১৪০ খন আসন বিশিষ্ট কেৰালা বিধানসভাত কংগ্ৰেছে অকলেই ৬৩ খন আসন লাভ কৰিবলৈ সক্ষম হৈছে। ইয়াৰ মিত্ৰজোঁটৰ দল আই ইউ এম এলে ২২ খন, কেৰালা কংগ্ৰেছে ৮ খন আৰু আৰ এছ পিয়ে ৩ খন আসন লাভ কৰিছে। মুঠ ১০২ খন আসন লাভ কৰি কংগ্ৰেছ মিত্ৰজোঁটে বাওঁপন্থী মৰ্চাৰ দহ বছৰীয়া শাসনৰ অন্ত পেলাইছে। কিন্তু এনে বৃহৎ সাফল্যৰ পাছতো ৰাজ্যখনৰ পৰৱৰ্তী মুখ্যমন্ত্ৰী কোন হ’ব তাক লৈ কংগ্ৰেছ হাইকমাণ্ডে এতিয়ালৈকে কোনো চূড়ান্ত সিদ্ধান্ত ল’ব পৰা নাই।
মুখ্যমন্ত্ৰী বাছনিৰ বাবে কংগ্ৰেছৰ শীৰ্ষ নেতৃত্বই দিল্লীত এলানি দীঘলীয়া বৈঠকত মিলিত হৈছে। হাইকমাণ্ডে প্ৰেৰণ কৰা দুজন নিৰীক্ষক মুকুল ৱাচনিক আৰু অজয় মাকেনে ইতিমধ্যে দলৰ বিধায়কসকলৰ লগত কথা পাতি নিজৰ প্ৰতিবেদন দাখিল কৰিছে। কংগ্ৰেছৰ সভাপতি মল্লিকাৰ্জুন খাৰ্গেৰ দিল্লীৰ বাসভৱনত অনুষ্ঠিত হোৱা এই গুৰুত্বপূৰ্ণ বৈঠকত ৰাহুল গান্ধী, দীপা দাসমুন্সি, কে চি বেণুগোপাল, ৰাজ্যিক সভাপতি ছানি জোচেফ, ভি ডি সতীশন আৰু ৰমেশ চেন্নিথালা উপস্থিত থাকে।
চৰকাৰৰ নেতৃত্ব কোনে ল’ব সেই বিষয়ত মিত্ৰদলসমূহৰ মতামতকো কংগ্ৰেছে যথেষ্ট গুৰুত্ব প্ৰদান কৰিছে।
বৰ্তমান মুখ্যমন্ত্ৰী পদৰ দৌৰত মূলতঃ তিনিজন নেতাৰ নাম আগস্থানত আছে। ৰাহুল গান্ধীৰ ঘনিষ্ঠ কে চি বেণুগোপাল, বাওঁপন্থীৰ বিৰুদ্ধে দলক সফল নেতৃত্ব দিয়া ভি ডি সতীশন আৰু জ্যেষ্ঠ নেতা ৰমেশ চেন্নিথালাৰ মাজত তীব্ৰ প্ৰতিযোগিতা চলিছে। দলীয় সূত্ৰৰ মতে, সৰহসংখ্যক বিধায়কে কে চি বেণুগোপালক মুখ্যমন্ত্ৰী হিচাপে বিচৰাৰ বিপৰীতে তৃণমূল পৰ্যায়ৰ কৰ্মীসকলৰ এটা ডাঙৰ অংশই ভি ডি সতীশনক বিচাৰে। দুয়োগৰাকী নেতাৰ সমৰ্থকসকলে ইতিমধ্যে দিল্লীতো পোষ্টাৰ আৰু শ্লোগানেৰে নিজৰ সমৰ্থন প্ৰকাশ কৰিছে। আনকি খাৰ্গেৰ বাসভৱনৰ সন্মুখতো বেণুগোপালৰ সমৰ্থনত পোষ্টাৰ দেখা গৈছে। অৱশ্যে জ্যেষ্ঠ নেতা কে মুৰলীধৰণে দাবী কৰিছে যে অহা ২৪ ঘণ্টাৰ ভিতৰতে হাইকমাণ্ডে মুখ্যমন্ত্ৰীৰ নাম চূড়ান্ত কৰিব।
