আগন্তুক অসম বিধানসভা নিৰ্বাচনৰ পৰিপ্ৰেক্ষিতত শুকুৰবাৰে, অৰ্থাৎ ২০ মাৰ্চ তাৰিখে হাফলং বিধানসভা সমষ্টিৰ পৰা নেচনেল পিপলছ পাৰ্টীৰ (এন পি পি) প্ৰাৰ্থী ডেনিয়েল লাংথাছাই আনুষ্ঠানিকভাৱে নিজৰ মনোনয়ন পত্ৰ দাখিল কৰে। মনোনয়ন পত্ৰ দাখিল কৰাৰ পাছতেই সংবাদ মাধ্যমৰ আগত শাসকীয় ভাৰতীয় জনতা পাৰ্টীৰ চৰকাৰক তীব্ৰ সমালোচনা কৰি তেওঁ ডিমা হাছাও জিলাত চৰকাৰে অসমতাপূৰ্ণ উন্নয়ন কৰা বুলি অভিযোগ উত্থাপন কৰে আৰু পাহাৰীয়া জিলাখনৰ ৰাইজে এতিয়া এক সুনিৰ্দিষ্ট পৰিৱৰ্তন বিচাৰিছে বুলি দাবী কৰে।
শুকুৰবাৰে দিনৰ প্ৰায় ১ বজাত এন পি পিৰ ৰাষ্ট্ৰীয় উপ-সভাপতি জেমছ চাংমা আৰু কেইবা হাজাৰ দলীয় সমৰ্থকৰ বিশাল সমদলৰ সৈতে লাংথাছা হাফলং জিলা আয়ুক্তৰ কাৰ্যালয়ত উপস্থিত হয়। তাত তেওঁ ৰিটাৰ্ণিং বিষয়া এ কে ইলিয়াছ আহমেদৰ ওচৰত নিজৰ মনোনয়ন পত্ৰসমূহ দাখিল কৰে। মনোনয়ন দাখিল প্ৰক্ৰিয়া সম্পন্ন কৰাৰ পাছত সংবাদ মাধ্যমৰ সৈতে হোৱা বাৰ্তালাপত তেওঁ কয় যে ডিমা হাছাও জিলাৰ জনসাধাৰণৰ অপাৰ মৰম আৰু আশীৰ্বাদ শিৰত লৈ তেওঁ এই নিৰ্বাচনত অৱতীৰ্ণ হৈছে। উত্তৰ-পূৰ্বাঞ্চলৰ পৰা উৎপত্তি হোৱা এন পি পি বৰ্তমান এক ৰাষ্ট্ৰীয় দল হিচাপে আত্মপ্ৰকাশ কৰাৰ কথা সোঁৱৰাই তেওঁ অঞ্চলটোৰ খিলঞ্জীয়া সম্প্ৰদায়সমূহক একত্ৰিত কৰাই দলটোৰ মূল লক্ষ্য বুলি মন্তব্য কৰে।
বিজেপি চৰকাৰৰ বিৰুদ্ধে সৰৱ হৈ লাংথাছাই অভিযোগ কৰে যে ডিমা হাছাও জিলাখনত উন্নয়নৰ নামত কেৱল বৈষম্যৰহে সৃষ্টি হৈছে। তেওঁৰ মতে, জিলাখনৰ মাত্ৰ পাঁচ শতাংশ লোকেহে চৰকাৰী আঁচনিৰ সুবিধা লাভ কৰিবলৈ সক্ষম হৈছে, আনহাতে ৯৫ শতাংশ লোকেই উন্নয়নৰ মুখ দেখা নাই। ইয়াৰ উপৰি ঠিকাদাৰসকলক প্ৰাপ্য ধন আদায় নিদিয়াৰ ফলত পথ নিৰ্মাণৰ কাম আধৰুৱা হৈ থকা, ৰন্ধন গেছৰ তীব্ৰ নাটনি আৰু ষষ্ঠ অনুসূচীভুক্ত এলেকাত ভূমি সুৰক্ষাৰ অভাৱৰ দৰে গুৰুত্বপূৰ্ণ বিষয়সমূহ তেওঁ উত্থাপন কৰে। স্থানীয় গাঁওবাসীৰ সন্মতি অবিহনে বৃহৎ পৰিমাণৰ ভূমি বহিঃৰাজ্যৰ কোম্পানীক হস্তান্তৰ কৰা বুলিও তেওঁ চৰকাৰৰ বিৰুদ্ধে গুৰুতৰ অভিযোগ আনে।
নিৰ্বাচনত জয়লাভ কৰিলে তেওঁ বিধানসভাত জনসাধাৰণৰ সমস্যাসমূহ সৱলভাৱে উত্থাপন কৰিব বুলি প্ৰতিশ্ৰুতি প্ৰদান কৰে। বিশেষকৈ সংবিধানৰ ২৪৪(ক) অনুচ্ছেদৰ সঠিক ৰূপায়ণ আৰু ষষ্ঠ অনুসূচীৰ ব্যৱস্থাসমূহ সুৰক্ষিত কৰাৰ দিশত তেওঁ নিৰন্তৰ কাম কৰি যাব বুলি স্পষ্ট কৰি দিয়ে। আনহাতে, নিৰ্বাচনী যুঁজখনৰ সন্দৰ্ভত মন্তব্য কৰি তেওঁ কয় যে বিজেপিৰ প্ৰাৰ্থী ৰূপালী লাংথাছাৰ বিৰুদ্ধে তেওঁৰ প্ৰতিদ্বন্দ্বিতা বিশেষ কঠিন নহ’ব। অৱশ্যে আন কোনো প্ৰাৰ্থী থকাহ’লে এই যুঁজ অধিক প্ৰত্যাহ্বানজনক হ’লহেঁতেন বুলিও তেওঁ তাৎপৰ্যপূৰ্ণ মন্তব্য কৰে।
