অহা দুসপ্তাহত অসমৰ বিভিন্ন প্ৰান্তত স্বাভাৱিকতকৈ অধিক পৰিমাণৰ বৰষুণ হোৱাৰ সম্ভাৱনা আছে বুলি শেহতীয়া বতৰ বিজ্ঞানৰ আগজাননীত প্ৰকাশ পাইছে।
বিশেষকৈ ৰাজ্যখনৰ কেইবাটাও অঞ্চলত অত্যধিক বৰষুণ হোৱাৰ আশংকাই এতিয়া জনসাধাৰণৰ মাজত উদ্বেগৰ সৃষ্টি কৰিছে।
বতৰ বিজ্ঞান কেন্দ্ৰৰ তথ্য অনুসৰি অহা ২৪ এপ্ৰিলৰ পৰা ৩০ এপ্ৰিললৈকে উত্তৰ-পূব অসমৰ বেছিভাগ অংশ আৰু পশ্চিম অসমৰ কিছু কিছু ঠাইত বৰষুণৰ মাত্ৰা যথেষ্ট বৃদ্ধি পাব। ইয়াৰ উপৰিও মধ্য অসম আৰু দক্ষিণ অসমৰ কিছু কিছু অঞ্চলত এই সময়ছোৱাত অতিপাত বৰষুণ হোৱাৰ পূৰ্ণ সম্ভাৱনা আছে।
পৰৱৰ্তী সপ্তাহটো অৰ্থাৎ ১ মে’ৰ পৰা ৭ মে’লৈকেও বৰষুণৰ এই ধাৰা অব্যাহত থাকিব বুলি জানিব পৰা গৈছে।
এই সময়ছোৱাত মধ্য, পশ্চিম আৰু উত্তৰ-পূব অসমৰ অধিকাংশ ঠাইতে স্বাভাৱিকতকৈ অধিক বৰষুণ হ’ব পাৰে। বিশেষকৈ দক্ষিণ অসমত মে’ মাহৰ প্ৰথম সপ্তাহত অত্যধিক বৰষুণ হোৱাৰ আগলি বতৰা দিয়া হৈছে। বৰষুণৰ এনে প্ৰবল বৃদ্ধিয়ে ৰাজ্যখনৰ জনজীৱনত প্ৰভাৱ পেলোৱাৰ সম্ভাৱনা আছে।
বতৰৰ এই পৰিৱৰ্তনৰ প্ৰতি লক্ষ্য ৰাখি সংশ্লিষ্ট বিভাগৰ বিষয়াসকলে প্ৰশাসন আৰু সাধাৰণ ৰাইজক সজাগ হৈ থাকিবলৈ আহ্বান জনাইছে। যিবোৰ অঞ্চলত কৃত্ৰিম বানপানী বা পানী জমা হোৱাৰ সমস্যা আছে, সেইসমূহ ঠাইত বিশেষ সাৱধানতা অৱলম্বন কৰিবলৈ পৰামৰ্শ দিয়া হৈছে। সম্ভাৱ্য পৰিস্থিতিৰ সৈতে মোকাবিলা কৰিবলৈ প্ৰয়োজনীয় প্ৰস্তুতি চলাই ৰাখিবলৈও কৰ্তৃপক্ষই নিৰ্দেশ দিছে। বৰষুণৰ ফলত হ’ব পৰা যিকোনো অসুবিধাৰ পৰা হাত সাৰিবলৈ সকলোকে আগতীয়াকৈ সাজু থাকিবলৈ জনোৱা হৈছে।
