দিল্লীত সংঘটিত হৈছে এটা অতি লজ্জাজনক ঘটনা। এখন বিদ্যালয়ত ভৰ্তি হোৱাৰ মাত্ৰ এদিন পিছতেই তিনি বছৰীয়া এটি শিশুক ধৰ্ষণ কৰাৰ অভিযোগ উত্থাপন হৈছে। আৰক্ষীৰ সূত্ৰই জনোৱা অনুসৰি যোৱা ৩০ এপ্ৰিলত এই ঘটনাটো সংঘটিত হৈছিল আৰু শিশুটিৰ পৰিয়ালৰ অভিযোগৰ ভিত্তিত বিদ্যালয়খনৰ এজন ৫৭ বছৰীয়া কৰ্মীক ইতিমধ্যে গ্ৰেপ্তাৰ কৰা হৈছে। এই ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
জানিব পৰা মতে ১ মে’ত শিশুটিৰ মাতৃয়ে আৰক্ষীৰ ওচৰত এজাহাৰ দাখিল কৰিছিল। মাতৃৰ অভিযোগ অনুসৰি ৩০ এপ্ৰিলত স্কুলৰ পৰা ঘৰলৈ অহাৰ পিছত শিশুটিয়ে অত্যন্ত যন্ত্ৰণা অনুভৱ কৰাৰ কথা কৈছিল। যেতিয়া মাকে শিশুটিক সোধা-পোছা কৰে তেতিয়া শিশুটিয়ে জানিবলৈ দিয়ে যে স্কুলৰ এজন কৰ্মীয়ে তাক এটা নিৰ্জন ঠাইলৈ লৈ গৈ নিৰ্যাতন চলাইছিল। এই অভিযোগৰ ভিত্তিতেই আৰক্ষীয়ে পকছ’ আইনৰ অধীনত এটা গোচৰ ৰুজু কৰি তদন্ত আৰম্ভ কৰিছিল।
আৰক্ষীয়ে জনোৱা মতে শিশুটিয়ে ইতিমধ্যে অভিযুক্তক চিনাক্ত কৰি ১ মে’ত অভিযুক্তক গ্ৰেপ্তাৰ কৰি আদালতলৈ প্ৰেৰণ কৰা হৈছিল। আদালতে অভিযুক্তক ন্যায়িক জিম্মালৈ প্ৰেৰণ কৰিছিল যদিও যোৱা ৭ মে’ত তেওঁ জামিন লাভ কৰে। আৰক্ষীয়ে বৰ্তমান বিদ্যালয়খনৰ চিচিটিভি ফুটেজ পৰীক্ষা কৰি আছে যাতে ঘটনাৰ অধিক তথ্য লাভ কৰিব পৰা যায়। অভিযুক্তই জামিন পোৱাৰ পিছত শিশুটিৰ পৰিয়ালৰ মাজত তীব্ৰ ক্ষোভৰ সৃষ্টি হৈছে আৰু তেওঁলোকে আৰক্ষীৰ ভূমিকাৰ ওপৰত প্ৰশ্ন উত্থাপন কৰিছে।
আনহাতে শিশুটিৰ পৰিয়ালে আৰক্ষীৰ বিৰুদ্ধে নিষ্ক্ৰিয়তাৰ অভিযোগ উত্থাপন কৰিছে। শিশুটিৰ মাতৃয়ে অভিযোগ কৰিছে যে এই জঘন্য কাণ্ডৰ সৈতে স্কুলৰ এজন শিক্ষকও জড়িত আছে। এই বিষয়ত আম আদমী পাৰ্টিৰ নেতা সৌৰভ ভৰদ্বাজেও আৰক্ষীক সমালোচনা কৰিছে। অৱশ্যে পশ্চিম দিল্লীৰ ডিচিপি বিচিত্র বীৰে এই অভিযোগসমূহ অস্বীকাৰ কৰি জনাইছে যে আৰক্ষীয়ে খবৰ পোৱাৰ লগে লগে ব্যৱস্থা গ্ৰহণ কৰিছে। আদালতত শিশুটিৰ জবানবন্দী ৰেকৰ্ড কৰাৰ লগতে সকলো তথ্য সংগ্ৰহ কৰা হৈছে আৰু বৰ্তমান অভিযুক্তৰ জামিনৰ নথিপত্ৰসমূহ পুনৰ পৰীক্ষা কৰি থকা হৈছে।
