কানাডাৰ এটা সৰু অঞ্চল প্ৰতি বছৰে বসন্ত কালত হাজাৰ হাজাৰ সাপৰ মিলনক্ষেত্ৰলৈ পৰিৱৰ্তিত হয়। শুনিবলৈ আচৰিত যেন লাগিলেও কানাডাৰ মেনিটোবা প্ৰদেশৰ নাৰ্চিছ নামৰ ঠাইখনত প্ৰতি বছৰে প্ৰায় ৭৫ হাজাৰৰ পৰা ডেৰ লাখ ৰেড-চাইডেড গাৰ্টাৰ সাপ একেলগে গোট খায়। বিশ্বৰ আটাইতকৈ ডাঙৰ সাপৰ সমাবেশ হিচাপে পৰিচিত এই স্থানক বহুতে ধেমালি কৰি সাপৰ হানিমুন স্পট বুলিও কয়। এই বিৰল প্ৰাকৃতিক দৃশ্য চাবলৈ প্ৰতি বছৰে দেশ-বিদেশৰ পৰ্যটক, গৱেষক আৰু প্ৰকৃতিপ্ৰেমীৰ ভিৰ লাগে।
প্ৰচণ্ড শীতৰ দেশ কানাডাত বছৰৰ বেছিভাগ সময় তীব্ৰ ঠাণ্ডা থাকে। মেনিটোবাৰ এই অঞ্চলত উষ্ণতা বহু সময়ত মাইনাস ৩০ ডিগ্ৰী চেলচিয়াছৰ তললৈও নামি যায়। সেই কঠিন শীতৰ পৰা বাচিবলৈ হাজাৰ হাজাৰ সাপে মাটিৰ তলৰ চূণশিলৰ গুহাত আশ্ৰয় লৈ থাকে। কিন্তু বসন্ত কাল অহাৰ লগে লগে যেতিয়া বতৰ অলপ গৰম হয়, তেতিয়া এই সাপবোৰ একেলগে মাটিৰ ওপৰলৈ ওলাই আহে। তেতিয়াই আৰম্ভ হয় প্ৰকৃতিৰ এক বিস্ময়কৰ খেল।
বিশেষজ্ঞসকলৰ মতে এই সাপবোৰ মূলতঃ প্ৰজননৰ বাবেহে এনেদৰে একত্ৰিত হয়। মাইকী সাপক কেন্দ্ৰ কৰি অসংখ্য মতা সাপ একেলগে জুম বান্ধে আৰু ইয়াৰ ফলত মাটিত এক বিশাল সাপৰ সমাৱেশৰ সৃষ্টি হয়। এই অদ্ভুত দৃশ্যই এফালে যেনেকৈ মানুহৰ মনত ভয়ৰ সৃষ্টি কৰে, আনফালে তেনেকৈ আচৰিতো কৰি তোলে।
আটাইতকৈ গুৰুত্বপূৰ্ণ কথাটো হ’ল এই সাপবোৰ বিষহীন আৰু ই মানুহৰ বাবে কোনো অনিষ্ট নকৰে। সেইবাবেই পৰ্যটকসকলে নিৰাপদ দূৰত্বত থাকি এই বিৰল দৃশ্য উপভোগ কৰিব পাৰে। স্থানীয় প্ৰশাসনেও পৰ্যটকৰ সুবিধাৰ বাবে বিশেষ ৰাস্তা আৰু নিৰীক্ষণৰ ব্যৱস্থা কৰি দিছে যাতে মানুহে সহজে এই প্ৰাকৃতিক ঘটনাটো ওচৰৰ পৰা চাব পাৰে।
নাৰ্চিছৰ এই সাপৰ আশ্ৰয়স্থলবোৰ এতিয়া কেৱল পৰ্যটন কেন্দ্ৰই নহয়, বিজ্ঞানীসকলৰ বাবেও এক গুৰুত্বপূৰ্ণ গৱেষণাক্ষেত্ৰ হৈ পৰিছে। সাপৰ আচৰণ, প্ৰজনন পদ্ধতি আৰু পৰিৱেশৰ পৰিৱৰ্তনৰ প্ৰভাৱ সম্পৰ্কে ইয়াত গৱেষণা চলাই থকা হয়। বিশেষজ্ঞসকলৰ মতে পৃথিৱীৰ অতি কম ঠাইতহে এনেদৰে ইমান বৃহৎ সংখ্যক সাপ একেলগে দেখা পোৱা যায়। সেয়েহে কানাডাৰ এই বিশেষ ঠাইখন আজি সমগ্ৰ বিশ্বৰ বাবে এক কৌতুহলৰ কেন্দ্ৰবিন্দু।
