আলফা (স্বাধীন)ৰ হৈ ৰণত পৰাসকলৰ ক্ষেত্ৰত ‘শ্বহীদ’ অভিধা আৰু ব্যৱহাৰ নকৰে সংগঠনটোৱে। ‘শ্বহীদ’ৰ সলনি অসমৰ থলুৱা জনগোষ্ঠীৰ কথনত থকা অধিক অৰ্থব্যঞ্জক শব্দৰ সন্ধান কৰিছে আলফা (স্বাঃ)এ।
আৰৱী মূলৰ ‘শ্বহীদ’ শব্দটোৰ ইছলাম ধৰ্মীয় যোগসূত্ৰতা থকাৰ বাবে বহুদিন পূৰ্বেই শব্দটো ত্যাগ কৰি ‘শ্বহীদ’ৰ সলনি ‘অমৰ মৃতক’ শব্দটো ব্যৱহাৰ কৰি আহিছে বুলি এক প্ৰে’ছ বিবৃতিযোগে জনাইছে সংগঠনটোৰ সহকাৰী তথ্য আৰু প্ৰচাৰ সম্পাদক মে’জৰ অৰুণোদয় অসমে।
‘অমৰ মৃতক’ শব্দতকৈ অধিক অৰ্থব্যঞ্জক অসমৰ জনগোষ্ঠীয় কথনত থকা ‘শব্দক অসমীয়া ভাষালৈ উপহাৰ দি নিজৰ ভাষাৰ লগতে অসমীয়া ভাষাকো’ ‘টনকিয়াল’ কৰিব বুলি আলফা (স্বাঃ)এ আশা প্ৰকাশ কৰিছে।
‘ধৰ্মক প্ৰতিষ্ঠা আৰু ৰক্ষা কৰি মৃত্যু বৰণ কৰি আল্লা তথা ইছলামৰ শ্ৰেষ্ঠতাক প্ৰতিপন্ন কৰা’ জনক ‘শ্বহীদ’ বোলা হয় বুলি উল্লেখ কৰি আলফা (স্বাঃ)ৰ বিবৃতিত কোৱা হৈছে ‘ধৰ্মৰ সৈতে এই অকাট্য সংযোগটো আমি বুজি উঠাৰ লগে লগে, আমি আমাৰ ‘শ্বহীদ দিৱস’ৰ নাম পৰিৱৰ্তন কৰি ‘অমৰ মৃতক দিৱস’ কৰিছিলো।’
‘অসমৰ অমৰ মৃত বীৰ সন্তানসকল’ক অতীতত শ্বহীদ শব্দৰে কৰা ‘অন্যায় নামকৰণৰ বাবে ক্ষমা বিচাৰি’ এটা গীতো সংগঠনটোৱে প্ৰচাৰ কৰিছিল যদিও ‘সীমিত প্ৰচাৰ অথবা অস্পষ্টতাৰ বাবে বিষয়টো লৈ জনসমাজ অন্ধকাৰতে থাকিল’ বুলিও জনাই সংগঠনটোৱে।
দীননাথ ওৰফে গোপাল উপাধ্যায় নামৰ অপহৃত ব্যক্তিজনৰ ‘স্বীকাৰোক্তি’ৰ আলফা (স্বাঃ) নিৰ্মিত ভিডিঅ’ বাৰ্তা এটাক লৈ ‘আইছিছৰ দৰে ভিডিঅ’ জাৰি আলফা (স্বাঃ)ৰ’ বুলি দিৱাই৩৬৫ নামৰ অসমীয়া বাতৰি চেনেলটোৱে পৰিৱেশন কৰা বাতৰিত আপত্তি দৰ্শাই আলফা (স্বাঃ) ‘জাত-পাত, ধৰ্ম আদি অবিজ্ঞানিক চিন্তা-চৰ্চাৰ ঊৰ্ধ্বত’ বুলি দাবী কৰি সংগঠনটোৱে এই বিবৃতি জাৰি কৰিছিল।
