ৰাছিয়া আৰু ইউক্ৰেইনৰ মাজত চলি থকা দীৰ্ঘদিনীয়া যুদ্ধই বহুতৰে জীৱনলৈ অন্ধকাৰ নমাই আনিছে। এই যুদ্ধত প্ৰাণ হেৰুওৱা এজন ৰাছিয়ান সৈনিকৰ পৰিয়ালে তেওঁৰ আত্মাৰ সদগতিৰ বাবে ৰাছিয়াৰ পৰা বহুদূৰ বাট অতিক্ৰমি বিহাৰৰ গয়াত উপস্থিত হৈছে।
পৰিয়ালটোৱে গয়াৰ পবিত্ৰ ফাল্গু নদীৰ পাৰত উপস্থিত হৈ পৰম্পৰাগত ধৰ্মীয় ৰীতি-নীতিৰে পিণ্ডদান কাৰ্যসূচী সম্পন্ন কৰে। এইদৰে সাত সাগৰৰ পাৰৰ পৰা আহি ভাৰতীয় পৰম্পৰা অনুসৰি মৃতকৰ বাবে প্ৰাৰ্থনা কৰা কাৰ্যই বৰ্তমান সকলোৰে দৃষ্টি আকৰ্ষণ কৰিছে।
ৰাছিয়াৰ পৰা অহা ললিতা ৰাধা ৰাণী ফেচ আৰু তেওঁৰ স্বামী সুন্দৰা ফেচে নিজৰ পৰিয়ালৰ সৈতে এই অনুষ্ঠানত অংশগ্ৰহণ কৰে। যুদ্ধত ললিতাৰ ভাতৃৰ মৃত্যুৰ পাছত সমগ্ৰ পৰিয়ালটো শোকত ভাঙি পৰিছিল। তেওঁলোকে বিশ্বাস কৰে যে গয়াত পূৰ্বপুৰুষৰ বাবে তৰ্পণ কৰিলে মৃত আত্মাৰ চিৰশান্তি লাভ হয়। সেই বিশ্বাসৰ বশৱৰ্তী হৈয়েই তেওঁলোকে নিজৰ দেশৰ পৰা আহি ফাল্গু নদীৰ পাৰত এই ধৰ্মীয় অনুষ্ঠানটো সম্পূৰ্ণ ভক্তিৰে পালন কৰে।
সুন্দৰা ফেচে সংবাদ মাধ্যমৰ আগত জানিবলৈ দিয়ে যে ভাতৃৰ অকাল মৃত্যুত তেওঁলোক অতিশয় মৰ্মাহত হৈছিল। তেওঁলোকে আগৰে পৰাই গয়াৰ ধৰ্মীয় গুৰুত্বৰ কথা জানিছিল আৰু সেইবাবেই ভাতৃৰ লগতে নিজৰ পিতৃৰ আত্মাৰ শান্তিৰ বাবেও ইয়াত পূজা অৰ্চনা কৰাৰ সিদ্ধান্ত লয়। তেওঁলোকৰ আশা যে এই ধৰ্মীয় কাৰ্যৰ জৰিয়তে তেওঁলোকৰ পৰিয়ালত শান্তি, সংহতি আৰু সুখ পুনৰ ঘূৰি আহিব।
স্থানীয় পুৰোহিত কুমাৰ গৌৰৱৰ তত্ত্বাৱধানত এই সমগ্ৰ ধৰ্মীয় বিধি-বিধানসমূহ সম্পন্ন কৰা হয়। পুৰোহিতজনে কয় যে এই ৰাছিয়ান পৰিয়ালটোৱে কেৱল ধৰ্মীয় ৰীতি পালনৰ বাবেই সুদূৰ ৰাছিয়াৰ পৰা গয়ালৈ আহিছে।
উল্লেখযোগ্য যে প্ৰতি বছৰে ভাৰতৰ লগতে বিদেশৰ পৰাও হাজাৰ হাজাৰ ভক্তই নিজৰ পূৰ্বপুৰুষৰ আত্মাৰ শান্তিৰ বাবে গয়াৰ ফাল্গু নদীৰ পাৰলৈ আহে। শেহতীয়া বছৰবোৰত গয়াত বিদেশী ভক্তৰ সংখ্যা লক্ষ্যণীয়ভাৱে বৃদ্ধি পোৱা দেখা গৈছে।
