ৰাজধানী দিল্লীত ব্যাপক অগ্নিকাণ্ডৰ ঘটনা সংঘটিত হৈছে। এই ঘটনাত ৭ জন লোকৰ মৃত্যু ঘটিছে। মৃতসকলৰ ভিতৰত ৩ টা শিশুও আছে। বুধবাৰে পুৱা দিল্লীৰ পালাম অঞ্চলৰ চাৰি মহলীয়া আৱাসগৃহত হঠাৎ অগ্নিকাণ্ড সংঘটিত হয়। জুইৰ শিখা নিমিষতে বিয়পি পৰে। এই ঘটনাত কেইবাজনো লোক আহত হয়।
পুৱা প্ৰায় ৭:৩০ বজাত জৰুৰীকালীন ফোন আহে। এই খবৰ পাই প্ৰায় ৩০ খন অগ্নিনিৰ্বাপক বাহিনীৰ গাড়ী ঘটনাস্থলীত উপস্থিত হয়। জুই নিৰ্বাপনৰ উপৰিও উদ্ধাৰ অভিযান এতিয়াও চলি আছে।
ঘটনাস্থলীত উপস্থিত হৈছে আৰক্ষী আৰু অন্যান্য জৰুৰীকালীন সেৱাৰ লোক। অগ্নিনিৰ্বাপক বাহিনীৰ সমন্বয়ত আৱদ্ধ লোকসকলক বাহিৰলৈ উলিয়াই অনাৰ প্ৰচেষ্টা চলোৱা হৈছে। ইতিমধ্যে বহু বাসিন্দাক উদ্ধাৰ কৰা হৈছে যদিও হতাহতৰ সংখ্যা বৃদ্ধি পাব পাৰে।
প্ৰত্যক্ষদৰ্শীয়ে দাবী কৰে যে ঘৰৰ পৰা হঠাতে ধোঁৱা ওলাবলৈ ধৰে আৰু তাৰ পিছত জুই দ্ৰুতগতিত বিয়পি পৰে। সেই সময়ত বহুতে শুই আছিল, যাৰ বাবে পৰিস্থিতি আৰু জটিল হৈ পৰে। চিঞৰ-বাখৰ আৰম্ভ হোৱাৰ লগে লগে স্থানীয় বাসিন্দাসকলেও উদ্ধাৰৰ কামত লাগি পৰে।
শ্বৰ্ট চাৰ্কিটৰ ফলত অগ্নিকাণ্ড সংঘটিত হৈছে নে আন কোনো কাৰণত সংঘটিত হৈছে তাৰ তদন্ত চলি আছে। প্ৰশাসনে তদন্ত আৰম্ভ কৰিছে।
আহতসকলক শীঘ্ৰে ওচৰৰ চিকিৎসালয়ত ভৰ্তি কৰোৱা হয়। ইয়াৰে কিছুমানৰ অৱস্থা সংকটজনক।
মুঠতে কাৰ্যালয় আৰম্ভৰ সময়ত ৰাতিপুৱাই এনে ঘটনাই অঞ্চলটোত চাঞ্চল্যৰ সৃষ্টি কৰিছে। অগ্নিনিৰ্বাপক বাহিনীৰ লগতে প্ৰশাসনে এই অগ্নিকাণ্ডক সম্পূৰ্ণ নিয়ন্ত্ৰণলৈ অনাৰ প্ৰচেষ্টা অব্যাহত ৰাখিছে। অঞ্চলটোত নিৰাপত্তা ব্যৱস্থা অধিক শক্তিশালী কৰা হৈছে।
