বাছ আৰু ডাঙৰ ট্ৰাকৰ মাজত ভয়ংকৰ সংঘৰ্ষ। বাতৰি অনুসৰি অন্ধ্ৰ প্ৰদেশৰ মাৰ্কাপুৰমৰ ৰায়াভাৰমৰ সমীপত এনে ভয়াবহ পথ দুৰ্ঘটনাত এতিয়ালৈকে ১০ জন লোকৰ মৃত্যু হৈছে। ৰাজ্যখনৰ মুখ্যমন্ত্ৰী চন্দ্ৰবাবু নাইডুৱে এই ঘটনাক লৈ উদ্বেগ প্ৰকাশ কৰিছে।
জানিব পৰা মতে, মাৰ্কাপুৰমৰ ৰায়াভাৰমৰ সমীপত সংঘটিত হৈছে এই ভয়াবহ পথ দুৰ্ঘটনা। এখন এখন ব্যক্তিগত ট্ৰেভেল বাছ খনন এলেকাৰ কাষেৰে পাৰ হৈ গৈ থকা অৱস্থাতে দুৰ্ঘটনাটো সংঘটিত হয়। সেই সময়ত বাছখনৰ লগত টিপাৰৰ (ডাঙৰ ট্ৰাক) সংঘৰ্ষ হয়। এই সংঘৰ্ষৰ পিছতে বাছখনত অগ্নিকাণ্ড সংঘটিত হয়। বাছখন দাউ দাউকৈ জ্বলি উঠে। সম্পূৰ্ণৰূপে বাছখন জ্বলি যায়। বাতৰি অনুসৰি এই পৰ্যন্ত ১০ জন লোকৰ মৃত্যু হৈছে।
ৰাজ্যৰ মুখ্যমন্ত্ৰী চন্দ্ৰবাবু নাইডুৱে এই পথ দুৰ্ঘটনাক লৈ গভীৰ শোক প্ৰকাশ কৰিছে। এই দুৰ্ঘটনাৰ পিছত মুখ্যমন্ত্ৰীয়ে একাংশ বিষয়াৰ সৈতেও আলোচনা কৰে। সেই সময়ত তেওঁ আহতসকলৰ চিকিৎসা সম্পৰ্কেও সবিশেষ জানিব বিচাৰে।
বিষয়াসকলে তেওঁক জনায় যে বাছখন হৰিকৃষ্ণ ট্ৰেভেলছৰ। তেলেংগানাৰ নিৰ্মলৰ পৰা নেল্লোৰলৈ গৈ আছিল। গৈ থকাৰ সময়তে বাছখনে টিপাৰ ট্ৰাকৰ সৈতে সংঘৰ্ষ ঘটে। খবৰ অনুসৰি বাছখনৰ ভিতৰত থকা কেইবাজনো যাত্ৰী জীৱন্তে অগ্নিদগ্ধ হৈ মৃত্যুমুখত পৰে।
জিলা আৰক্ষী বিষয়াসকলে মুখ্যমন্ত্ৰীক জনোৱা মতে, দুৰ্ঘটনাত আহত আৰু ২০ জন লোকক ততাতয়াকৈ বিভিন্ন চিকিৎসালয়লৈ স্থানান্তৰ কৰা হয়। তেওঁলোক চিকিৎসাধীন হৈ আছে। মৃতকৰ সংখ্যা আৰু বৃদ্ধি পাব পাৰে বুলি আশংকা প্ৰকাশ কৰিছে।
চন্দ্ৰবাবু নাইডুৱে দুৰ্ঘটনাৰ কাৰণ জানিবলৈ বিতং তদন্তৰ নিৰ্দেশ দিয়ে। তেওঁ অতি শীঘ্ৰে প্ৰতিবেদন দাখিল কৰিবলৈ কয়। ইয়াৰ সমান্তৰালভাৱে আহতসকলৰ চিকিৎসাৰ ক্ষেত্ৰত যাতে কোনো ধৰণৰ ত্ৰুটি নহয় তাৰ বাবেও মুখ্যমন্ত্ৰীয়ে পৰামৰ্শ দিয়ে।
