দিল্লী আবকাৰী কেলেংকাৰীৰ গোচৰত ন্যায়াধীশ ড০ স্বৰ্ণ কান্ত শৰ্মাক বৰ্জন কৰাৰ সিদ্ধান্ত গ্ৰহণ কৰিছে প্ৰাক্তন মুখ্যমন্ত্ৰী অৰবিন্দ কেজৰিৱালে। এই গোচৰত ন্যায়াধীশ শৰ্মাৰ বিচাৰপীঠত হাজিৰ নহয় বুলি স্পষ্ট কৰি দিছে। কাৰণ, ন্যাযাধীশগৰাকীৰ ওপৰত তেওঁ আস্থা হেৰুৱাইছে। সেয়ে মহাত্মা গান্ধীয়ে দেখুৱাই যোৱা ‘সত্যগ্ৰহ’ৰ পথত খোজ দি তেওঁক বৰ্জন কৰাৰ সিদ্ধান্ত লৈছে।
সোমবাৰে ন্যায়াধীশ শৰ্মালৈ প্ৰেৰণ কৰা এখন পত্ৰত কেজৰিৱালে ক্ষোভ প্ৰকাশ কৰে। কেন্দ্ৰীয় চৰকাৰৰ পেনেল উকীল হিচাপে কাম কৰা ন্যায়াধীশ শৰ্মাৰ সন্তানৰ ছলিচিটৰ জেনেৰেল তুষাৰ মেহতাৰ সৈতে সম্পৰ্ক আছে বুলি দাবী কৰে দিল্লীৰ প্ৰাক্তন মুখ্যমন্ত্ৰীগৰাকীয়ে। ইপিনে, আবকাৰী গোচৰত পুনৰ তুষাৰ মেহতাৰ বিৰুদ্ধে যুঁজিছে। কেজৰিৱালে ন্যায় প্ৰদানৰ বাবে ন্যায়াধীশ শৰ্মাৰ ওপৰত আস্থা হেৰুৱাইছে বুলি কয়।
তেওঁ নিজৰ এক্স হেণ্ডেলত লিখিছে, ‘মই ন্যায়াধীশ স্বৰ্ণ কান্ত শৰ্মালৈ চিঠি লিখিছো। ইয়াত মই স্পষ্টকৈ কৈছো যে গান্ধীবাদী সত্যাগ্ৰহ নীতি অনুসৰণ কৰি তেওঁৰ আদালতত ব্যক্তিগতভাৱে বা অধিবক্তাৰ জৰিয়তে হাজিৰ হোৱাটো মোৰ বাবে সম্ভৱ নহয়।’
যোৱা জানুৱাৰী মাহত দিল্লীৰ ৰাউছ এভিনিউ আদালতে আবকাৰী দুৰ্নীতিৰ গোচৰত কেজৰিৱাল, মনীষ চিছ’দিয়াকে ধৰি আন আন আপ নেতাক মুকলি কৰি দিছিল। সেই নিৰ্দেশক প্ৰত্যাহ্বান জনাই কেন্দ্ৰীয় তদন্তকাৰী সংস্থা চিবিআইয়ে দিল্লী উচ্চ ন্যায়ালয়ত নতুনকৈ আবেদন দাখিল কৰিছে। সেই গোচৰৰ শুনানি চলি আছে ন্যায়াধীশ শৰ্মাৰ বিচাৰপীঠত।
কিন্তু ন্যায়াধীশ শৰ্মা পক্ষপাতদুষ্ট বুলি দাবী কৰিছে আপে। কেজৰিৱাল আৰু অন্যান্য অভিযুক্তসকলে আবকাৰী দুৰ্নীতিৰ গোচৰৰ পৰা তেওঁক নিজকে আঁতৰাই ৰাখিবলৈ আবেদন দাখিল কৰে। কিন্তু সেই আবেদন নাকচ কৰা হ’ল। এই গোচৰত দিল্লীৰ প্ৰাক্তন মুখ্যমন্ত্ৰীগৰাকীয়ে নিজেই যুক্তি আগবঢ়াইছিল। এনে পৰিস্থিতিত কেজৰিৱালে এইবাৰ ন্যায়াধীশ শৰ্মাক বৰ্জন কৰাৰ সিদ্ধান্ত লৈছে।
