বৈভৱ সূৰ্য্যবংশীৰ অভিলেখ আৰু বিধ্বংসী শতক – সকলো যেন নিমিষতে ম্লান হৈ পৰিল। প্ৰথমে বেটিং কৰি ৰাজস্থান ৰয়েলছে ৬ উইকেটত ২২৮ ৰানৰ বিশাল স্ক’ৰ কৰে। বৈভৱৰ বিস্ফোৰক ইনিংছৰে গঢ়ি তোলা পাহাৰসম লক্ষ্য দিও শেষ হাঁহিব মাৰিব নোৱাৰিলে ৰাজস্থানে।
শনিবাৰে ছোৱাই মানসিং ষ্টেডিয়ামত অনুষ্ঠিত হোৱা ডাবল হেডাৰৰ দ্বিতীয়খন খেলত আৰম্ভণিৰে পৰাই তীব্ৰ উত্তেজনা সৃষ্টি হৈছিল। কিন্তু মেচখন আগবাঢ়ি যোৱাৰ লগে লগে ছবিখন সলনি হৈ গ’ল। ৰাজস্থানৰ ডাঙৰ স্ক’ৰৰ চাপ ছানৰাইজাৰ্ছ হায়দৰাবাদৰ সপক্ষে সলনি কৰিলে।
শেষ মুহূৰ্তত সোমাই আহি হাইদৰাবাদৰ বেটছমেনে সহজেই জয় কাঢ়ি লৈ যায়। হায়দৰাবাদ যেতিয়া বেটিং কৰিবলৈ ওলাই আহিছিল, তেতিয়া আৰম্ভণিৰে পৰাই বিৰাট চাপ আছিল। কিন্তু তেওঁলোকে কেতিয়াও নিয়ন্ত্ৰণ হেৰুৱা নাছিল। সেইবাবেই এছ আৰ এইচে ৯টা বল বাকী থকা অৱস্থাতে ৫ উইকেটত জয়লাভ কৰে।
এপিনে বৈভৱৰ ঐতিহাসিক শতক আৰু ৰাজস্থানৰ বিশাল স্ক’ৰ, আনফালে হায়দৰাবাদৰ শীতল মস্তিস্কৰ ৰান চেজ – শেষত জয়পুৰৰ নিশাটো এছ আৰ এইচৰ বাবে ৰঙীন হৈ পৰিল আৰু ৰাজস্থানৰ বাবে কেৱল অনুশোচনা আৰু হেৰুৱা সুযোগৰ কাহিনীহে বাকী থাকিল। দিনটোৰ শেষত স্ক’ৰব’ৰ্ডত ৰাজস্থানৰ ৰান ডাঙৰ আছিল যদিও হায়দৰাবাদে জয়লাভ কৰিছিল আৰু বৈভৱৰ সপোনৰ ইনিংছটো কেৱল ৰেকৰ্ড বুকৰ পাততহে ৰৈ গ’ল৷
এই খেলখনত পুনৰ ৰাজস্থানৰ বেটিঙৰ কেন্দ্ৰত আছিল বৈভৱ সূৰ্যবংশী। ছানৰাইজাৰ্ছ হায়দৰাবাদৰ বলিং আক্ৰমণ তচনচ কৰি গ’ল তেওঁৰ বেটিঙৰ ধুমুহাই। মেচৰ নিয়ন্ত্ৰণ লৈ তেওঁ এককভাৱে ৰাজস্থানক বিশাল স্ক’ৰলৈ লৈ যায়। ৰাজস্থানে টছ হাৰি বেটিং কৰিবলৈ যায়। ইনিংছৰ তৃতীয় অভাৰত যশস্বী জয়ছোৱালে মাত্ৰ ৮টা বলত ১০ ৰান সংগ্ৰহ কৰি উভতি আহে। কিন্তু তাৰ পিছত মেচখনৰ ছবিখন সলনি হ’ল। বৈভৱে দায়িত্ব ল’লে, তেওঁৰ লগত ধ্ৰুৱ জুৰেলেও সংগ দিয়ে। দ্বিতীয় উইকেটত ১১২ ৰানৰ ডাঙৰ স্ক’ৰ গঢ় লৈ উঠিছিল।
বৈভৱৰ আৰম্ভণিৰে পৰাই আক্ৰমণাত্মক মুডত আছিল। ইটোৰ পিছত সিটো ছয়ৰ ফলত বিধ্বস্ত হৈ পৰিল বলাৰসকল। আনহাতে, জুৰেলে ৮টা চাৰি আৰু এটা ছয়ৰ সহায়ত ৩৫টা বলত ৫১ ৰান সংগ্ৰহ কৰি ইনিংছটো সুস্থিৰ কৰি ৰাখিছিল। কিন্তু আচল ধুমুহাটো আছিল বৈভৱৰ বেটত। তেওঁ ৩৬টা বলত শতক স্পৰ্শ কৰি সমগ্ৰ ষ্টেডিয়ামখনক স্তম্ভিত কৰি তুলিছিল, ইয়াৰ পূৰ্বে তেওঁ ৩৫টা বলত কৰিছিল, এইবাৰ পুনৰবাৰ ইতিহাসৰ দুৱাৰত টুকুৰিয়াইছিল। শেষত ৩৭টা বলত ১০৩ ৰান কৰি ৰৈ যায়। ইনিংছত আছিল ১২টা ছয় আৰু ৫টা চাৰি। তেওঁ মাত্ৰ ১৫টা বলত অৰ্ধশতক অৰ্জন কৰি আৰম্ভণিৰে পৰাই বলাৰসকলক আক্ৰমণ কৰিছিল। পেট কামিন্সকে ধৰি হায়দৰাবাদৰ বলাৰসকলে মিডল অভাৰত চাপ প্ৰয়োগ কৰিছিল যদিও বৈভৱৰ সন্মুখত প্ৰায় অসহায় হৈ পৰিছিল।
ইয়াৰ উপৰিও ড’নভান ফেৰেইৰাই ১৬টা বলত ৩৩ ৰান সংগ্ৰহ কৰে। অৱশ্যে ৰাজস্থানৰ অধিনায়ক ৰিয়ান পৰাগ পুনৰ ব্যৰ্থ হয়, ৯টা বলত ৭ ৰান কৰি আউট হয়। শেষৰ ফালে সৰু ইনিংছ এটা খেলিলেও ৰাজস্থানে ২২৮/৬ ৰানত ৰৈ যায়। অৱশ্যে গোটেই ইনিংছটোত আলোচনাত এটাই নাম আছিল – বৈভৱ সূৰ্য্যবংশী। এই ইনিংছৰ জৰিয়তে তেওঁ পুনৰবাৰ আই পি এলৰ ইতিহাসত নিজৰ নাম খোদিত কৰিলে। মাত্ৰ ১৫ বছৰ বয়সতে তেওঁ এতিয়া এনে এখন ঠাইত থিয় হৈ আছে য’ত অভিলেখে তেওঁক অনুসৰণ কৰে, তেওঁ অভিলেখৰ পিছত নদৌৰে।
২২৯ ৰানৰ বিশাল লক্ষ্যৰ খেদি ছানৰাইজাৰ্ছ হায়দৰাবাদে প্ৰথম অভাৰত বিপৰ্যয়ৰ সন্মুখীন হৈ ট্ৰেভিছ হেডৰ উইকেট হেৰুৱাই পেলায়। কিন্তু তাৰ পিছত মেচখনৰ ছবিখন সলনি হ’ল। অভিষেক শৰ্মা আৰু ঈশান কিষানে পিংক চিটিত ধুমুহাৰ সৃষ্টি কৰে।
দ্বিতীয় উইকেটত ১৩২ ৰানৰ বিস্ফোৰক যুটীৰে দুয়োজনে খেলখনৰ জোৱাৰ সম্পূৰ্ণৰূপে ঘূৰাই পেলালে। অভিষেকে ২৯টা বলত ৫৭ ৰানৰ দুৰ্দান্ত ইনিংছ খেলিছিল, য’ত ১১টা চাৰি আৰু ১টা ছয় আছিল। আনহাতে ঈশানে অধিক আক্ৰমণাত্মক মুডত বেটিং কৰে। যিহেতু অধিনায়ক পেট কামিন্সৰ প্ৰত্যাৱৰ্তনত মেচখনত নেতৃত্বৰ কোনো চাপ নাছিল, সেয়েহে তেওঁ উইকেটকীপাৰ বেটছমেন হিচাপে আক্ৰমণাত্মক ইনিংছ খেলিছিল। ঈশানে মাত্ৰ ৩১টা বলত ৭৪ ৰানৰ বিধ্বংসী ইনিংছ খেলিছিল, য’ত ১১টা চাৰি আৰু ৩টা ছয় আছিল। তেওঁৰ বিস্ফোৰক বেটিঙে মেচখন সম্পূৰ্ণৰূপে এছ আৰ এইচৰ পক্ষত লৈ গ’ল।
ইয়াৰ বাহিৰেও হাইনৰিখ ক্লাচেনে ২৪টা বলত ২৯ ৰান সংগ্ৰহ কৰাৰ লগতে নীতিশ কুমাৰ ৰেড্ডীয়ে মাত্ৰ ১৮টা বলত ৩৬ ৰান সংগ্ৰহ কৰি মেচখন জয়ৰ মুখলৈ লৈ যায়। শেষত সলিল অৰোৰাই ৩টা বলত ৮ ৰান সংগ্ৰহ কৰি খেলখন সমাপ্ত কৰে। শেষত ছানৰাইজাৰ্ছ হায়দৰাবাদে ১৮.৩ অভাৰত ৫ উইকেটত ২২৯ ৰান সংগ্ৰহ কৰি সহজ জয় নিশ্চিত কৰে। ৰাজস্থানৰ ডাঙৰ স্ক’ৰ আৰু বৈভৱ সূৰ্যবংশীৰ অভিলেখ ইনিংছক ম্লান কৰি হায়দৰাবাদৰ বেটিং পৰাক্ৰমে এই মেচখনত শেষ হাঁহি মাৰে।
