মেঘালয়ৰ গাৰো পাহাৰত শেহতীয়াকৈ গৱেষকসকলে এবিধ নতুন প্ৰজাতিৰ সাপৰ সন্ধান লাভ কৰিছে। এই আৱিস্কাৰে ৰাজ্যখনৰ জৈৱ বৈচিত্ৰ্যৰ তালিকাত এক নতুন মাত্ৰা যোগ কৰিছে। কেলামাৰিয়া গাৰোৱেনচিছ নামৰ এই নতুন সাপবিধ আচলতে কেলমেৰিয়া বা ৰিড স্নেক নামৰ এটা বিশেষ গোটৰ অন্তৰ্ভুক্ত। এই সাপবোৰ সচৰাচৰ বহুত সৰু হয় আৰু ইহঁতে বেছিভাগ সময় মাটিৰ তলতে অতিবাহিত কৰে।
দীৰ্ঘদিন ধৰি উত্তৰ-পূব ভাৰতকে ধৰি দক্ষিণ-পূব এছিয়াৰ বিভিন্ন প্ৰান্তত পোৱা এনেধৰণৰ সাপবোৰক বিজ্ঞানীসকলে কেলামাৰিয়া পেভিমেন্টেট নামৰ এক নিৰ্দিষ্ট শ্ৰেণীত অন্তৰ্ভুক্ত কৰি আহিছিল। কিন্তু এই শ্ৰেণী বিভাজনক লৈ বিজ্ঞানীসকলৰ মাজত দীৰ্ঘদিন ধৰি মতানৈক্য চলি আছিল। ইয়াৰ পূৰ্বে মিজোৰামত কেলামাৰিয়া মিজোৰামেনচিছ নামৰ আন এবিধ সাপৰ প্ৰজাতি ধৰা পৰিছিল, যিয়ে প্ৰমাণ কৰিছিল যে পূৰ্বতে এটা বুলি ভবা এই সাপৰ প্ৰজাতিবোৰৰ ভিতৰত আচলতে বহুতো বেলেগ বেলেগ বংশ আছে।
পশ্চিম গাৰো পাহাৰৰ ওৰাগিতোক গাঁৱত নিশাৰ ভাগত কৰা এক গৱেষণাৰ সময়তে এই নতুন সাপবিধ উদ্ধাৰ কৰা হয়। বিশেষকৈ বৰষুণৰ পিছত যেতিয়া এই সাপবোৰ মাটিৰ পৰা বাহিৰলৈ ওলাই আহে, তেতিয়াই গৱেষকৰ দলটোৱে ইয়াক বিচাৰি পাইছিল। এই প্ৰজাতিটোৰ সঠিক পৰিচয় নিশ্চিত কৰিবলৈ বিজ্ঞানীসকলে মেঘালয়ৰ শ্বিলঙত থকা ভাৰতীয় প্ৰাণী বিজ্ঞান জৰীপ কেন্দ্ৰত সংৰক্ষিত কৰি থোৱা পুৰণি নমুনাৰ সৈতেও তুলনা কৰি চাইছিল। সাপটোৰ শাৰীৰিক গঠন আৰু জিনীয় পৰীক্ষাৰ অন্তত ই এক নতুন প্ৰজাতি বুলি স্পষ্ট হৈ পৰে।
গৱেষণাৰ পৰা দেখা গৈছে যে এই বিশেষ সাপবিধ কেৱল গাৰো পাহাৰৰ এক নিৰ্দিষ্ট উচ্চতাৰ ঠাইতহে পোৱা যায়, অৰ্থাৎ এই সাপবিধ পৃথিৱীৰ কেৱল সেই ঠাইখিনিতহে আছে। এই নতুন আৱিষ্কাৰৰ কথা টাপ্ৰোবানিকা নামৰ এখন আন্তৰ্জাতিক বিজ্ঞান পত্ৰিকাত প্ৰকাশ পাইছে। মেঘালয়ৰ মুখ্যমন্ত্ৰী কনৰাড চাংমাই এই কয় যে এই আৱিষ্কাৰে ৰাজ্যখনৰ প্ৰাকৃতিক সম্পদৰ চহকী পৰিচয় দিয়াৰ লগতে প্ৰকৃতি সংৰক্ষণৰ প্ৰয়োজনীয়তাৰ কথা সোঁৱৰাই দিছে। এই কামৰ সৈতে জড়িত সকলো গৱেষক আৰু প্ৰতিষ্ঠানক তেওঁ ধন্যবাদ জ্ঞাপন কৰে।
