো চকু ৰাখিছে। এই বিষয়টোৱেই বৰ্তমান আলোচনাৰ মূল কেন্দ্ৰবিন্দু হৈ পৰিছে। বিজয়ক নিজৰ ফাললৈ আনিবলৈ বিজেপিয়ে বিভিন্ন মাধ্যম ব্যৱহাৰ কৰিছে আৰু আন এখন ৰাজ্যৰ এজন উপ-মুখ্যমন্ত্ৰীয়েও এই কামত মধ্যস্থতাকাৰী হিচাপে সহায় কৰি থকা বুলি চৰ্চা চলিছে।
বিজেপিৰ এই আগ্ৰহৰ মূল কাৰণ হ’ল তামিলনাডুত বিজয়ৰ থকা বিশাল জনপ্ৰিয়তা। বিজেপিৰ ৰণনীতিবিদসকলে বিশ্বাস কৰে যে বিজয়ৰ অনুৰাগীসকলৰ মাত্ৰ দুই শতাংশ ভোটেও বহুকেইটা সমষ্টিৰ ফলাফল সলনি কৰি দিব পাৰে। তামিলনাডুৰ নিৰ্বাচনী ইতিহাসত সদায় অতি কম ব্যৱধানত জয়-পৰাজয় হোৱা দেখা যায়, সেয়েহে বিজয়ৰ সৈতে মিত্ৰতা কৰিলে বিজেপিৰ বাবে সেয়া অতি লাভজনক হ’ব পাৰে। কিন্তু এই সকলোবোৰৰ মাজতে বিজয়ৰ ঘনিষ্ঠ উপদেষ্টা একাংশৰ মাজত কিছু অস্বস্তিও দেখা গৈছে। তেওঁলোকৰ মতে, নিৰ্বাচনৰ আগতেই কোনো ডাঙৰ ৰাষ্ট্ৰীয় দলৰ সৈতে মিত্ৰতা কৰিলে বিজয়ৰ স্বতন্ত্ৰ ভাবমূৰ্তি নষ্ট হ’ব পাৰে।
বিজয়ৰ উপদেষ্টা মহলৰ মাজত এই আশংকাই দেখা দিছে যে যদিহে তেওঁ অতি সোনকালে এন ডি এত যোগ দিয়ে, তেন্তে জনসাধাৰণৰ মাজত যি নতুন বিকল্পৰ আশা বিজয়ে জগাই তুলিছিল, সেই বিশ্বাসযোগ্যতা কমি যাব পাৰে। বিজয়ৰ দলটোৱে যি সতেজ ৰাজনৈতিক পৰিৱেশৰ কথা কৈছিল, সেয়া মিত্ৰতাৰ বাবে ফিঁকাসৰি যোৱাৰ ভয় আছে। এনে পৰিস্থিতিত এতিয়া সকলোৰে দৃষ্টি নিবদ্ধ হৈছে অভিনেতা বিজয়ৰ ওপৰত। তেওঁ বিজেপিৰ এই বিশাল প্ৰস্তাৱ গ্ৰহণ কৰিব নে নিজৰ স্বতন্ত্ৰ স্থিতি বজায় ৰাখিব, সেয়া সময়তহে স্পষ্ট হ’ব।
