ধৰ্ষণ আৰু যৌন নিৰ্যাতনৰ গোচৰত ভুক্তভোগীৰ পৰিচয় গোপনীয় ৰখাৰ বাবে উচ্চতম ন্যায়ালয়ে স্পষ্ট নিৰ্দেশনা জাৰি কৰিছে। কিন্তু দেশৰ শীর্ষ ন্যায়ালয়ে পৰ্যবেক্ষণ কৰিছে যে সেই নীতি-নির্দেশনা মানি চলাত গাফিলতি হৈছে৷
উচ্চতম ন্যায়ালয়ে ধৰ্ষণৰ গোচৰত ভুক্তভোগীৰ পৰিচয় গোপনীয় ৰখাৰ ক্ষেত্ৰত পূৰ্বৰ নিৰ্দেশনাসমূহ যাতে কঠোৰভাৱে পালন কৰা হয়, তাৰ প্ৰতি লক্ষ্য ৰাখিছে। দেশৰ সকলো উচ্চ ন্যায়ালয়ৰ মহাপঞ্জীয়কক সেই নিৰ্দেশনা মানি চলিবলৈ নিৰ্দেশ দিয়া হৈছে। উচ্চতম ন্যায়ালয়ৰ দুগৰাকী ন্যায়াধীশে শেহতীয়াকৈ এটা ধৰ্ষণ গোচৰৰ ৰায়দানত এই বিষয়টোৰ কথা উল্লেখ কৰিছে।
উচ্চতম ন্যায়ালয়ৰ ন্যায়াধীশ সঞ্জয় কেৰল আৰু ন্যায়াধীশ কোটিশ্বৰ সিঙৰ বিচাৰপীঠত নাবালিকা ধৰ্ষণ সম্পৰ্কীয় এটা গোচৰৰ শুনানি চলি আছিল। সেই গোচৰত মঙলবাৰে উচ্চতম ন্যায়ালয়ে ৰায় দিয়ে। সেই ৰায়দানৰ প্ৰতিলিপিত ভুক্তভোগীৰ পৰিচয় গোপনীয় কৰি ৰখাৰ নিৰ্দেশনা মানি চলাৰ বিষয়টো উল্লেখ কৰা হৈছে।
ভুক্তভোগীৰ পৰিচয় গোপনীয় ৰখাৰ সন্দৰ্ভত বিগত সময়ত উচ্চতম ন্যায়ালয়ে দিয়া ৰায়ৰ কথাও উল্লেখ কৰা হৈছে। ২০১৮ চনৰ নিপুন ছাক্সেনা বনাম কেন্দ্ৰীয় চৰকাৰৰ গোচৰৰ কথাও উল্লেখ কৰে বিচাৰপীঠে। ৰায়দানত ভাৰতীয় দণ্ডবিধিৰ ২২৮এ ধাৰাৰ কথাও উল্লেখ কৰা হৈছে।
এই সন্দৰ্ভত শেহতীয়াকৈ উচ্চতম ন্যায়ালয়ৰ বিচাৰপীঠৰ ৰায়দানত কোৱা হৈছে যে, “এইটো দীৰ্ঘদিন ধৰি আইনত প্ৰতিষ্ঠা হৈ আহিছে। অৱশ্যে কাৰ্যক্ষেত্ৰত ইয়াক সঠিকভাৱে পালন কৰা হোৱা নাই। ধাৰণা কৰা হৈছে যে ইয়াৰ মূল কাৰণ নিম্ন আদালতবোৰত উদাসীনতা আৰু সজাগতাৰ অভাৱ।” ইয়াৰ লগতে ন্যায়াধীশ দুগৰাকীয়ে এই ৰায়দানৰ প্ৰতিলিপি সকলো উচ্চ ন্যায়ালয়ৰ মহাপঞ্জীয়কলৈ প্ৰেৰণ কৰিবলৈও নিৰ্দেশ দিয়ে।
উচ্চতম ন্যায়ালয়ে ভুক্তভোগীৰ পৰিচয় গোপনীয় কৰি ৰখাৰ কঠোৰ নিৰ্দেশ দিয়াৰ পিছতো ইয়াক অনুসৰণ কৰাৰ ক্ষেত্ৰত বিচ্যুতিৰ ঘটনা প্ৰায়ে পোহৰলৈ আহে। কলকাতাৰ আৰ জি কৰ মেডিকেল কলেজৰ এগৰাকী ছাত্ৰীক ধৰ্ষণ আৰু হত্যাকাণ্ডত ভুক্তভোগীৰ নাম পোহৰলৈ আহিছিল। ইয়াৰ ফলত এক বৃহৎ বিতৰ্কৰ সৃষ্টি হৈছিল।
