ই-ফাৰ্মাচীৰ বিৰুদ্ধে আন্দোলনক আৰু অধিক শক্তিশালী কৰাৰ বাবে অল ইণ্ডিয়া অৰ্গেনাইজেচন অৱ কেমিষ্ট এণ্ড ড্ৰাগিষ্টে অহা ২০ মে’ত দেশজুৰি ঔষধৰ বিপণী বন্ধ কৰাৰ আহ্বান জনাইছে।
সংগঠনে দাবী কৰিছে যে তেওঁলোকৰ নিয়ন্ত্ৰণত প্ৰায় ১২.৪০ লাখ ঔষধৰ বিপনী আছে। ফলত সেইদিনা সমগ্ৰ দেশতে ঔষধ ক্ৰয়-বিক্ৰয়ৰ দৰে অত্যাৱশ্যকীয় সেৱাসমূহ ভয়াৱহভাৱে ব্যাহত হ’ব পাৰে বুলি আশংকা কৰা হৈছে।
ইতিমধ্যে এআইঅ’চিডিয়ে আনুষ্ঠানিক বিবৃতি প্ৰস্তুত কৰি জিলা পৰ্যায়ৰ নেতৃত্বলৈ প্ৰেৰণ কৰাৰ লগতে দেশৰ বিভিন্ন জিলা দণ্ডাধীশক দাখিল কৰিবলৈ নিৰ্দেশ দিছে। সংগঠনটোৰ এই সিদ্ধান্তৰ বাবে সাধাৰণ মানুহ, বিশেষকৈ ৰোগী আৰু তেওঁলোকৰ পৰিয়ালে ডাঙৰ সমস্যাৰ সন্মুখীন হ’ব পাৰে বুলি ধাৰণা কৰা হৈছে।
কিয় এই ধৰ্মঘট? সংগঠনটোৰ এই দাবী মূলতঃ তিনিটা বিষয়ৰ ওপৰত আধাৰিত।
প্ৰথমতে ই-ফাৰ্মাচীসমূহ তৎক্ষণাত বন্ধ কৰি দিব লাগে। তেওঁলোকৰ অভিযোগ যে অনলাইন মাধ্যমৰ জৰিয়তে ঔষধ বিক্ৰীৰ বাবে ভুৱা প্ৰেছক্ৰিপচন, প্ৰেছক্ৰিপচন অবিহনে এন্টিবায়টিকৰ যোগান, প্ৰশিক্ষিত ফাৰ্মাচিষ্ট অবিহনে ঔষধ বিক্ৰীৰ দৰে গুৰুতৰ অনিয়ম বৃদ্ধি পাইছে।
দ্বিতীয়তে, ডাঙৰ ডাঙৰ ঔষধ কোম্পানীবোৰে ইচ্ছামতে দাম বৃদ্ধি আৰু হ্ৰাস কৰাটো বন্ধ কৰিব লাগিব।
তৃতীয়তে, কৰ’না পৰিস্থিতিৰ সময়ত জাৰি কৰা ২০২০ চনৰ গাইডলাইন ব্যৱহাৰ কৰি ই-ফাৰ্মাচীসমূহে ব্যৱসায় অব্যাহত ৰাখিছে, যিটো এতিয়া বন্ধ কৰাৰ প্ৰয়োজন আছে বুলি তেওঁলোকে ভাৱে।
সংগঠনটোৰ সৰ্বভাৰতীয় সাধাৰণ সম্পাদক ৰাজীৱ সিংঘালে সংবাদ মাধ্যমৰ আগত কয় যে, “ঔষধৰ দৰে স্পৰ্শকাতৰ সামগ্ৰীৰ ক্ষেত্ৰত কোনো আপোচ কৰিব নোৱাৰি। ই-ফাৰ্মাচীৰ নামত মানুহৰ জীৱনৰ সৈতে খেলা কৰিব নোৱাৰি।”
অৱশ্যে এইক্ষেত্ৰত ভিন্ন মতামতো আছে। অল ইণ্ডিয়া কেমিষ্ট এণ্ড ডিষ্ট্ৰিবিউটৰ ফেডাৰেচনৰ সাধাৰণ সম্পাদক জয়দীপ সৰকাৰে এই ধৰ্মঘটৰ বিৰোধিতা কৰিছে। তেওঁৰ মতে, এনেধৰণৰ ধৰ্মঘটে সাধাৰণ মানুহৰ দুখ-কষ্ট বৃদ্ধি কৰিব আৰু ব্যৱসায়ৰ ক্ষতি কৰিব। ই-ফাৰ্মাচী সম্পৰ্কীয় এটা গোচৰ ইতিমধ্যে দিল্লী উচ্চ ন্যায়ালয়ত বিচাৰাধীন হৈ আছে বুলিও তেওঁ কয়।
উদ্যোগটোৰ এটা অংশই দাবী কৰে যে ই-ফাৰ্মাচীৰ সৈতে হোৱা প্ৰতিযোগিতাত ক্ষুদ্ৰ আৰু মজলীয়া ঔষধৰ দোকানসমূহ আচলতে পিছ পৰি আছে। সেইটোৱেই এই আন্দোলনৰ কাৰণ। তেওঁলোকৰ মতে, ৰেহাইৰ প্ৰতিযোগিতাৰ বাবে গ্ৰাহকে সুবিধা লাভ কৰি আছে।
কিন্তু এআইঅ’চিডিয়ে প্ৰত্যুত্তৰত কয় যে অতিৰিক্ত ৰেহাইৰ প্ৰলোভনৰ ফলত বজাৰত প্ৰেছক্ৰিপচন অবিহনে ভেজাল ঔষধ আৰু এন্টিবায়টিকৰ বিক্ৰী বৃদ্ধি পাইছে, যাৰ ফলত ভৱিষ্যতে ঔষধ প্ৰতিৰোধৰ দৰে গুৰুতৰ সমস্যাৰ সৃষ্টি হ’ব পাৰে।
