গুজৰাটৰ শেহতীয়া পৌৰ নিৰ্বাচনত গেৰুৱা বাহিনীয়ে লাভ কৰিছে অভূতপূৰ্ব সফলতা। ৰাজ্যখনৰ ১৫খন পৌৰ নিগমৰ আটাইকেইখনতে জয়লাভ কৰি বিজেপিয়ে একচ্ছত্ৰী আধিপত্য বিস্তাৰ কৰিবলৈ সক্ষম হৈছে। প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ গৃহ ৰাজ্যখনত বিজেপিয়ে ৫০ শতাংশতকৈও অধিক ভোট লাভ কৰি এই বিশাল বিজয় সাব্যস্ত কৰিছে। এই নিৰঙ্কুশ জয়ৰ ফলত গুজৰাটত বিৰোধী কংগ্ৰেছ আৰু আম আদমী পাৰ্টীৰ দৰে দলসমূহ সম্পূৰ্ণৰূপে বিধ্বস্ত হৈ পৰা দেখা গৈছে।
এই নিৰ্বাচনী ফলাফলৰ ভিতৰত আহমেদাবাদৰ দৃশ্য আটাইতকৈ আকৰ্ষণীয় আছিল। আহমেদাবাদ পৌৰ নিগমৰ ১৯২খন আসনৰ ভিতৰত বিজেপিয়ে ১৪৬খন আসনত জয়লাভ কৰাৰ বিপৰীতে কংগ্ৰেছে মাত্ৰ ১৮খন আসনহে লাভ কৰিছে। আনহাতে চুৰাটত অৰবিন্দ কেজৰিৱালৰ আম আদমী পাৰ্টীৰ শোচনীয় পৰাজয় ঘটিছে। যোৱাবাৰৰ নিৰ্বাচনত চুৰাটত ২৭খন আসন লাভ কৰি চমক সৃষ্টি কৰা আপে এইবাৰ মাত্ৰ ৪খন আসনতে সন্তুষ্ট থাকিবলগীয়া হৈছে। ইয়াৰ বিপৰীতে হীৰাৰ চহৰ হিচাপে পৰিচিত চুৰাটত বিজেপিয়ে ১১৫খন আসনত জয়লাভ কৰিছে। একেদৰে ৰাজকোট আৰু ভদোদৰাতো বিজেপিয়ে ৬৫খনকৈ আসন লাভ কৰি পৌৰসভা নিজৰ দখললৈ আনিছে।
বিজেপিয়ে কেৱল ডাঙৰ চহৰসমূহতে নহয়, বৰঞ্চ সুৰেন্দ্ৰনগৰ, জামনগৰ, পৰবন্দৰ, কৰমচদ-আনন্দ, নাদীয়াদ, নৱসাৰী, ভাপি আৰু মৰবী আদিকে ধৰি ১৫খন পৌৰ নিগমতে সংখ্যাগৰিষ্ঠতা অৰ্জন কৰিছে। উল্লেখ্য যে দেওবাৰে গুজৰাটত ১৫খন পৌৰ নিগমৰ লগতে ৮৪খন পৌৰসভা, ৩৪খন জিলা পঞ্চায়ত আৰু ২৬০খন তালুকা পঞ্চায়তৰ বাবে ভোটগ্ৰহণ অনুষ্ঠিত হৈছিল। প্ৰায় সকলো ক্ষেত্ৰতে বিজেপিৰ জয়জয়কাৰ হোৱা দেখা গৈছে যদিও কিছুমান গ্ৰাম্য অঞ্চলত কংগ্ৰেছ আৰু আম আদমী পাৰ্টীয়ে সামান্য সফলতা লাভ কৰিবলৈ সক্ষম হৈছে। সামগ্রিকভাৱে এই নিৰ্বাচনী ফলাফলে গুজৰাটত বিজেপিৰ ভেটি অধিক শক্তিশালী হোৱাটোকে প্ৰমাণ কৰিছে।
