পৱন খেৰাৰ বিৰুদ্ধে চলি থকা আইনী প্ৰক্ৰিয়াক “ৰাজনৈতিক চক্ৰান্ত” বুলি অভিহিত কৰি কংগ্ৰেছ সাংসদ কে.চি. বেণুগোপালে ১০ এপ্ৰিলত অসমৰ মুখ্যমন্ত্ৰী হিমন্ত বিশ্ব শৰ্মাক তীব্ৰ সমালোচনা কৰে। নিৰ্বাচনৰ পূৰ্বে বিৰোধী নেতাসকলৰ বিৰুদ্ধে মুখ্যমন্ত্ৰীগৰাকীয়ে ধাৰাবাহিকভাৱে ভিত্তিহীন অভিযোগ উত্থাপন কৰি অহা বুলি বেণুগোপালে অভিযোগ কৰে।
সাংবাদিকৰ সৈতে হোৱা কথা-বতৰাত বেণুগোপালে কয় যে মুখ্যমন্ত্ৰী শৰ্মাই ইয়াৰ পূৰ্বে কংগ্ৰেছ নেতা গৌৰৱ গগৈ আৰু তেওঁৰ পত্নীৰ বিৰুদ্ধেও ভিত্তিহীন অভিযোগ উত্থাপন কৰিছিল। তেওঁ কয়, “হিমন্ত বিশ্ব শৰ্মাই গৌৰৱ গগৈ আৰু তেওঁৰ পত্নীৰ বিৰুদ্ধে বাৰে বাৰে মিছা অভিযোগ তুলি আহিছে। নিৰ্বাচনৰ আগে আগে তেওঁ ভিত্তিহীন কাহিনী বিয়পাই দিয়ে কিন্তু কেতিয়াও প্ৰমাণ দাঙি নধৰে। এতিয়া তেওঁ পৱন খেৰাক লক্ষ্য কৰি লৈছে। এয়া ৰাজনৈতিক চিকাৰৰ বাহিৰে আন একো নহয়। আমি ইয়াৰ মোকাবিলা কৰিম।”
উল্লেখ্য যে, আজি তেলেংগানা উচ্চ ন্যায়ালয়ে অসমৰ মুখ্যমন্ত্ৰীৰ পত্নী ৰিণিকি ভূঞা শৰ্মাই দাখিল কৰা এক এজাহাৰৰ ভিত্তিত পৱন খেৰাক এসপ্তাহৰ বাবে অগ্ৰিম জামিন প্ৰদান কৰে। পাছপোৰ্ট আৰু সম্পত্তিৰ তথ্য ফাদিলক লৈ খেৰাই কৰা এক অভিযোগৰ পাছতে এই গোচৰটো ৰুজু কৰা হৈছিল।
তেলেংগানা প্ৰদেশ কংগ্ৰেছ কমিটীৰ আইনী কোষৰ সদস্য পন্নম অশোক গৌড়ে জনোৱা মতে, ন্যায়ালয়ে খেৰাক পৰৱৰ্তী আইনী সকাহৰ বাবে সংশ্লিষ্ট ক্ষেত্ৰাধিকাৰ থকা আদালতৰ কাষ চাপিবলৈ এসপ্তাহৰ সময় দিছে।
সমগ্ৰ বিতৰ্কৰ সূত্ৰপাত হৈছিল পৱন খেৰাৰ এক অভিযোগৰ পৰা, য’ত তেওঁ দাবী কৰিছিল যে ৰিণিকি ভূঞা শৰ্মাৰ হাতত ভাৰত, ইউ এ ই আৰু মিচৰৰ তিনিখনকৈ পাছপোৰ্ট আছে আৰু ডুবাইত তেওঁৰ বেনামী বিলাসীবহুল সম্পত্তিৰ লগতে আমেৰিকাৰ ৱাইমিঙত এটা কোম্পানী আছে।
অৱশ্যে শৰ্মা পৰিয়ালে এই সকলো অভিযোগ দৃঢ়তাৰে অস্বীকাৰ কৰিছে। তেওঁলোকে জনাইছে যে এই অভিযোগৰ সমৰ্থনত যিবোৰ নথি-পত্ৰ বিয়পোৱা হৈছে সেইবোৰ “এআই (AI) দ্বাৰা নিৰ্মিত ভুৱা নথি” আৰু পাকিস্তানৰ ছচিয়েল মিডিয়া গ্ৰুপৰ জৰিয়তে এইবোৰ প্ৰচাৰ কৰা হৈছে।
আনহাতে, মুখ্যমন্ত্ৰী হিমন্ত বিশ্ব শৰ্মাই এই সন্দৰ্ভত প্ৰতিক্ৰিয়া ব্যক্ত কৰি কয় যে আইন নিজৰ পথেৰে চলিব আৰু তেওঁ এই মিছা অভিযোগৰ বিৰুদ্ধে কঠোৰ আইনী ব্যৱস্থা গ্ৰহণ কৰিব। তেওঁ কংগ্ৰেছ নেতৃত্বকো সমালোচনা কৰি অভিযোগ কৰে যে আইনী প্ৰক্ৰিয়া আৰম্ভ হোৱাৰ পাছতে খেৰা হায়দৰাবাদলৈ পলাই গৈছিল।
আগন্তুক গুৰুত্বপূৰ্ণ নিৰ্বাচনৰ পূৰ্বে বিজেপি আৰু কংগ্ৰেছৰ মাজত চলি থকা এই বাকযুদ্ধই ৰাজ্যিক ৰাজনীতি উত্তপ্ত কৰি তুলিছে। দুয়োটা দলেই ইজনে সিজনৰ বিৰুদ্ধে অপপ্ৰচাৰ আৰু ৰাজনৈতিক প্ৰতিশোধৰ অভিযোগ উত্থাপন কৰিছে।
