কংগ্ৰেছ সাংসদ ৰাহুল গান্ধীয়ে গ্ৰেট নিকোবৰ ভ্ৰমণৰ সময়ত উত্থাপন কৰা পাৰিপাৰ্শ্বিক ক্ষতিৰ উদ্বেগৰ পিছতেই কেন্দ্ৰীয় চৰকাৰে এই প্ৰকল্পক লৈ নিজৰ স্থিতি স্পষ্ট কৰিছে। কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ে শুকুৰবাৰে এক বিবৃতিত কয় যে এই ৮১,০০০ কোটি টকীয়া প্ৰকল্পটো ধ্বংসৰ কাৰণ নহয়, বৰঞ্চ ই ভাৰত-প্ৰশান্ত মহাসাগৰীয় অঞ্চলত ভাৰতৰ স্থিতি মজবুত কৰাৰ লগতে বিদেশী বন্দৰৰ ওপৰত নিৰ্ভৰশীলতা হ্ৰাস কৰাৰ এক কৌশলগত পদক্ষেপহে।
বিষয়া সকলে জানিবলৈ দিয়া মতে, এই দ্বীপটো পৃথিৱীৰ ব্যস্ত পূব-পশ্চিম জলপথৰ পৰা মাত্ৰ ৪০ নটিকেল মাইল দূৰত অৱস্থিত, যিয়ে ইয়াক বিশ্ব বাণিজ্যৰ বাবে এক প্ৰাকৃতিক সুবিধা প্ৰদান কৰে। চৰকাৰৰ মতে, এই গ্ৰেট নিকোবৰ প্ৰকল্পত যোগাযোগ, বাণিজ্য আৰু শক্তি নিৰাপত্তা বৃদ্ধিৰ বাবে বৃহৎ আন্তঃগাঁথনি অন্তৰ্ভুক্ত কৰা হৈছে। ইয়াৰ ভিতৰত আছে এটা আন্তঃৰাষ্ট্ৰীয় কণ্টেইনাৰ ট্ৰেন্সশ্বিপমেণ্ট টাৰ্মিনেল, একেলগে ৪,০০০ যাত্ৰী নিয়ন্ত্ৰণ কৰিব পৰা এটা নতুন আন্তঃৰাষ্ট্ৰীয় বিমানবন্দৰ, ৪৫০ মেগাভল্ট এম্পিয়াৰ গেছ আৰু সৌৰ শক্তিচালিত বিদ্যুৎ প্ৰকল্প, আৰু ১৬,০০০ হেক্টৰতকৈ অধিক এলেকা সামৰি এখন আধুনিক চহৰ। ছিংগাপুৰ আৰু শ্ৰীলংকাৰ দৰে দেশৰ বন্দৰৰ ওপৰত নিৰ্ভৰশীলতা কমোৱাৰ লক্ষ্যৰে ভাৰতে এই দেশীয় ট্ৰেন্সশ্বিপমেণ্ট হাবটো নিৰ্মাণ কৰিব বিচাৰিছে।
ৰাহুল গান্ধীয়ে এই প্ৰকল্পৰ ফলত বনাঞ্চল ধ্বংস আৰু পৰিৱেশ তন্ত্ৰৰ ক্ষতি হোৱাৰ আশংকাত গুৰুত্ব আৰোপ কৰিছিল। ইয়াৰ উত্তৰত চৰকাৰে কয় যে প্ৰকল্পটোৰ বাবে বৰ্তমানৰ নিয়ম অনুসৰি এক বিস্তৃত পৰিৱেশ প্ৰভাৱ নিৰ্ধাৰণ প্ৰক্ৰিয়া সম্পূৰ্ণ কৰা হৈছে। বিষয়া সকলে উল্লেখ কৰে যে আন্দামান আৰু নিকোবৰ দ্বীপপুঞ্জৰ মুঠ বনাঞ্চলৰ মাত্ৰ ১.৮২ শতাংশহে এই প্ৰকল্পৰ বাবে ব্যৱহাৰ কৰা হ‘ব। প্ৰকল্প এলেকাত প্ৰায় ১৮.৬৫ লাখ গছ আছে যদিও, ইয়াৰে মাত্ৰ ৭.১১ লাখ গছহে পৰ্যায়ক্ৰমে কটা হ‘ব। ইয়াৰ ক্ষতিপূৰণ হিচাপে ৯৭.৩০ বৰ্গ কিলোমিটাৰ এলেকাত নতুনকৈ গছ ৰোৱাৰ পৰিকল্পনা কৰা হৈছে আৰু দ্বীপটোৰ প্ৰায় ৬৬ বৰ্গ কিলোমিটাৰ এলেকা সেউজ অঞ্চল হিচাপে নিৰ্ধাৰণ কৰা হৈছে।
চৰকাৰে লগতে স্পষ্ট কৰি দিছে যে শ্বোমপেন আৰু নিকোবৰী আদিবাসী সম্প্ৰদায়ৰ লোকসকলৰ স্বাৰ্থ এই প্ৰকল্পৰ কেন্দ্ৰবিন্দুত থাকিব আৰু তেওঁলোকক নিজৰ স্থানৰ পৰা স্থানান্তৰিত কৰাৰ কোনো পৰিকল্পনা নাই। জনজাতীয় অধিকাৰ, সাংস্কৃতিক অখণ্ডতা আৰু জীৱিকা সুৰক্ষিত কৰাৰ বাবে বিশেষ ব্যৱস্থা গ্ৰহণ কৰা হৈছে। এই প্ৰকল্পটো ২০২৫ চনৰ পৰা ২০৪৭ চনৰ ভিতৰত তিনিটা পৰ্যায়ত মুঠ ১৬৬.১০ বৰ্গ কিলোমিটাৰ এলেকাত ৰূপায়ণ কৰা হ‘ব। অৱশ্যে, ইয়াৰ পূৰ্বে ভাৰত আৰু আন্তঃৰাষ্ট্ৰীয় পৰ্যায়ত হোৱা প্ৰতিবাদসমূহত ত্ৰুটিপূৰ্ণ পৰিৱেশ নিৰ্ধাৰণ, বনাঞ্চল ধ্বংসৰ আশংকা আৰু ভূমিকম্প তথা ছুনামীৰ প্ৰতি দ্বীপটোৰ দুৰ্বলতাৰ দৰে বিষয়সমূহ উত্থাপন কৰি ইয়াক পৰিৱেশ সুৰক্ষা আৰু উন্নয়নৰ মাজৰ এক সংঘাতৰ কাৰণ হিচাপে চিহ্নিত কৰা হৈছিল।
